ភ្នំពេញៈ ថ្នាក់ដឹកនាំកំពូលកម្ពុជា និងវៀតណាមនឹងបំពេញទស្សនកិច្ចទៅវិញទៅមកនៅពេលខាងមុខស្របពេលដែលគណៈកម្មការព្រំដែនប្រទេសទាំងពីរមិនទាន់ឯកភាពគ្នាក្នុងការស្នើសុំអ្នកជំនួយបច្ចេកទេសបារាំងឱ្យជួយផ្ទៀងផ្ទាត់ព្រំដែនបន្ទាប់ពីវៀតណាមបន្តជីកស្រះ និងសង់ប៉ុស្តិ៍នៅតំបន់ស ទោះបីកម្ពុជាផ្ញើកំណត់ទូតស្នើបញ្ឈប់បណ្តោះអាសន្នក្ដី។
ដំណើរទស្សនកិច្ចនេះបន្ទាប់ពីកិច្ចប្រជុំរវាងគណៈកម្មាធិការទទួលបន្ទុកកិច្ចការព្រំដែនកម្ពុជា និងវៀតណាមរយៈពេលពីរថ្ងៃកាលពីថ្ងៃទី ២៩ និង ៣០ ខែសីហានៅទីស្តីការគណៈរដ្ឋមន្ត្រីពុំទទួលបានផ្លែផ្កានោះ។
លោក វ៉ា គឹមហុង ប្រធានគណៈកម្មាធិការទទួលបន្ទុកកិច្ចការព្រំដែនកម្ពុជាបានថ្លែងក្រោយបញ្ចប់កិច្ចប្រជុំថាគណៈកម្មាធិការព្រំដែន កម្ពុជា-វៀតណាម មិនបានសម្រេចចេញកំណត់ហេតុកិច្ចប្រជុំ និងសេចក្តីព្រាងលិខិតដែលគ្រោងដាក់ទៅប្រទេសបារាំងសុំជំនួយបច្ចេកទេសខាងព្រំដែនដែលមានវិវាទនោះទេដោយសារតែកម្ពុជាប្រកាន់ជំហរប្រើប្រាស់គោលការណ៍ខ្សែព្រំដែនមិនកែប្រែប៉ុន្តែភាគីវៀតណាមមិនឯកភាព។
លោកទេសរដ្ឋមន្ត្រីបានបញ្ជាក់ថា៖ «ជាលទ្ធផលមិនទាន់បានអីទាល់តែសោះ...»។
ចំណែកជំនួបរវាងរដ្ឋមន្ត្រីក្រសួងការបរទេសកម្ពុជាលោក ប្រាក់ សុខុន និងអនុរដ្ឋមន្ត្រីការបរទេសវៀតណាម និងជាប្រធានថ្មីនៃគណៈកម្មការព្រំដែនកម្ពុជា-វៀតណាមលោក Le Hoai Trung កាលពីថ្ងៃទី ៣០ បានលើកឡើងថាកិច្ចប្រជុំរបស់គណៈកម្មការព្រំដែនប្រទេសទាំងពីរដែលបានបញ្ចប់នោះគឺស្របទៅតាមការសម្រេចរបស់ថ្នាក់ដឹកនាំនៃប្រទេសទាំងពីរក្នុងការជំរុញការងារខណ្ឌសីមា និងបោះបង្គោលព្រំដែនគោករវាងប្រទេសទាំងពីរ។
លោក ប្រាក់ សុខុន បញ្ជាក់នៅក្នុងសេចក្តីប្រកាសព័ត៌មានថា «ដំណើរទស្សនកិច្ចនៅក្នុងពេលខាងមុខរបស់នាយករដ្ឋមន្ត្រីវៀតណាមមកកាន់កម្ពុជាក៏ដូចជាទស្សនកិច្ចរបស់នាយករដ្ឋមន្ត្រីកម្ពុជាលោក ហ៊ុន សែន ទៅកាន់ប្រទេសវៀតណាមនាពេលខាងមុខនឹងរួមចំណែកដ៏សំខាន់ក្នុងការពង្រឹងពង្រីក និងលើកស្ទួយទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ។
ភ្នំពេញប៉ុស្តិ៍មិនអាចសុំការបញ្ជាក់បន្ថែមពីអ្នកនាំពាក្យក្រសួងការបរទេសកម្ពុជាលោក ជុំ សន្ទរី ជុំវិញកាលបរិច្ឆេទ និងគោលបំណងនៃទស្សនកិច្ចនេះបានទេ។ តែមន្ត្រីនៅក្រសួងថ្លែងសុំមិនបញ្ចេញឈ្មោះថានៅពេលមានកាលបរិច្ឆេទច្បាស់លាស់នឹងជូនដំណឹងជាថ្មី។
អ្នកនាំពាក្យទីស្តីការគណៈរដ្ឋមន្ត្រីលោក ផៃ ស៊ីផាន បានថ្លែងថាថ្នាក់ដឹកនាំទាំងពីរនឹងធ្វើទស្សនកិច្ចផ្លូវរដ្ឋដើម្បីរកដំណោះស្រាយចំណុចខ្វែងគំនិតគ្នា។
លោកថា៖ «យើងឃើញថាការជួបពិភាក្សាគ្នាអំពីដំណោះស្រាយដែលយើងយល់ខុសគ្នារវាងវៀតណាម និងកម្ពុជាបានសេចក្តីថាជាជំហានដ៏ល្អដែលយើងដោះស្រាយដោយសន្តិវិធីទៅតាមគោលការណ៍នៃច្បាប់ជាតិ និងអន្តរជាតិដូច្នេះយើងសង្ឃឹមថាថ្នាក់ដឹកនាំជាន់ខ្ពស់ជួបគ្នាច្បាស់ជាមានដំណោះស្រាយអីផ្សេងមួយទៀត»។
ទាក់ទងនឹងព្រឹត្តិការណ៍ថ្មីៗនេះលោកនាយករដ្ឋមន្ត្រី ហ៊ុន សែន បានបញ្ចេញប្រតិកម្មខ្លាំងៗចំនួនបីដងទៅលើឈ្មោះជនជាតិវៀតណាមដែលបានចូលទៅ Comment លើទំព័រហ្វេសប៊ុករបស់លោកដោយចាត់ទុកថាជាការប្រមាថ។
ក្រោយមកនៅថ្ងៃទី ២៧ ខែសីហាក្រសួងការបរទេសកម្ពុជាបានថ្កោលទោសចំពោះអំពើអសីលធម៌នេះ និងអំពាវនាវឱ្យសមត្ថកិច្ចចាត់វិធានការម៉ឺងម៉ាត់ក្នុងការស្រាវជ្រាវរកបុគ្គលនោះមកផ្តន្ទាទោសតាមច្បាប់ដើម្បីរក្សាកិត្តិយស និងទំនាក់ទំនងល្អរវាងប្រទេសទាំងពីរ។
លិខិតគូសបញ្ជាក់ថា៖ «មួយរយៈពេលចុងក្រោយនេះបន្ទាប់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបង្ហាញជំហរដ៏ច្បាស់លាស់ទាក់ទងនឹងបញ្ហាសមុទ្រចិនខាងត្បូងមានកម្មាភិបាល និងបុគ្គលជនជាតិវៀតណាមមួយក្រុមបានចូលក្នុងទំព័រ Facebook ផ្លូវការរបស់សម្តេចអគ្គមហាសេនាបតីតេជោ ហ៊ុន សែន ហើយធ្វើការជេរប្រមាថលើសម្តេចតេជោដោយប្រើសម្តីធ្ងន់ៗ និងព្រហើនជាទីបំផុតដែលបង្ហាញពីលក្ខណៈជាជនគ្មានភាពថ្លៃថ្នូរ»។
ជាការឆ្លើយតបក្រសួងការបរទេសវៀតណាមបានចេញលិខិតបំភ្លឺមួយផ្សព្វផ្សាយជាសាធារណៈកាលពីម្សិលមិញបានលើកឡើងថាការដែលមនុស្សមួយក្រុមត្រូវបានចាត់ទុកថាជាប្រជាជនវៀតណាមបានសម្តែងមតិយោបល់ផ្ទាល់ខ្លួនក្នុងបណ្តាញសង្គមនោះគឺមិនបានឆ្លុះបញ្ចាំងអំពីទស្សនៈរបស់វៀតណាមឡើយ។
លិខិតបញ្ជាក់ថា៖ «យើងខ្ញុំមិនមានការឯកភាពចំពោះការប្រើប្រាស់សិទ្ធិសេរីភាពក្នុងការបញ្ចេញមតិដើម្បីប្រមាថមើលងាយបុគ្គល ឬសម្តែងការនូវអាកប្បកិរិយាញុះញង់ជ្រុលនិយមបំបែកបំបាក់មនោសញ្ចេតនាដ៏ល្អប្រពៃរវាងប្រជាជននៃប្រទេសទាំងពីរនោះទេ»៕
