ព្រះសីហនុ៖ ថ្នាក់ដឹកនាំក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចបានចុះទៅស្រាវជ្រាវ តាមការបញ្ជាពីលោកនាយករដ្ឋមន្ត្រី ហ៊ុន សែន ករណីចោទប្រកាន់គ្នាទៅវិញទៅមក ជុំវិញដីសាលានៃក្តីសង្ឃឹមទំហំជាង ១ ហិកតា នៅខេត្តព្រះសីហនុ ដែលក្រសួងសង្គមកិច្ចដាក់ឱសានវាទ ៣ ខែ ឲ្យសាលានេះរើចេញ។
កាលពីពាក់កណ្តាលខែធ្នូ រាជរដ្ឋាភិបាលដោយមានការបញ្ជាផ្ទាល់ពីលោក ហ៊ុន សែន បានសម្រេចចេញ សជណ ប្រគល់ជូនក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចឲ្យចុះធ្វើការស្រាវជ្រាវ និងរាយការណ៍ជូនរដ្ឋាភិបាល ជុំវិញភាពមិនប្រក្រតីករណីខាងលើនេះ បន្ទាប់ពីទទួលបានពាក្យបណ្តឹងរបស់សមាជិកឧត្តមក្រុមប្រឹក្សាពិគ្រោះ និងផ្ដល់យោបល់មកពីគណបក្សខ្មែរក្រោក។
លោក ណុប ចាន់ណារិន្ទ រដ្ឋលេខាធិការក្រសួងទំនាក់ទំនងជាមួយរដ្ឋសភា ព្រឹទ្ធសភាបានប្រាប់ភ្នំពេញប៉ុស្តិ៍ពីម្សិលមិញថា នៅរសៀលថ្ងៃពុធម្សិលមិញ លោកស្រីឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភាបានដឹកនាំក្រុមការងារចុះផ្ទាល់ដល់ទីតាំងសាលានៃក្តីសង្ឃឹម ដែលស្ថិតក្នុងភូមិ ៣សង្កាត់ លេខ ៤ ក្រុង និងខេត្តព្រះសីហនុ ដើម្បីពិនិត្យមើលភាពមិនប្រក្រតីទាំងនេះ។
លោក ណារិន្ទ បន្តថា ការចុះស្រាវជ្រាវនេះ ក្រសួងបានជួបដោយផ្ទាល់ជាមួយនាយកសាលា អាជ្ញាធរដែនដី រួមទាំងសិស្សានុសិស្សផងដែរ។ ប៉ុន្តែលោកមិនទាន់អាចបញ្ជាក់បានទេថា ថ្នាក់ដឹកនាំនៃក្រសួងនឹងជួបជាមួយរដ្ឋមន្ត្រី ឬក៏មន្ត្រីនៃក្រសួងសង្គមកិច្ច ដែលជាភាគីម្ខាងទៀតនៃជម្លោះ ឬយ៉ាងណាទេ។
លោកបញ្ជាក់ថា៖ «នៅពេលដែលពិនិត្យចប់ ច្បាស់លាស់ នឹងដាក់របាយការណ៍ជូនសម្តេចនាយករដ្ឋមន្ត្រី ពិនិត្យ និងសម្រេចតាមក្រោយ»។
កាលពីខែសីហាកន្លងទៅ លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក បានដាក់របាយការណ៍ស្រាវជ្រាវទៅលោកនាយករដ្ឋមន្ត្រី ហ៊ុន សែន ដើម្បីសុំអន្តរាគមន៍ករណីក្រសួងសង្គមកិច្ចដាក់ឱសានវាទ ៣ ខែ ឲ្យសាលានៃក្តីសង្ឃឹមរើចេញពីទីតាំងនេះ ដោយអះអាងថា ក្រសួងត្រូវការដី ដើម្បីធ្វើការអភិវឌ្ឍ។
លោក សុខសុវណ្ណ វឌ្ឍនាសាប៊ុង ដែលជាសមាជិកក្រុមប្រឹក្សាពិគ្រោះ និងផ្ដល់យោបល់ផងនោះ បានប្រាប់ភ្នំពេញប៉ុស្តិ៍ពីម្សិលមិញថា លោករីករាយចំពោះការស្រាវជ្រាវបន្ថែមដែលមានលក្ខណៈរហ័សរហួនពីសំណាក់ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ចនេះ។ ប៉ុន្តែលោកអះអាងថា នៅតែបន្តតាមដានពីលទ្ធផលនៃការស្រាវជ្រាវនេះ ព្រោះតួនាទីរបស់លោក គឺរកមើលភាពអសកម្ម។
លោកបន្ថែមថា៖ «ក្រសួងពាក់ព័ន្ធមានសមត្ថកិច្ចដោះស្រាយបន្តតាមការចង្អុលបង្ហាញរបស់រាជរដ្ឋាភិបាល។ ដោយឡែកឆន្ទៈរបស់ខ្ញុំដូចបានឃើញកន្លងមក យើងបានខិតខំអស់លទ្ធភាពក្នុងការការពារសាលាមួយនេះ ចាប់តាំងពីពេលទទួលពាក្យបណ្ដឹងរហូតមកទល់ពេលនេះដែលទទួលបានលទ្ធផល»។
លោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទាបានប្រាប់ភ្នំពេញប៉ុស្តិ៍ពីម្សិលមិញថា ក្រសួងស្វាគមន៍ចំពោះការចុះស្រាវជ្រាវពីករណីនេះ ខណៈក្រសួងលោកបានត្រៀមឯកសារការពារខ្លួនគ្រប់គ្រាន់ហើយថា ការដកហូតទីតាំងខាងលើនេះ ក៏មិនមែនយកដីនេះទៅលក់ ដូចការចោទប្រកាន់នោះដែរ។
លោកបញ្ជាក់ថា៖ «ក្រសួងយើង មិនមានអ្វីជាបញ្ហានោះទេ...។ រដ្ឋាភិបាលចាត់ឲ្យក្រសួងទំនាក់ទំនងរដ្ឋសភា ព្រឹទ្ធសភាធ្វើអធិការកិច្ចនេះគឺយើងចង់ឲ្យតែអ៊ីចឹងទេរកមើលថា តើខាងណាខុស ខាងណាត្រូវ»។ យ៉ាងណាក៏ដោយ នៅពេលបិទបញ្ចប់ការស្រាវជ្រាវនេះ លោកបញ្ជាក់ថា៖ «អាស្រ័យលើការសម្រេចរបស់រាជរដ្ឋាភិបាល ហើយបើរាជរដ្ឋាភិបាលសម្រេចថា ប្រគល់ដីនេះ ទៅឲ្យសាលាបន្តគ្រប់គ្រង យើងជាស្ថាប័នក្រោមបង្គាប់របស់រដ្ឋាភិបាលមានតែសម្រេចតាម។ ប៉ុន្តែយើងអរគុណរដ្ឋាភិបាល ដែលបានផ្តល់ឱកាសធ្វើការស្រាវជ្រាវ»។
លោក ភុំ ណារិទ្ធ នាយកសាលានៃក្តីសង្ឃឹម ធ្លាប់បានប្រាប់ភ្នំពេញប៉ុស្តិ៍នាពេលកន្លងទៅថា សាលាដែលបានសាងសង់នៅលើផ្ទៃដីជាង ១ ហិកតានេះ ត្រូវបានអង្គការដោះដូរជាទឹកប្រាក់ពីពលរដ្ឋក្នុងតំបន់នោះ និងបន្តកាន់កាប់តាំងពីឆ្នាំ ២០០២ មក។ ប៉ុន្តែក្រោយមកក្រសួងសង្គមកិច្ចបានប្រើល្បិចទុច្ចរិតបញ្ឆោតឲ្យប្រធានអង្គការរបស់លោកដែលជាជនបរទេសមិនចេះភាសាខ្មែរចុះហត្ថលេខាលើឯកសារសរសេរជាអក្សរខ្មែរក្នុងការផ្ដល់ដីសាលាជូនក្រសួងសង្គមកិច្ច។
បើតាមនាយកសាលារូបនេះ សាលានៃក្តីសង្ឃឹមរបស់អង្គការ Assemblies of God សាខាខេត្តព្រះសីហនុ បានបើកដំណើរការដោយបំពេញតាមគោលនយោបាយរាជរដ្ឋាភិបាលអស់រយៈពេលជិត ២០ ឆ្នាំមកហើយ ដោយបានបណ្ដុះបណ្ដាលសិស្សក្រីក្រ និងចិញ្ចឹមកុមារកំព្រាប្រមាណ ៧ ម៉ឺននាក់ និងមានគ្រូបង្រៀនជិត ៥០ នាក់ គិតមកទល់បច្ចុប្បន្ននេះ៕