The Phnom Penh Post Search

Search form




Logo of Phnom Penh Post newspaper Phnom Penh Post - ថ្នាក់​ដឹក​នាំ​សហជីព​ប្រឆាំង​ការ​ទាមទារ​លិខិត​ថ្កោល​ទោស​ចំពោះ​សហជីព​ថី្ម

ថ្នាក់​ដឹក​នាំ​សហជីព​ប្រឆាំង​ការ​ទាមទារ​លិខិត​ថ្កោល​ទោស​ចំពោះ​សហជីព​ថី្ម

លោក រ៉ុង ឈុន ប្រធាន​សមាគម​គ្រូ​បង្រៀន​កម្ពុជា​ឯករាជ្យ ពេល​ឡើង​ឆ្លើយ​នៅ​តុលាការ។
លោក រ៉ុង ឈុន ប្រធាន​សមាគម​គ្រូ​បង្រៀន​កម្ពុជា​ឯករាជ្យ ពេល​ឡើង​ឆ្លើយ​នៅ​តុលាការ។ ហេង ជីវ័ន

ថ្នាក់​ដឹក​នាំ​សហជីព​ប្រឆាំង​ការ​ទាមទារ​លិខិត​ថ្កោល​ទោស​ចំពោះ​សហជីព​ថី្ម

ភ្នំពេញៈ ថ្នាក់​ដឹក​នាំ​សហជីព និង​សមាគម ៨​នាក់ ដឹក​នាំ​កម្មករ​សមាជិក​ជិត ១០០ នាក់​កាល​ពី​ម្សិល​មិញ បាន​ប្រមូល​ផ្តុំ​គ្នា​លើក​បដា ស្រែក​តាម​មេក្រូ​ដាក់​ញត្តិ​នៅ​មុខ ក្រសួង​ការងារ ទាមទារ​រដ្ឋ​មន្រ្តី​ស្ថាប័ន​សាមី​នេះ លុប​ចោល​លក្ខខណ្ឌ​ទាមទារ​លិខិត​ថ្កោល​ទោស ចំពោះ​ថ្នាក់​ដឹក​នាំ​សហជីព​មូលដ្ឋាន ដែល​ស្នើ​ចុះ​បញ្ជិកា​ក្នុង​ការ​បង្កើត​សហជីព​ថ្មី។

សហជីព និង​សមាគម​ទាំង ៨ នោះ​រួម​មាន CITA, CATU, Fed, CIS, CCFC, CFSWF, IDEA, និង CYN។ ក្នុង​ការ​ទាមទារ​ជា​លើក ទី៣ នេះ​ថ្នាក់​ដឹក​នាំ​សហជីព​ទាំង ៨ នាក់​បាន​ព្រមាន​នឹង​ដឹក​នាំ​បាតុកម្ម​ទ្រង់​ទ្រាយ​ធំ​ចុង ឆ្នាំ​២០១៤ នេះ​ប្រសិន​បើ​ក្រសួង​មិន​អន្តរាគមន៍​ឆ្លើយ​តប ឬ​សម្រួល​គោល​ការណ៍​នេះ ឲ្យ​មាន​ភាព​ងាយ​ស្រួល​នោះ។

ប្រធាន​សហព័ន្ធ​សហជីព​កម្មករ​ចំណី​អាហារ និង​សេវាកម្ម​កម្ពុជា លោក សរ ម៉ូរ៉ា បាន​មាន​ប្រសាសន៍​ថា កន្លង​ទៅ​ក្រោម​ការ​អនុវត្ត​ប្រកាស​ចុះ​ថ្ងៃ ទី១៥ ខែ​កុម្ភៈ ឆ្នាំ​២០០៦ ស្តី​ពី​ការ​ចុះ​បញ្ជិកា​នៃ​អង្គការ​វិជ្ជាជីវៈ​របស់​ក្រសួង​ការងារ និង​បណ្តុះ​បណ្តាល​វិជ្ជាជីវៈ គឺ​មាន​លក្ខណៈ​ប្រសើរ មិន​បង្ក​ភាព​ស្មុគ​ស្មាញ​ដល់​ការ​ចុះ​បញ្ជិកា​បង្កើត​សហជីព​មូលដ្ឋាន​ឡើយ ប៉ុន្តែ កាល​ពី​ចុង ឆ្នាំ​២០១៣ ក្រសួង បាន​តម្រូវ​ឲ្យ​ថ្នាក់​ដឹក​នាំ ៣ រូប​របស់​សហជីព​មូលដ្ឋាន ដែល​មាន​បំណង​បង្កើត​សហជីព​ចុះ​បញ្ជិកា ដោយ​ភ្ជាប់​លិខិត​ថ្កោល​ទោស​ពី​ក្រសួង​យុត្តិធម៌ បង្ក​ឲ្យ​មាន​ភាព​លំបាក ចំណាយ​ពេល​វេលា​និង​ថវិកា​ច្រើន ដែល​សហជីព​មិន​មាន​លទ្ធភាព។

លោក​បញ្ជាក់​ថា៖ «ពី​មុន​ក្រសួង​បាន​ជួយ​សម្រួល​ករណី​នេះ តែ​ក្រោយ​ការ​ស្នើ​សុំ​របស់​ក្រុម​ថៅកែ ក្រុម​ហ៊ុន​ទាមទារ​ទាំង​ប្រវត្តិ​រូប រូប​ថត​សមាជិក​សហជីព​មួយៗ និង​លិខិត​ថ្កោល​ទោស ទាំង​ដែល​ដឹង​ថា ពួក​គេ​មិន​មាន​លទ្ធភាព​ធ្វើ​វា»។

លោក​ឲ្យ​ដឹង​ថា គោល​ការណ៍​របស់​អនុ​សញ្ញា ILO គឺ​ថ្នាក់​ដឹក​នាំ​សហជីព​អាច​ប្រកាស​ជូន​ដំណឹង​បង្កើត​សហជីព​មូលដ្ឋាន​បាន​អត់​មាន​កំណត់​ថា ធ្លាប់​ជាប់​បទ​ឧក្រិដ្ឋ​អី​នោះ​ទេ។

លោក​ថា៖ «គោល​ការណ៍​ទាមទារ​លក្ខខណ្ឌ​នេះ គឺជា​ការ​រំលោភ​សិទ្ធិ​សហជីព យើង​សង្ឃឹម​ថា នឹង​មាន​ការ​ឆ្លើយ​តប និង​ចេញ​ជា​គោល​ការណ៍​ជាក់​លាក់ ផ្តល់​ភាព​ងាយ​ស្រួល​ដល់​សហជីព បើ​គ្មាន​ទេ​នោះ យើង​នឹង​ប្តឹង​ទៅ ILO ដើម្បី​ពិចារណា​រឿង​នេះ»។

ឆ្លើយ​តប​នឹង​រឿង​នេះ អ្នក​នាំ​ពាក្យ​ក្រសួង​ការងារ លោក ហេង សួរ បាន​ឲ្យ​ដឹង​ថា ការ​ទាមទារ​លិខិត​ថ្កោល​ទោស ដើម្បី​បញ្ជាក់​ភាព​គ្មាន​ទោស​នេះ ស្រប​តាម​ការ​កំណត់​របស់​ច្បាប់​មិន​មែន​ជា​ការ​បង្ខិត​បង្ខំ​នោះ​ទេ។ លោក​ថា៖ «ក្រសួង​អនុវត្ត​តាម​នីតិវិធី​នៃ​ច្បាប់ ភាព​គ្មាន​ទោស​របស់​ថ្នាក់​ដឹក​នាំ​សហជីព គឺជា​កត្តា​មូលដ្ឋាន​ដើម្បី​បញ្ជាក់​ពី​ភាព​ត្រឹម​ត្រូវ​ស្រប​ច្បាប់​របស់​សហជីព»។

លោក ហេង សួរ ក៏​បាន​ទទួល​ស្គាល់​ថា ក្រសួង​ពិត​ជា​ធ្លាប់​បាន​សម្រួល​ការ​ចុះ​បញ្ជិកា​នេះ ដល់​សហជីព​ពី​មុន​មែន តែ​ក្រោយ​ការ​ធ្វើ​ស្វ័យ​ប្រកាស​នេះ ក្រសួង​បាន​រក​ឃើញ​នូវ​ថ្នាក់​ដឹក​នាំ​សហជីព​ខិល​ខូច​មួយ​ចំនួន​យក​តួនាទី​នេះ​ដើម្បី​បិទ​បាំង​ទោស​របស់​ខ្លួន និង​ប្រព្រឹត្ត​ទង្វើ​មិន​គប្បី។

លោក​ថា៖ «ថ្នាក់​ដឹក​នាំ​សហជីព​ខ្លះ​អតីត​ជា​អ្នក​ប្រើ​ប្រាស់​គ្រឿង​ញៀន ឧក្រិដ្ឋជន​មក​ជ្រក​ក្រោម​ស្លាក​សហជីព ដល់​អ៊ីចឹង​យើង​មាន​មូលដ្ឋាន​អី​ដើម្បី​កំណត់​ទេ បើ​គាត់​ជា​សហជីព​ល្អ​ពិត គាត់​អត់​ត្រូវ​ខ្លាច​រឿង​ធ្វើ​លិខិត​ថ្កោល​ទោស​នោះ​ទេ»៕

អត្ថបទគួរចាប់អារម្មណ៍