.jpg)
រថយន្តសមត្ថកិច្ចដឹកទណ្ឌិតពីពន្ធនាគារខេត្តកណ្តាលទៅកាន់ពន្ធនាគារខេត្តត្បូងឃ្មុំ។ រូបថត នគរបាល
កណ្តាលៈ ទណ្ឌិតចំនួន ១០០ នាក់ថែមទៀត ត្រូវបានផ្ទេរចេញពីពន្ធនាគារខេត្តកណ្តាល ទៅកាន់ពន្ធនាគារត្រពាំងផ្លុង ក្នុងខេត្តត្បូងឃ្មុំ ដើម្បីទទួលបានការបណ្ដុះបណ្ដាលមុខវិជ្ជាជីវៈ ស្ដារនីតិសម្បទា សម្រាប់បំណិនជីវិត ក្រោយពេលអនុវត្តទោសរបស់ខ្លួនតាមកាលកំណត់នៃច្បាប់។
លោក ចាត ស៊ីនាង ប្រធានពន្ធនាគារខេត្តកណ្តាលប្រាប់ ភ្នំពេញ ប៉ុស្តិ៍ នៅថ្ងៃអាទិត្យថា ពិធីផ្ទេរទណ្ឌិតទាំង ១០០ នាក់ ដែលសុទ្ធសឹងជាបុរស និងជាអ្នកដែលមានទោសពាក់ព័ន្ធក្នុងបទល្មើស លួចមានស្ថានទម្ងន់ទោស និង បទល្មើសប្រើប្រាស់គ្រឿងញៀន ត្រូវបានធ្វើឡើងកាលពីថ្ងៃទី ២០ ខែ កុម្ភៈ ឆ្នាំ ២០២១។ នៅក្នុងដំណើរការផ្ទេរ និងដឹកជញ្ជូនទណ្ឌិតទាំង ១០០ នាក់ ពីពន្ធនាគារខេត្តកណ្ដាលទៅកាន់ពន្ធនាគារខេត្តត្បូងឃ្មុំនេះគឺមានការជួយអន្តរាគមន៍ផ្នែកសន្តិសុខពីកម្លាំងស្នងការដ្ឋាននគរបាលខេត្តកណ្ដាល និង កម្លាំងមន្ត្រីអនុរក្សពន្ធនាគារនៃអគ្គនាយកដ្ឋានពន្ធនាគារក្រសួងមហាផ្ទៃ។
លោក ស៊ីនាង បានបញ្ជាក់ថា៖ «ដោយសារនៅពន្ធនាគារយើងមានទីធ្លាតូចចង្អៀត និងកង្វះកម្មវិធីបណ្ដុះបណ្ដាលស្ដារនីតិសម្បទា សម្រាប់បំណិនជីវិត ដូច្នេះយើងចាំបាច់ត្រូវផ្ទេរទណ្ឌិតមួយចំនួនទៅកាន់ពន្ធនាគារជាដៃគូ ដើម្បីឱ្យពួកគេទទួលបានឱកាសបណ្ដុះបណ្ដាលលើមុខជំនាញផ្សេងៗ សម្រាប់បំណិនជីវិត ក្រោយអនុវត្តទោសរបស់ពួកគេរួច»។
បើតាមលោក ស៊ីនាង នៅពេលនេះពន្ធនាគារខេត្តកណ្ដាលមានទណ្ឌិតសរុបជាង ៧០០ នាក់ ក្នុងនោះមានស្ត្រីជាង ១០០ នាក់។ ពន្ធនាគារនេះមានផ្ទៃដីប្រមាណជាង ១ ហិកតា គឺមានលក្ខណៈតូចចង្អៀត មិនអាចបង្កើត និងពង្រីកកម្មវិធី បណ្ដុះបណ្ដាលលើមុខវិជ្ជាស្ដារនីតិសម្បទាដល់ជនជាប់ឃុំបានច្រើននោះទេ។
ការផ្ទេរទណ្ឌិត ១០០ នាក់ ទៅកាន់ពន្ធនាគារត្រពាំងផ្លុងក្នុងខេត្តត្បូងឃ្មុំនេះក៏មិនមែនជាលើកទី១ ដែរ។ កាលពីថ្ងៃទី ៨ ខែ កុម្ភៈ ឆ្នាំ ២០២១ ទណ្ឌិតចំនួន ១០០ នាក់ ត្រូវបានផ្ទេរចេញពីពន្ធនាគារខេត្កកណ្ដាលទៅកាន់មណ្ឌលកែប្រែភ្នំក្រវាញឬ (ម ៤) ក្នុងខេត្តពោធិ៍សាត់ ដែលជាពន្ធនាគារគំរូមួយដែលមានកម្មវិធីបណ្ដុះបណ្ដាលមុខវិជ្ជាជីវៈ ស្ដារនីតិសម្បទាល្អជាងគេនៅកម្ពុជា បន្ទាប់ពីពន្ធនាគារខេត្តសៀមរាប។
លោក ភិន យ៉ាន ប្រធានពន្ធនាគារខេត្តត្បូងឃ្មុំបានប្រាប់ ភ្នំពេញ ប៉ុស្តិ៍ថា នៅពេលនេះទណ្ឌិតទាំងនោះកំពុងត្រូវបានឃុំខ្លួននៅក្នុងពន្ធនាគារខេត្តត្បូងឃ្មុំ។ ពួកគេកំពុងត្រូវបានរៀបចំដាក់បញ្ចូលនៅក្នុងវគ្គបណ្ដុះបណ្ដាលលើមុខជំនាញផ្សេងៗទៅតាមការសម្រេចចិត្តរបស់ពួកគេផ្ទាល់។
លោកបញ្ជាក់ថា៖ «ពន្ធនាគាររបស់យើង មានកម្មវិធីបណ្ដុះបណ្ដាលលើមុខវិជ្ជាស្ដារនីតិសម្បទាជាច្រើន រួមមាន ការដាំដុះបន្លែបង្ការ ចិញ្ចឹមសត្វ ចម្លាក់គ្រឿងសង្ហារិមពីឈើ និងផ្សារដែក សម្រាប់ទណ្ឌិតដែលត្រូវបានផ្ដន្ទាទោសក្នុងបទព្រហ្មទណ្ឌកម្រិតមជ្ឈិម»។
ចំណែកលោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃថ្លែងពីថ្ងៃទី ២១ កុម្ភៈថា ពន្ធនាគារត្រពាំងផ្លុង មានកម្មវិធីស្ដារនីតិសម្បទាសម្រាប់ទណ្ឌិតដែលមានកម្រិតទោសស្រាលដោយសារតែពន្ធនាគារនេះមានរោងសិប្បកម្មផលិតទឹកសុទ្ធ កែច្នៃគ្រឿងសង្ហារិមពីឈើ និងដែក និងជំនាញបច្ចេកទេសនៃការដាំដុះបន្លែបង្ការ និងការចិញ្ចឹមសត្វ។ លោកថា៖ «ជាផែនការយុទ្ធសាស្ត្រ យើងចាំបាច់បង្កើតឱ្យមានកម្មវិធីទាំងនេះ នៅគ្រប់ពន្ធនាគារទាំងអស់ អាស្រ័យទៅលើទំហំនៃទីតាំងពន្ធនាគារនីមួយៗ»៕
