.jpg)
មន្ត្រីពន្ធនាគារក្នុងពេលត្រួតពិនិត្យទណ្ឌិតនៅពន្ធនាគារព្រៃសកន្លងមក។ ហេង ជីវ័ន
ភ្នំពេញៈ ទណ្ឌិតចំនួន ១៥៥ នាក់ (ស្រី ១៨ នាក់) ក្នុងចំណោមទណ្ឌិត ៣៩៩ នាក់ ត្រូវបានគណៈកម្មការជាតិពិនិត្យ និងវាយតម្លៃនៃក្រសួងយុត្ដិធម៌សម្រេចធ្វើសំណើទៅប្រមុខរាជរដ្ឋាភិបាលដើម្បីពិនិត្យ និងសម្រេចមុនពេលទូលថ្វាយព្រះមហាក្សត្រដើម្បីទទួលបានការបន្ធូរបន្ថយទោស និងលើកលែងទោសមុនថ្ងៃចូលឆ្នាំប្រពៃណីជាតិខ្មែរនាខែមេសាខាងមុខនេះ។
លោក គឹម សន្ដិភាព រដ្ឋលេខាធិការ និងជាអ្នកនាំពាក្យក្រសួងយុត្ដិធម៌បានប្រាប់ភ្នំពេញប៉ុស្ដិ៍កាលពីម្សិលមិញថា ក្រោយពេលកិច្ចប្រជុំរបស់គណៈកម្មការជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោសកាលពីសប្ដាហ៍មុន គឺអង្គប្រជុំបានសម្រេចជ្រើសរើសទណ្ឌិតចំនួន ១៥៥ នាក់ (ស្រី ១៨ នាក់) ដាក់ជូនទៅប្រមុខរាជរដ្ឋាភិបាលដើម្បីពិនិត្យ និងសម្រេចទូលថ្វាយព្រះមហាក្សត្រក្នុងការផ្ដល់ការអនុគ្រោះទោសនាឱកាសមុនចូលឆ្នាំប្រពៃណីជាតិខ្មែរនាខែមេសា។
លោកថ្លែងថា៖ «ក្រោយពីកិច្ចប្រជុំលើសំណើសុំអនុគ្រោះទោសដល់ទណ្ឌិតសរុប ៣៩៩ នាក់ (ស្រី ៤៣ នាក់) ជាលទ្ធផលអង្គប្រជុំបានសម្រេចធ្វើសំណើជូនប្រមុខរាជរដ្ឋាភិបាលដើម្បីពិនិត្យ និងសម្រេចទូលថ្វាយព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុតក្នុងការផ្តល់ការអនុគ្រោះទោសដល់ទណ្ឌិតសរុប ១៥៥ នាក់ (ស្រី ១៨ នាក់)»។
បើតាមលោក គឹម សន្ដិភាព ទណ្ឌិតដែលត្រូវបានផ្ដល់ការអនុគ្រោះទោសទាំង ១៥៥ នាក់នោះមានដូចជា បន្ថយទោស ៦ ខែចំនួន ៤៥ នាក់ (ស្រី ១០ នាក់)។ បន្ថយទោស ៩ ខែចំនួន ៣៥ នាក់ (ស្រី ១ នាក់)។ បន្ថយទោស ១២ ខែ ចំនួន ៤៨ នាក់ (ស្រី ៤ នាក់)។ រីឯការលើកលែងទោសចំនួន ២៧ នាក់ (ស្រី ៣ នាក់)។
អ្នកនាំពាក្យរូបនេះបានឱ្យដឹងថាដំណើការនៃការអនុគ្រោះទោសនេះគឺបន្ទាប់ពីគណៈកម្មការជាតិពិនិត្យ និងវាយតម្លៃរបស់ក្រសួងយុត្តិធម៌ បានទទួលសំណើពីគណៈកម្មការរាជធានី-ខេត្តចំនួន ២២ (ពន្ធនាគារ ២២) និងពីគណៈកម្មការក្រសួងមហាផ្ទៃ (មណ្ឌលអប់រំកែប្រែចំនួន ៤) ដែលមានឈ្មោះទណ្ឌិតសរុប ៣៩៩ នាក់ (ស្ដ្រី ៤៣ នាក់)។
លោកសន្តិភាពបានបញ្ជាក់ថា៖ «យើងផ្ដល់ភាពអនុគ្រោះទៅលើប្រភេទបទល្មើសស្រាលប្រភេទទណ្ឌិតដែលទទួលអនុវត្ដទោសបានតាមលក្ខខណ្ឌ ហើយសល់រយៈពេលតិចតួចសល់រយៈពេលខ្លី ឬមួយក៏ជាទណ្ឌិតដែលមានភាពចាស់ជរានៅក្នុងពន្ធនាគារមានជំងឺរ៉ាំរ៉ៃ ឬក៏ជាទណ្ឌិតដែលមានពិការភាពជាដើម។ ដូច្នេះហើយយើងបានធ្វើការពិនិត្យល្អិតល្អន់ណាស់ចំពោះចំនួនទណ្ឌិតដែលត្រូវស្នើសុំបន្ធូរបន្ថយទោស និងលើកលែងទោសនេះគឺគណៈកម្មការជាតិបានពិនិត្យវាយតម្លៃរួចរាល់អស់ហើយនៅរង់ចាំតែឯកសារមួយចំនួនដើម្បីបំពេញបង្គ្រប់ដែលអាចនឹងរួចរាល់នៅសប្ដាហ៍ក្រោយ»។
គួររំឭកថា កាលពីពិធីបុណ្យចូលឆ្នាំថ្មីប្រពៃណីខ្មែរក្នុងឆ្នាំមុនមានទណ្ឌិតចំនួន ១៣៤ នាក់ ត្រូវបានរាជរដ្ឋាភិបាលសម្រេចស្នើថ្វាយព្រះមហាក្សត្រដើម្បីបន្ធូរបន្ថយ និងលើកលែងទោស។ ក្នុងចំណោមនោះរួមមានស្នើបន្ថយទោស ៦ ខែ ៥៧ នាក់ (ស្រី ៦ នាក់)។ ស្នើបន្ថយទោស ៩ ខែចំនួន ១៩ នាក់ (ស្រី ២ នាក់)។ ស្នើបន្ថយទោស ១២ ខែចំនួន ៤០ នាក់ (ស្រី ១៧ នាក់)។ ស្នើបន្ថយទោសពី ១- ជីវិតមកត្រឹម ២០ ឆ្នាំចំនួន ២ នាក់ (ស្រី ២- នាក់) និងស្នើលើកលែងទោសមានចំនួន ១៦ នាក់ (ស្រី ១ នាក់)៕
