.jpg)
កិច្ចប្រជុំទាក់ទងនឹងការដោះលែង និងបន្ថយទោសកាលពីថ្ងៃទី ៤ មេសា។ ហុង មិនា
ភ្នំពេញៈ ទណ្ឌិតប្រមាណ ៥០ នាក់ក្នុងចំណោមឈ្មោះស្នើសុំសរុប ៣២១ នាក់ត្រូវបានគណៈកម្មការសម្រេចដាក់បញ្ចូលក្នុងបញ្ជីដើម្បីសុំព្រះរាជទានបន្ធូរបន្ថយ និងលើកលែងទោសពីព្រះមហាក្សត្រក្នុងឱកាសពិធីបុណ្យចូលឆ្នាំខ្មែរប្រពៃណីជាតិក្នុងនោះ ៨ នាក់នឹងត្រូវលើកលែងទោស និង ៤២ នាក់នឹងត្រូវបន្ថយទោស ប៉ុន្តែពុំមានបញ្ជាក់ពីឈ្មោះអតីតមន្ត្រីគណបក្សប្រឆាំងទេ។ នេះបើតាមលោក គឹម សន្តិភាព អ្នកនាំពាក្យក្រសួងយុត្តិធម៌កាលពីម្សិលមិញ។
លោក គឹម សន្តិភាព បានប្រាប់ឲ្យដឹងថាអ្នកទោសប្រមាណជា ៥០ នាក់នឹងត្រូវបន្ធូរបន្ថយ និងលើកលែងទោសក្នុងចំណោមអ្នកទោសជាង ៣០០ នាក់នៅទូទាំងរាជធានី-ខេត្ត។
លោកថា៖ «គណៈកម្មការជាតិបានពិនិត្យ និងសម្រេចស្នើសុំការអនុគ្រោះទោសដល់ទណ្ឌិតសរុប ៥០ រូប (ស្ត្រី ៦ រូប) ក្នុងនោះបន្ធូរបន្ថយទោស ៤២ រូប (ស្ត្រី ៥ រូប) និងលើកលែងទោស ៨ រូប (ស្ត្រី ១ រូប) សម្រាប់ឱកាសបុណ្យចូលឆ្នាំថ្មីប្រពៃណីជាតិខាងមុខនេះក្នុងចំណោមបញ្ជីដែលបានស្នើសុំពីគណៈកម្មការក្រសួងមហាផ្ទៃ និងគណៈកម្មការរាជធានី-ខេត្តចំនួន ៣២១ នាក់»។
លោក នុត សាវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃបានថ្លែងថាកម្ពុជាគ្មានអ្នកទោសនយោបាយទេ ប៉ុន្ដែចំពោះអ្នកទោសដោយសារដីធ្លី និងអ្នកទោសដែលថាខ្លួនជាសកម្មជនអ្វីផ្សេងនោះគឺពួកគាត់មិនទាន់អនុវត្តទោសបាន ១ ភាគ ៣ នៃទោសសរុបនៅឡើយ។ ចំណែកទណ្ឌិតអាចសុំលើកលែងទោសបាននៅពេលពួកគេបានអនុវត្តទោស ២ ភាគ ៣ រួចរាល់។
លោកថា៖ «អាហ្នឹងវាខុសពីគោលការណ៍ ហើយគោលការណ៍យើង ក្រៅពីលក្ខខណ្ឌ ១ ភាគ ៣ ឬ ២ ភាគ ៣ និងលក្ខខណ្ឌធំបំផុតគឺការកែខ្លួនរបស់ពួកគាត់ ហើយការវាយតម្លៃរបស់គណៈកម្មការគឺថាពួកគាត់ប្រព្រឹត្តអ្វីប៉ះពាល់ដល់សង្គម... អ៊ីចឹងគឺខាងគណៈកម្មការមិនអាចលើកលែង ឬបន្ធូរបន្ថយទោសឲ្យបានទេ ហើយវាខុសពីនីតិវិធីរបស់យើង»។
លោក អំ សំអាត ប្រធានផ្នែកឃ្លាំមើល និងការពារសិទ្ធិមនុស្សនៃអង្គការលីកាដូបានថ្លែងថា ការលើកលែងទោសនាពេលនេះហាក់មានកម្រិតតិចបំផុត ក្រោយពីមានប្រតិកម្មពីលោកនាយករដ្ឋមន្ត្រីកន្លងមក ប៉ុន្តែលោកថាការចម្រាញ់ល្អជាងមុន។
លោកថា៖ «ការចម្រាញ់នេះវាមានភាពល្អប្រសើរជាងមុនព្រោះគណៈកម្មការអន្តរក្រសួងទើបតែយកចិត្តទុកដាក់ ហើយខ្ញុំគាំទ្រចំពោះចំណាត់ការនេះ។
កន្លងមកគេសង្កេតឃើញថាការដែលលើកលែងទោសច្រើនពេកគឺវាអាចនឹងមានភាពមិនប្រក្រតីតាមរយៈការសូកប៉ាន់ណាមួយកើតឡើង»។
ចំណែកលោក សុច សុផាណារ៉ា អគ្គនាយករងនៃអគ្គនាយកដ្ឋានកិច្ចការអយ្យការនៃក្រសួងយុត្តិធម៌ធ្លាប់បានថ្លែងកាលពីថ្ងៃទី ៤ ខែមេសាថ្មីៗនេះថា ទណ្ឌិតទាំង ៣២១ នាក់នោះ មានស្ត្រី ២៨ នាក់ដែលកំពុងជាប់ពន្ធនាគារខេត្តក្រុងចំនួន ២០ និងមណ្ឌលអប់រំកែប្រែចំនួន ៤ ។
លោកថ្លែងថាចំពោះគោលការណ៍ដែលក្រសួងពាក់ព័ន្ធយល់ព្រមគឺអាស្រ័យលើ «ការកែប្រែរបស់ទណ្ឌិតក្នុងពន្ធនាគារភ្ជាប់ជាមួយឯកសារពាក់ព័ន្ធ ពិសេសសាលក្រម ឬសាលដីកាស្ថាពរ។ អ្វីដែលកែប្រែគឺយើងពិនិត្យលើទណ្ឌិតដែលគាត់អនុវត្តល្អ មានការប្រឡងប្រណាំងក្នុងពន្ធនាគារ ហើយការស្នើសុំនេះធ្វើឡើងតាមឋានានុក្រមគឺគណៈកម្មការខេត្តដឹកនាំដោយអភិបាលខេត្ត និងស្ថាប័នអយ្យការ និងស្ថាប័នពាក់ព័ន្ធ»។
បើតាមលោក សុផាណារ៉ា ក្នុងចំណោមទណ្ឌិត ៣២១ នាក់នោះមានជនបរទេសប្រហែល ១០ ភាគរយ។
ទាក់ទងនឹងអ្នកជាប់ទោសរឿងនយោបាយ លោក សុផាណារ៉ា បានថ្លែងថា ក្នុងតារាងឈ្មោះគ្មានបញ្ជាក់ពីតួនាទីអ្វីទេ ដោយសារគណៈកម្មការពិនិត្យតែឈ្មោះ បទល្មើស ការកែប្រែខ្លួន និងឯកសារភ្ជាប់ជាមួយ។
គួររំឭកថាកាលពីឆ្នាំមុន ព្រះមហាក្សត្របានចេញព្រះរាជក្រឹត្យលើកលែង និងបន្ធូរបន្ថយទោសទណ្ឌិត ១៥៧ នាក់ក្នុងនោះមានលោក ហុង សុខហួរ អតីតសមាជិកព្រឹទ្ធសភាគណបក្ស សម រង្ស៊ី ម្នាក់ផងដែរ។
ទណ្ឌិតទាំង ១៥៧ នាក់ដែលត្រូវលើកលែង និងបន្ធូរបន្ថយទោសមានដូចជា៖ បន្ធូរបន្ថយទោស ៦ ខែមាន ៨៣ នាក់ (ស្រី ១០ នាក់) បន្ថយទោស ៩ ខែ មាន ៤២ នាក់ (ស្រី ៥ នាក់) និងបន្ធូរបន្ថយទោស ១២ ខែ មាន ៦ នាក់ (ស្រី ១ នាក់)។
កាលពីខែមីនាលោកនាយករដ្ឋមន្ត្រី ហ៊ុន សែន បានថ្លែងថា លោកនឹងមិនលើកលែងទោសដល់អ្នកទោសនៃអតីតគណបក្សប្រឆាំងឡើយ។ លោកថ្លែងថា៖ «សូម្បីអាអ្នកជាប់គុកនៅភ្នំពេញដែលសុំលើកលែងទោសជាប់គុកបន្ថែមដែរ គ្មានលើកឲ្យឯងទេ ដោយសារតែអាពួកអាមេចង្រៃ វាធ្វើសកម្មភាពបែបហ្នឹង អ៊ីចឹងសុំបន្តជាប់គុកតទៅទៀតទៅ...អ្នកខ្លះសុំមកខ្ញុំតើ ផ្ញើតាមទូតផង ផ្ញើតាមអ្នកនេះផង ឯងដោះលែង ហុង សុខហួរ មួយ គេថា អាហ្នឹងសម្ពាធអន្តរជាតិ អើ អ៊ីចឹង បើកាលណានៅបន្តធុនហ្នឹង អញមិនលើកលែងឲ្យអាណាទេ...ពីព្រោះអាខ្លះសាលក្រមអត់ទាន់ចូលស្ថាពរ...នៅក្ដីនៅឡើយទេ»៕
