The Phnom Penh Post Search

Search form




Logo of Phnom Penh Post newspaper Phnom Penh Post - ទណ្ឌិត​ ៧០០ ​នាក់​ត្រូវ​លើក​លែង និង​បន្ថយ​ទោស

ទណ្ឌិត​ ៧០០ ​នាក់​ត្រូវ​លើក​លែង និង​បន្ថយ​ទោស

ទណ្ឌិត​ដែល​ត្រូវ​បាន​លើក​លែង​ទោស​កាល​ពី​ពេល​កន្លង​មក​។
ទណ្ឌិត​ដែល​ត្រូវ​បាន​លើក​លែង​ទោស​កាល​ពី​ពេល​កន្លង​មក​។ ម៉ៃ វីរៈ

ទណ្ឌិត​ ៧០០ ​នាក់​ត្រូវ​លើក​លែង និង​បន្ថយ​ទោស

ភ្នំពេញៈ បញ្ជី​ឈ្មោះ​ទណ្ឌិត​ជាង ៧០០ ​នាក់​មកពី​អគ្គនាយកដ្ឋាន​ពន្ធនាគារ​ក្រសួង​មហាផ្ទៃ​ត្រូវ​បាន​គណៈកម្មការ​ថ្នាក់​ជាតិ​ដឹកនាំ​ដោយ​ក្រសួង​យុត្តិធម៌​កាលពី​ម្សិលមិញ​ចាប់ផ្តើម​ពិនិត្យ និង​វាយតម្លៃ​សម្រេច​លើក​លែង​ទោស និង​បន្ធូរបន្ថយ​ទោស​នៅក្នុង​ព្រះរាជ​ពិធីបុណ្យ​អុំទូក អក​អំបុក និង​សំពះ​ព្រះខែ​នៅ​ចុង​ខែ​វិច្ឆិកា​នេះ។

ថ្លែង​ក្នុង​ពិធី​បើក​កិច្ចប្រជុំ​ស្តីពី​ការ​លើក​លែង​ទោស និង​បន្ធូរបន្ថយ​ទោស​ទណ្ឌិត​ក្នុង​ឱកាស​ពិធី​បុណ្យ​អុំទូក​នៅ​ថ្ងៃ​ទី ៤ ខែ​វិច្ឆិកា​នេះ​រដ្ឋមន្ត្រី​ក្រសួង​យុត្តិធម៌​លោក អង្គ វង្សវឌ្ឍានា បាន​ឲ្យ​ដឹង​ថា​ក្នុង​ចំណោម​បញ្ជី​ឈ្មោះ​ទណ្ឌិត ជាង ៧០០ នាក់​មាន​ទាំង​អ្នក​ស្នើ​សុំ​លើកលែង និង​សុំ​បន្ធូរបន្ថយ​។

លោក​ថា៖ «ជា​ធម្មតា ២ ភាគ ៣ យើង​មាន​សិទ្ធិ​លើក​មក​ជជែក​តែ​មិនមែន​មាន​ន័យ​ថា​ត្រូវ​តែ​លើកលែង (ទោស) ទេ​ព្រោះ​មាន​អ្នក​ខ្លះ​បូក​ចុះ​បូក​ឡើង​ចេញ​ពី ២ ភាគ​ ៣ ក៏​សុំ​លើក​លែង​ដែរ​តែ​យើង​ធ្វើ​មិន​កើត​ហើយ​អ្នក​ខ្លះ​យើង​បន្ធូរបន្ថយ​លើក​ទី​មួយ​ហើយ​ក្រោយមក​ស្នើ​សុំ​ទៀត​ក៏​គ្រប់​ប៉ុន្តែ​ក្នុង ១ ឆ្នាំ​សម្រាប់​ទណ្ឌិត​ម្នាក់​គឺ​អាច​ធ្វើ​បាន​តែ​ម្តង​ទេ»។

លោក អង្គ វង្សវឌ្ឍានា បាន​បញ្ជាក់​ដែរ​ថា៖ «ក្នុង​ករណី​ដែល​យើង​មិន​ហ៊ាន​សម្រេច​ខ្ញុំ​នឹង​លើក​សំណើ​ ឬ​សំណូមពរ​នេះ​ទៅ​ជូន​សម្តេច​តេជោ (ហ៊ុន សែន) ដើម្បី​សម្រេច​គួរ​ធ្វើ​យ៉ាង​ម៉េច»។

អគ្គនាយក​រង​ក្រសួង​យុត្តិធម៌​លោក សុច សុផាន់ណារ៉ា បាន​ឲ្យ​ដឹង​ថា​បញ្ជី​ឈ្មោះ​ទណ្ឌិត​ទាំង​នេះ​ធ្វើ​ឡើង​តាម​ការ​ស្នើ​សុំ​របស់​ប្រធាន​ពន្ធនាគារ​ទាំង ២១ ខេត្ត​ក្រុង និង​មណ្ឌល​កែប្រែ ម ទាំង ៤ ហើយ​លក្ខខណ្ឌ​នៃ​ការ​វាយតម្លៃ​គឺ​ផ្អែកលើ​ស្ថានភាព​ជាក់ស្តែង​នៃ​ការ​កែប្រែ​របស់​ទណ្ឌិត និង​កម្រិត​នៃ​ការ​អប់រំ​ក្នុង​ពន្ធនាគារ​គួប​ផ្សំ​នឹង​ឯកសារ​បញ្ជាក់​ផ្សេងៗ។

លោក​ថា៖ «ក្រឹត្យ​លេខ ២៨ កំណត់ ២ ភាគ ៣ នៃ​ទោស​បាន​លើក​លែង​ទោស​ចំណែក ១ ​ភាគ ៣ នៃ​ទោស​គឺ​ការ​បន្ធូរបន្ថយ​ទោស​ហើយ​ការ​បន្ធូរបន្ថយ​នេះ​គឺ​មាន​ ៣ ​ទៀត​រយៈពេល ១២ ​ខែ ៩ ខែ និង​ ៦ ខែ។ ក្រោយ​ចប់​ប្រជុំ​គណៈកម្មការ​ជាតិ និង​វាយតម្លៃ​ហើយ​បូក​សរុប​របាយការណ៍ និង​ព្រះរាជក្រឹត្យ​ផ្ញើ​ថ្វាយ​ទៅ​ព្រះមហាក្សត្រ​ទត​សម្រេច​»​។

ទាក់ទិន​នឹង​ដំណើរការ​លើកលែង ទោស និង​បន្ធូរបន្ថយ​ទោស​ទណ្ឌិត​នេះ ​លោក អំ សំអាត អ្នក​គ្រប់គ្រង​បច្ចេកទេស​ស៊ើបអង្កេត​នៃ​អង្គការ​លីកាដូ​បាន​ឲ្យ​ដឹង​ថា​ភាព​មិន​ប្រក្រតី​នៃ​ការ​លើកលែង​ទោស​កន្លង​មក​ដែល​អ្នក​ទោស​បាន​ប្រាប់​លោក​ថា ​មន្ត្រី​ពន្ធនាគារ​បាន​ប្រព្រឹត្ត​អំពើ​ពុករលួយ​ចំពោះ​ការ​លើកលែង​ទោស និង​បន្ធូរបន្ថយ​ទោស​ពោល​គឺ​ទណ្ឌិត​ណា​មាន​លុយ​ទើប​មាន​ឈ្មោះ​បើ​គ្មាន​លុយ​គឺ​មិន​មាន​ឈ្មោះ​ក្នុង​បញ្ជី​ស្នើ​សុំ​នោះ​ទេ។

លោក​ថា៖ «នេះ​គឺជា​រឿង​អយុត្តិធម៌​មួយ​ព្រោះ​ថា​ការ​ស្នើសុំ​ត្រូវ​មាន​ប្រាក់​ភ្ជាប់​ជាមួយ​បើ​អ្នក​គ្មាន​លុយ​គឺ​គេ​មិន​ខ្វល់​ទេ​ហើយ​តាម​ខ្ញុំ​ដឹង​អ្នក​ទោស​ដែល​ជា​ក្រុម​ចលនា​រំដោះ​ជាតិ CFF គឺ​អត់​មាន​ការ​លើកលែង​ទោស​តែ​ម្តង​ហើយ​នីតិវិធី​នៃ​ការ​វាយតម្លៃ​ដើម្បី​ដាក់​ឈ្មោះ​ក្នុង​បញ្ជី​របស់​ប្រធាន​ពន្ធនាគារ គឺ​មិន​សុក្រឹត្យ​ចំពោះ​ទណ្ឌិត​ដែល​គ្មាន​លុយ​ឡើយ»។

តាម​របាយការណ៍​របស់​អង្គការ​សិទ្ធិ​មនុស្ស​លីកាដូ​កម្រាស់ ៤០ ទំព័រ​មាន​ចំណង​ជើង​ថា «សិទ្ធិ​នៅ​លើ​ការ​ទិញ​ដូរ​ជីវិត​ក្នុង​ពន្ធនាគារ​កម្ពុជា» ចេញ​ផ្សាយ​កាលពី​ដើម​ឆ្នាំ ២០១៥ ​នេះ​បាន​ឲ្យ​ដឹង​ថា​ការ​រំលោភ​បំពាន ការ​រើសអើង ការ​កេងប្រវ័ញ្ច​អំពើ​ពុករលួយ​ឥទ្ធិពល​នៃ​ថ្នាក់​ដឹកនាំ​ដ៏​មាន​អំណាច​ក្នុង​បន្ទប់​ឃុំឃាំង​បាន​កំពុង​កើតមាន​ឡើង និង​ជា​លក្ខណៈ​ប្រព័ន្ធ​ក្នុង​ពន្ធនាគារ​នៅ​កម្ពុជា​បើ​ទោះបី​ជា​កម្ពុជា​បាន​ចាប់ផ្តើម​ជំហាន​ក្នុង​ការ​កែទម្រង់​ក៏ដោយ​ក៏​ឧបសគ្គ​មួយ​ចំនួន​នៅ​តែ​បន្ត​កើត​មាន៕

អត្ថបទគួរចាប់អារម្មណ៍