ភ្នំពេញៈ ក្រសួងយុត្តិធម៌បានសម្រេចជ្រើសរើសទណ្ឌិត ៩០ នាក់ ក្នុងចំណោមស្នើសុំ ៥១២ នាក់ ធ្វើសំណើទៅរាជរដ្ឋាភិបាល ដើម្បីពិនិត្យ និងសម្រេចទូលថ្វាយព្រះមហាក្សត្រក្នុងការផ្តល់ការអនុគ្រោះធ្វើសំណើទៅរាជរដ្ឋាភិបាល ដើម្បីពិនិត្យ និងសម្រេចទូលថ្វាយព្រះមហាក្សត្រក្នុងការផ្តល់អនុគ្រោះ បន្ថយ និងលើកលែងទោសនៅក្នុងពិធីបុណ្យអុំទូក។
ក្រសួងយុត្ដិធម៌កាលពីថ្ងៃអង្គារម្សិលមិញបានប្រកាសថា ក្រោយកិច្ចប្រជុំគណៈកម្មការជាតិ ពិនិត្យបញ្ជីស្នើសុំបន្ធូរបន្ថយទោស និងលើកលែងទោសដល់ទណ្ឌិតក្នុងឱកាសពិធីបុណ្យអុំទូក បណ្តែតប្រទីប សំពះព្រះខែ និងអកអំបុកដែលប្រព្រឹត្តទៅនាថ្ងៃទី ១០-១២ ខែ វិចិ្ឆកា ឆ្នាំ ២០១៩ ខាងមុខនេះលើសំណើសុំអនុគ្រោះទោសដល់ទណ្ឌិតសរុប ៥១២ នាក់ (ស្រី ៥៨ នាក់) ជាលទ្ធផលអង្គប្រជុំបានសម្រេចធ្វើសំណើគោរពជូនប្រមុខរាជរដ្ឋាភិបាលដើម្បីពិនិត្យ និងសម្រេចទូលថ្វាយព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុត ក្នុងការផ្តល់ការអនុគ្រោះទោសដល់ទណ្ឌិតសរុប ៩០ នាក់ (ស្រី ១៧ នាក់)។
ក្រសួងបញ្ជាក់ថា ការផ្តល់ការអនុគ្រោះទោសដល់ទណ្ឌិតសរុប ៩០ នាក់ (ស្រី ១៧ នាក់) នេះ រួមមានបន្ថយទោស ៦ ខែចំនួន ៥៨ នាក់ (ស្រី ១៣ នាក់,បន្ថយទោស ៩ ខែចំនួន ១៤ នាក់ (ស្រី ១ នាក់), បន្ថយទោស ១២ ខែចំនួន ៨ នាក់ (ស្រី ១ នាក់) និងលើកលែងទោសចំនួន ១០ នាក់ (ស្រី ២ នាក់)។
លោក គឹម សន្តិភាព អ្នកនាំពាក្យក្រសួងយុត្តិធម៌បានថ្លែងកាលពីម្សិលមិញថា មូលហេតុដែលគណៈកម្មការជាតិពិនិត្យបញ្ជីស្នើសុំបន្ធូរបន្ថយទោស និងលើកលែងទោសដល់ទណ្ឌិតសម្រេចអនុគ្រោះទោសដល់ទណ្ឌិតតែចំនួន ៩០ នាក់ ក្នុងចំណោម ៥១២ នាក់នេះ ព្រោះគណៈកម្មការបានដកចេញទណ្ឌិតដែលជាប់ពាក់ព័ន្ធនឹងបទល្មើសគ្រឿងញៀនបទល្មើសដែលមានចរិតព្រៃផ្សៃ បង្កបញ្ហាដល់ជនរងគ្រោះ និងសង្គមធ្ងន់ធ្ងរចេញ។
លោកថ្លែងថា៖ «ទណ្ឌិតដែលប្រព្រឹត្ដបទល្មើសគ្រឿងញៀន និងទណ្ឌិតដែលប្រព្រឹត្ដបទល្មើសមានចរិតព្រៃផ្សៃដល់ជនរងគ្រោះ និងសង្គមធ្ងន់ធ្ងរ យើងបានដកពួកគាត់ចេញមិនយកមកពិចារណាក្នុងការអនុគ្រោះ ឬលើកលែងទោសនោះទេ។ ក៏មានទណ្ឌិតមួយចំនួនទៀតដែលបានស្នើសុំ ឯកសាររបស់ពួកគាត់មិនបានគ្រប់គ្រាន់ក៏យើងបានពិនិត្យដកចេញដែរ»។
លោកបានឲ្យដឹងថា លក្ខខណ្ឌសម្រាប់ទណ្ឌិតដែលអាចទទួលបានការអនុគ្រោះទោសក្នុងប្រភេទបន្ធូរបន្ថយទោសលុះណាតែទណ្ឌិតនោះទទួលបានការអប់រំកែប្រែខ្លួនបានល្អរួចហើយ និងទទួលបានការអនុវត្ដទោសយ៉ាងតិច ១ ភាគ ៣ នៅក្នុងពន្ធនាគារនោះទើបអាចពិនិត្យផ្ដល់នូវភាពអនុគ្រោះបន្ធូរបន្ថយទោសបាន។ ប៉ុន្ដែនៅក្នុងលក្ខខណ្ឌលើកលែងទោសលុះណាតែទណ្ឌិតនោះបានអនុវត្ដទោសក្នុងពន្ធនាគារយ៉ាងតិច ២ ភាគ ៣ នៃទោសដែលបានកំណត់ដោយសាលក្រម ឬសាលដីកាស្ថាពរ។
លោក គឹម សន្ដិភាព បានឲ្យដឹងថាចំនួនទណ្ឌិតដែលបានអនុគ្រោះ បន្ធូរបន្ថយ និងលើកលែងទោសក្នុងពិធីបុណ្យអុំទូកឆ្នាំនេះមានចំនួនប្រហាក់ប្រហែលទៅនឹងឆ្នាំ ២០១៨ ដែរ។
លោកមេធាវី សុក សំអឿន ប្រធានអង្គការក្រុមប្រឹក្សាជំនួយផ្នែកច្បាប់ គាំទ្រចំពោះការបង្កើតឲ្យមានការបន្ធូរបន្ថយទោស និងលើកលែងទោសដល់ទណ្ឌិតបែបនេះ ។ លោកយល់ឃើញថា ការអនុវត្ដបែបនេះគឺជាការលើកទឹកចិត្តមួយដើម្បីឲ្យទណ្ឌិតប្រឹងប្រែងកែប្រែខ្លួននៅក្នុងពន្ធនាគារ ។
លោកថ្លែងថា៖ «ប្រព័ន្ធអនុគ្រោះបែបនេះគួរតែមានព្រោះកាលណាមានប្រព័ន្ធបែបនេះដោយធ្វើឡើងដោយយុត្ដិធម៌ តម្លាភាពវាជារឿងមួយដែលបានធ្វើឲ្យមានការលើកទឹកចិត្ដចំពោះទណ្ឌិតដែលនៅក្នុងពន្ធនាគារឲ្យមានការខិតខំប្រឹងប្រែងកែប្រែខ្លួនឲ្យល្អឡើងវិញជាមួយក្ដីសង្ឃឹមថានឹងទទួលបានការលើកលែងទោសពីព្រះមហាក្សត្រ» ៕