ព្រះសីហនុៈ មន្ត្រីយោធា ៤ នាក់ និងស្ត្រីម្នាក់ ដែលឈរជើងការពារដែនកោះរ៉ុងសន្លឹមលេខ ៤ ក្នុងក្រុងព្រះសីហនុ ត្រូវបានបញ្ជូនទៅសង្គ្រោះបន្ទាន់ភ្លាមៗ នៅមន្ទីរពេទ្យបង្អែកខេត្ត បន្ទាប់ពីមានអាការក្អួតចង្អោរ និងសន្លប់ ក្រោយពីបរិភោគផ្សិតពុល។
នាយផ្នែកការពារគោលដៅនៃការិយាល័យនគរបាលអន្តោប្រវេសន៍ ដែលឈរជើងលើភូមិ ២៣ នៃកោះរ៉ុងសន្លឹម លោក ប៉ាត់ មុន្នីរត្ន ដែលបានចុះអន្តរាគមន៍ជួយជនរងគ្រោះឲ្យដឹងថា ហេតុការណ៍នេះ បានកើតឡើងនៅម៉ោង ជាង ១ រសៀលថ្ងៃទី ២៨ ខែមេសា ហើយជនរងគ្រោះ ត្រូវបានបញ្ជូនទៅកាន់ពេទ្យចំការចេក ដែលជាពេទ្យបង្អែកខេត្ត ដើម្បីព្យាបាលភ្លាមៗ។
លោកថា៖ «ក្នុងចំណោមជនរងគ្រោះទាំង ៥ នាក់នោះ មានពីរនាក់ មានសភាពធ្ងន់ធ្ងរសន្លប់ស្តូកស្តឹង ដែលត្រូវបានបញ្ជូនទៅក្នុងបន្ទប់សង្គ្រោះបន្ទាន់»។
តាមកំណត់ហេតុរបស់សមត្ថកិច្ច មន្ត្រីយោធាទាំង ៤ នាក់នោះ មានឈ្មោះ សូ ចិន្ថា អាយុ ៤៧ ឆ្នាំ មានអាការពុលធ្ងន់ធ្ងរ, ម៉ៅ ម៉ាច អាយុ ៣៥ ឆ្នាំ, សោម ចាន់រ៉ាឌី អាយុ ៣៥ ឆ្នាំ និងលោក គឹម សុភ័ក្រ អាយុ ៤៦ ឆ្នាំ ចំណែកប្រពន្ធរបស់លោក សោម ចាន់រ៉ាឌី ឈ្មោះ សេង សាម៉ន អាយុ ៣២ ឆ្នាំ ពុលធ្ងន់ធ្ងរ។
ក្នុងកំណត់ហេតុនោះ លោក សោម ចាន់រ៉ាឌី បានរៀបរាប់ថា នៅព្រឹកថ្ងៃកើតហេតុនោះ លោក និងទាហានមួយចំនួនបានដើរដកផ្សិតជាច្រើនប្រភេទនៅលើភ្នំ និងយកមកឆាជាមួយសាច់ជ្រូក សម្រាប់អាហារថ្ងៃត្រង់ និងសម្រាប់ក្លែមស្រា ដោយរូបលោកជាអ្នកចម្អិន។ ក្រោយមកបន្ទាប់ពីចាប់ផ្តើមហូបបានប្រមាណកន្លះម៉ោង ក៏ស្រាប់តែពួកគាត់ មានអាការឈឺក្បាល វិលមុខ ខ្លះក្អួតចង្អោរ និងខ្លះពុលធ្ងន់ធ្ងរដល់សន្លប់ ទើបត្រូវបានមន្ត្រីយោធាផ្សេងទៀតជួយដឹកតាមទូក និងបញ្ជូនមកកាន់មន្ទីរពេទ្យសង្គ្រោះតែម្តង។ លោកថា៖ «ការហូបផ្សិតបែបនេះ មិនមែនទើបតែហូបជាលើកទី ១ នោះទេ គឺហូបរយៈពេល ២ ទៅ ៣ ថ្ងៃរួចមកហើយ ប៉ុន្តែមិនមានអាការបែបនេះទេ»។
ប្រធានមន្ទីរពេទ្យបង្អែកខេត្តព្រះសីហនុ លោក សេង ណុង បានឲ្យដឹងថា ជនរងគ្រោះទាំងនោះ មានខ្លះពិតជាមានអាការធ្ងន់ធ្ងររហូតដល់សន្លប់ តែត្រូវបានក្រុមគ្រូពេទ្យ ជួយព្យាបាលភ្លាមៗទាន់ពេល។
លោកថា៖ «ពួកគាត់ក្អួតអស់ពីខ្លួន មិនមានសល់សំណាកសម្រាប់ការស្រាវជ្រាវនោះទេ ម្យ៉ាងពេទ្យខេត្ត មិនមានឡាបូ សម្រាប់ធ្វើតេស្តឡើយ។ យើងអាចសន្មតបានថា ពួកគាត់ពុលដោយសារផ្សិត»៕
