The Phnom Penh Post Search

Search form




Logo of Phnom Penh Post newspaper Phnom Penh Post - ទាហាន​ថៃ ​បាញ់​ខ្មែរ​ស្លាប់ ​៣ ​នាក់​ទៀត​ហើយ

ទាហាន​ថៃ ​បាញ់​ខ្មែរ​ស្លាប់ ​៣ ​នាក់​ទៀត​ហើយ

ពលរដ្ឋ​ខ្មែរ​ក្នុង​ខេត្ត​ឧត្តរមានជ័យ ចូល​ទៅ​កាប់​ឈើ​នៅ​ថៃ ពី​ឆ្នាំ​មុន។
ពលរដ្ឋ​ខ្មែរ​ក្នុង​ខេត្ត​ឧត្តរមានជ័យ ចូល​ទៅ​កាប់​ឈើ​នៅ​ថៃ ពី​ឆ្នាំ​មុន។ ហេង ជីវ័ន

ទាហាន​ថៃ ​បាញ់​ខ្មែរ​ស្លាប់ ​៣ ​នាក់​ទៀត​ហើយ

ព្រះវិហារៈ ពលរដ្ឋ​ខ្មែរ​ ៣ ​នាក់ ទៀត​បាន​ស្លាប់ និង​ម្នាក់​ទៀត​រងរបួស​ធ្ងន់​ដោយសារ​ទាហាន​ថៃ​បាញ់​កាលពី​សប្តាហ៍​មុន នៅ​តាម​ច្រក​ដំណាក់ទឹក ក្នុង​ភូមិសាស្ត្រ​អាន​សេះ ស្រុក​ជាំក្សាន្ត ខណៈ​ពួកគេ លួច​ឆ្លងដែន​ខុសច្បាប់ ចូល​ទៅក្នុង​ទឹកដី​ថៃ ដើម្បី​កាប់​ឈើ​គ្រញូង​។

យោងតាម​ការ​ចុះផ្សាយ​របស់​អគ្គស្នងការ​នគរបាល​ជាតិ ចុះ​ផ្សាយ​កាលពី​ថ្ងៃ​ទី ១០ ខែ​កុម្ភៈ ដោយ ដកស្រង់​សម្តី​ប្រធាន​នាយកដ្ឋាន​កណ្តាល​ព្រំដែន ក្រសួង​មហាផ្ទៃ លោក ហ៊ូ សាគុណ ផ្អែកលើ​សម្តី​របស់​ជនរងគ្រោះ ដែល​រងរបួស​ធ្ងន់ និង​គេច​ខ្លួន​រួច​នោះ បាន​ឲ្យ​ដឹង​ថា កាលពី​ថ្ងៃ​ទី​៣​ខែ​កុម្ភៈ ពួកគេ​មួយ​ក្រុម​មាន​គ្នា ​៤ ​នាក់ បាន​ឆ្លងដែន​ទៅ​ប្រទេស​ថៃ ដើម្បី​កាប់​ឈើ​គ្រញូង នៅ​ភូមិសាស្ត្រ​ស្រុក​ណាំយឺន​ខេត្ត​អ៊ូប៊ុន​ក្រោយមក​នៅ​ថ្ងៃ​ទី​ ៥ ខែ​កុម្ភៈ ត្រូវ​បាន​ទាហាន​ថៃ​ប្រទះ​ឃើញ រួច​បាន​បាញ់​ទៅលើ​ពួកគេ ក្នុង​នោះ​បាន​បណ្តាល​ឲ្យ​ពលរដ្ឋ​កម្ពុជា ៣​នាក់​ស្លាប់ និង​ម្នាក់​ទៀត​រងរបួស​ធ្ងន់។

លោក ហ៊ូ សាគុណ​ បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា សាកសព​ទាំងនោះ គណៈកម្មាធិការ​ព្រំដែន​នៅ​ច្រកអាន​សេះ រួមទាំង​ក្រុម​គ្រួសារ​ជនរងគ្រោះ​ដែល​បាន​ស្លាប់​នោះ​កំពុង​ធ្វើ​លិខិត​ស្នើ​សុំ​សាកសព​ពី​ភាគី​ថៃ ដើម្បី​យក​មក​ធ្វើ​បុណ្យ​តាម​ប្រពៃណី៖ «ខាង​ទំនាក់ទំនង​ព្រំដែន បាន​បម្រុង​នឹង​ស្នើ​សុំ​ទៅ​ភាគី​ថៃ​ហើយ»​។

បើ​តាម​លោក ឈិន ស្នា ប្រធាន​ក្រុម​ការងារ​ទំនាក់ទំនង​ខ្មែរ ថៃ ច្រក​អាន​សេះ​បាន​ឲ្យ​ដឹង​ថា ពួកគេ ពិតជា​បាន​លួច​ចូល​តាម​ច្រកអាន​សេះ​នេះ​ពិតមែន ប៉ុន្តែ​ហេតុការណ៍​បាញ់​សម្លាប់​នោះ គឺ​បាន​កើត​ឡើង​នៅ​ស្រុក​ណាំឃុន ខេត្ត​ស៊ីសាកេត​ប្រទេស​ថៃ ចំណែក​សេចក្តី​រាយការណ៍​រឿង​នេះ គឺ​សមត្ថកិច្ច​ទើប​ទទួល​បាន​ថ្មីៗ​នេះ ព្រោះ​ជនរងគ្រោះ​ដែល​រងរបួស​ធ្ងន់ និង​គេច​រួច​នោះ ទើប​រាយការណ៍​ដល់​សមត្ថកិច្ច​។

លោក​ថា​៖ «ខ្ញុំ​ឈរ​ជើង​នៅ​ច្រក​អានសេះ​នេះ ២៤​ម៉ោង តែ​មិន​បាន​ដឹង​រឿង​នេះ​ភ្លាមៗ​ទេ ដោយសារ​វា​កើតឡើង​នៅ​ខេត្ត​ស៊ីសាកេត​ហើយ​មក​ទល់​ពេល​នេះ សាកសព​អាច​នឹង​រលួយ​អស់​ហើយ តែ​ប្រហែល​ជា​នឹង​មាន​ក្រុម​ការងារ​ស្នើសុំ​យក​សព​នោះ​មក​វិញ​»។

លោក ជា គឹមសេង អភិបាល​ស្រុក​ជាំក្សាន្ត បាន​ថ្លែង​កាលពី​ម្សិលមិញ​ថា ជនរងគ្រោះ បាន​រាយការណ៍​ព័ត៌មាន​នេះ​ទៅកាន់​ទីភ្នាក់ងារ​ព័ត៌មាន​មិន​បាន​រាយការណ៍​មក​អាជ្ញាធរ ឲ្យ​បាន​ដឹង​ជា​មុន​នោះ​ទេ។

តាម​របាយការណ៍​របស់​ប៉ូលិស បុរស​ទាំង​៣​នាក់ ដែល​ទាហាន​ថៃ​បាញ់​ស្លាប់ រួមមាន​ឈ្មោះ គឹត យ៉េត អាយុ ​៣៤ ​ឆ្នាំ មកពី​ខេត្ត​ព្រះវិហារ កឿ រីណា អាយុ ៣៤​ឆ្នាំ មកពី​ខេត្ត​កំពង់ស្ពឺ និង​ឈ្មោះ ថា អាយុ ៣២​ឆ្នាំ មកពី​ខេត្ត​កំពត​។ ចំណែក បុរស​ដែល​របួស​ធ្ងន់​នោះ ឈ្មោះ កូវ បៀ អាយុ ៣៣​ឆ្នាំ រស់​នៅ​ខេត្ត​ព្រះវិហារ បច្ចុប្បន្ន ត្រូវ​បាន​ក្រុម​គ្រួសារ​យក​ទៅ​ព្យាបាល​នៅ​មន្ទីរពេទ្យ​ខេត្ត​សៀមរាប។

ភ្នំពេញ​ប៉ុស្តិ៍​មិន​អាច​សុំ​ការ​បំភ្លឺ​ពី​ជនរងគ្រោះ កូវ បៀ ឬ​ក្រុម​គ្រួសារ​បាន​ទេ​។ អ្នក​នាំពាក្យ​ក្រសួង​ការបរទេស លោក កុយ គួង បាន​ឲ្យ​ដឹង​ថា លោក​បាន​ឮព័ត៌មាន​នេះ​ហើយ​កំពុង​ទំនាក់ទំនង​ជាមួយ​កុងស៊ុល​កម្ពុជា ប្រចាំ​ប្រទេស​ថៃ ដើម្បី​បញ្ជាក់​ពី​ការពិត និង​សិក្សា​ពី​ដើមហេតុ​នៃ​រឿង​នេះ មុន​នឹង​ពិចារណា​លើ​វិធានការ​ផ្លូវច្បាប់ ដែល​នឹង​ត្រូវ​ធ្វើ​ឡើង​។

លោក​ថា៖ «យើង​ត្រូវ​ពិនិត្យ​មើល​ដើមហេតុ​សិន​ថា​តើ​កើតឡើង​ដោយ​របៀប​ណា ព្រោះ​ពាក្យ​ថា បាញ់​ស្លាប់ ពេល​ខ្លះ មិនមែន​ជា​កំហុស​អ្នក​បាញ់​ទាំង​ស្រុង​ទេ កន្លងមក​អ្នក​បាញ់ គេ​តែង​និយាយ​ថា គេ​បាញ់​ដើម្បី​ការពារ​ខ្លួន​គេ​ដែរ បើ​គេ​និយាយ​អ៊ីចឹង អាច​មាន​ន័យ​ថា ជនរងគ្រោះ​អាច​មាន​អាវុធ បាន​គេ​បាញ់​ការពារ​ខ្លួន»។

មន្ក្រី​សម្របសម្រួល​សមាគម​ការពារ​សិទ្ធិមនុស្ស​អាដហុក​ប្រចាំ​ខេត្ត​ព្រះវិហារ លោក ឡោ ចាន់ បាន​ដឹង​ថា ចរាចរ​ទិញ លក់​ឈើ​ប្រណីត​នៅ​តែ​បន្ត​កើត​មាន​ជាហូរហែ ដែល​ជា​កត្តា​នាំឲ្យ​ពលរដ្ឋ​ខ្មែរ ហ៊ាន​ប្រឈម​គ្រោះថ្នាក់ លួច​ចូល​ទៅ​ថៃ ដើម្បី​កាប់​ឈើ​លក់​។ «ពេល​ខ្លះ​អ្នក​ដែល​ចូល​ទៅ​នោះ អាច​មាន​សំណាង​ត្រឡប់​មក​វិញ​លក់​ឈើ​ល្អ​បាន​ប្រាក់​ច្រើន តែ​ខ្លះ​ទៀត ត្រូវ​ក្រុម​ទាហាន​ថៃ​ឈុតខ្មៅ ឲ្យ​តែ​ឃើញ​គឺ​បាញ់​សម្លាប់​តែ​ម្តង​»។

ក្នុង​កិច្ចប្រជុំ​គណៈកម្មការ​ចម្រុះ​ស្តីពី​កិច្ចសហប្រតិបត្តិការ​ទ្វេភាគី​កម្ពុជា ថៃ​លើក​ទី​៩​កាលពី​ថ្ងៃ​ទី ៦ ខែ​មករា​ភាគី​ថៃ​បាន​យល់ព្រម​ជាថ្មី​ទៀត​ឈប់​ប្រើ​អាវុធ​បាញ់ប្រហារ​ពលរដ្ឋ​ខ្មែរ ប៉ុន្តែ​ការ​សន្យា​នេះ​គេ​មិន​ឃើញ​ភាគី​ថៃ​យក​ទៅ​អនុវត្ត​ទេ​៕

អត្ថបទគួរចាប់អារម្មណ៍