The Phnom Penh Post Search

Search form




Logo of Phnom Penh Post newspaper Phnom Penh Post - ទាហាន​​ថៃ ​បាញ់​ពល​រដ្ឋ​ខ្មែរ​លួច​ចូលកាប់ឈើ ៤ នាក់​

ទាហាន​​ថៃ ​បាញ់​ពល​រដ្ឋ​ខ្មែរ​លួច​ចូលកាប់ឈើ ៤ នាក់​

Content image - Phnom Penh Post
ពលរដ្ឋ​ខ្មែរ​ក្នុង​ខេត្ត​ឧត្តរមានជ័យ​លួច​ឆ្លង​ដែន​ចូលទៅ​កាប់ឈើ​នៅ​ទឹកដី​ថៃកាល​ពីឆ្នាំមុន​។ ហេង ជីវ័ន

ទាហាន​​ថៃ ​បាញ់​ពល​រដ្ឋ​ខ្មែរ​លួច​ចូលកាប់ឈើ ៤ នាក់​

ឧត្តរមានជ័យៈ ពលរដ្ឋ​ខ្មែរ ៤ នាក់ ត្រូវបាន​ក្រុម​ទាហាន​ល្បាតថៃ​ បាញ់​ចំជាច្រើនគ្រាប់ បណ្តាល​ឲ្យរងរបួស​ធ្ងន់​និង​ស្រាល ក្នុងគ្រា​ដែល​ពួក​គេ លួច​ឆ្លង​ដែន​ខុសច្បាប់ ចូលទៅកាប់​ឈើ​គ្រញូង ក្នុងភូមិសាស្រ្ដ​ខេត្ដ​ស៊ីសាកេត ប្រទេស​ថៃ​ កាល​ពី​ថ្ងៃ​ពុធ។

ក្នុង​ចំណោម​អ្នកទាំង ៤ នាក់​នោះ ជនរងគ្រោះ ដែល​រង​របួសស្រាល​ ពីរនាក់ បាន​រត់​គេចខ្លួនបាត់ ចំណែក​ពីរ​នាក់​ទៀត ដែលរងរបួស​ធ្ងន់ មាន​ឈ្មោះ ឌន វី ភេទ​ប្រុស អាយុ ២០ ឆ្នាំ និង​ឈ្មោះ កាក់ សំណី ភេទ​ប្រុស អាយុ ២១ ឆ្នាំ រស់​នៅ​ភូមិ​សាមគ្គី ឃុំ​ត្រពាំង​ប្រីយ៍ ស្រុកអន្លង់វែង ខេត្ដ​ឧត្ដរ​មាន​ជ័យ ហើយ​អ្នក​ទាំងពីរ គឺជា​បងប្អូនថ្លៃហ្នឹង​គ្នា។

នេះ​បើតាម​ជនរងគ្រោះ កាក់ សំណី បាន​ឲ្យ​ដឹង​កាល​ពី​ម្សិល​មិញ ខណៈ​កំពុងទទួលការព្យាបាល​ ​របួស ក្នុង​មន្ទីរពេទ្យ​បង្អែក ​ស្រុក​អន្លង់វែង។សំណី បាន​ឲ្យ​ដឹងថា ពួកគេ​ទាំង ៤ នាក់ បាន​លួច​ឆ្លងដែន​ចូល​ទឹកដី​ថៃ កាលពី​ថ្ងៃទី ២ ខែវិច្ឆិកា តាម​ភូមិសាស្រ្ដច្រក​តា​ទុំ ចំណុច​គា​ម រមាស ស្រុក​អន្លង់វែង ដែល​ឈម​នឹង​ស្រុកភូស៊ីង ខេត្ត​ស៊ីសាកេត ដើម្បី​កាប់​ឈើ​គ្រញូង យក​មក​លក់ គ្រាន់បាន​ប្រាក់​ចិញ្ចឹម​គ្រួសារ។

ជនរងគ្រោះ បន្ដថា ក្រោយ​ធ្វើ​សកម្មភាព​កាប់​ឈើ និង​កំពុង​ចង​ជាបណ្តុំ ដើម្បី​លី​ត្រឡប់​មកផ្ទះ​វិញ ស្រាប់តែ​ទាហាន​ថៃ​មួយក្រុម បានបង្ហាញ​ខ្លួន ចម្ងាយ​ប្រមាណ ៤ ទៅ ៥ ម៉ែត្រ ពីក្រុម​ពួកគេ និង​បាន​និយាយ​ភាសា​ថៃពី ពីរ​ទៅបីម៉ាត់ ហើយ​​ដក​កាំភ្លើង​បាញ់​តែ​ម្ដង។​

សំណីនិយាយថា៖«យើងបាន​ស្រែកកុំ​ឲ្យ​បាញ់ តែទាហានទាំងនោះ នៅតែ​បាញ់ ហើយ​ពួកយើង​ក៏រត់ពេញ​ព្រៃ​ ដើម្បី​ស្វែងរក​អ្នកជួយពួកខ្ញុំ គ្រាន់តែគិតថា លួច​ឈើ​ខ្លះ​យកមក​លក់បានប្រាក់ ២ ទៅ ៣ ម៉ឺនចា​យ​​ប៉ុណ្ណោះ តែ​មាន​រឿង​បែបនេះ គឺពួកយើង លែង​ហ៊ាន​ទៀត​ហើយ​»។

អនុ​ប្រធាន​មន្ទីរ​ពេទ្យ​បង្អែក​ស្រុក​អន្លង់វែង លោក នៅ សំអ​ន បាន​ឲ្យ​ដឹងថា ជន​រង​គ្រោះ​ឈ្មោះ ឌន វី ត្រូវរបួស​ត្រង់​កំភួន​ជើង​ស្តាំ ដៃ​ឆ្វេង និង​ដៃ​ស្តាំ ចំណែក សំណី ត្រូវរបួស​ត្រង់​កំភួនជើង​ឆ្វេង និង​ដៃ​ឆ្វេងស្តាំ។

លោក​ថា៖ «ដោយ​សារ​តែ​គ្រាប់កាំភ្លើង ដែល​ទាហានថៃ បាន​បាញ់​នោះត្រូវ​ធ្លាយសាច់ និង​មិនមានអំបែង​ជាប់​ក្នុង​សាច់ ទើប​មិនបាន​បង្កឲ្យ ​មានបញ្ហា​ធ្ងន់ធ្ងរ​នោះទេ។ ក្រោយពី​ទទួល​ការព្យាបាលពី​ខាង​ពេទ្យ​​ជំនាញស្ថានភាព​សុខភាព​របស់​អ្នក​ទាំងពីរ គឺ​បាន​ប្រសើរ​ឡើង​វិញ​ហើយ។

មេបញ្ជា​ការ​វរព្រំដែន​លេខ ៩០៥ លោក ស៊ុំ សារឿន ដែល​ទទួលបន្ទុក​ត្រួតពិនិត្យ​តំបន់​ព្រំដែន​នេះ មិនអាចសុំ​ការឆ្លើ​យ​​តប​បានទេ​កាលពី​ម្សិលមិញ ចំណែក​មន្ត្រី​គ្រប់​គ្រង​ព្រំដែន​មួយចំនួន អះអាង​ថា​ មិនបាន​ដឹងពី​​រឿងនេះ​ទេ។

យ៉ាង​ណា​ក៏​ដោយ ប្រធាន​ក្រុមការងារ​ទំនាក់ទំនង​ព្រំដែន​កម្ពុជាថៃ ប្រចាំ​ច្រកអន្ដរជាតិ​ជាំ​សា​ង៉ាំ ខេត្តឧត្ដរ​មានជ័យ លោក តូច រ៉ា ឲ្យ​ដឹងថា បញ្ហា​ទាហានថៃ​​បាញ់​ពលរដ្ឋ​ខ្មែរ ឆ្លងដែន​ខុសច្បាប់​នេះ គឺ​ពិបាក​ក្នុងការ​គ្រប់គ្រង ដោយ​សារតែអ្នកខ្លះ ក្រោយ​កើត​ហេតុ ជន​រង​គ្រោះខ្លះ​ រត់គេចខ្លួនបាត់ ហើយ​ខ្លះ មិនត្រូវ​បាន​អាជ្ញាធរ​មូលដ្ឋានរាយ​ការណ៍​មក​នោះ​ទេ។

លោក​ថា៖«ខាងសមត្ថកិច្ច​ខ្មែរ បើ​ចាប់​អត់​បាន គឺ​អត់រាយការណ៍ ចំណែក​អាជ្ញាធរ​ថៃ បើ​បាញ់​អ៊ីចឹង គឺអត់​រាយ​ការណ៍​មក​នោះទេ.ករណី​បាញ់​អ្នក​ឆ្លងដែនកាប់​ឈើ​ខុស​ច្បាប់ កើត​ឡើងពី ២ ទៅ ៣ ករណី ក្នុង ១ ខែ តែ​គ្រាន់តែ​រង​របួស មិន​ដល់​ស្លាប់ដូចមុនៗទេ»។

ក្នុង​កិច្ច​ប្រជុំ​កាលពី​ចុងខែ​សីហា ឆ្នាំ ២០១៥ រវាង​លោក​ឧបនាយក​រដ្ឋមន្ត្រី ស​ ខេង រដ្ឋមន្ត្រី​ក្រសួងមហាផ្ទៃ​កម្ពុជា ជាមួយ​នឹង​លោក Anupong Paochinda រដ្ឋមន្ត្រី​ក្រសួង​មហាផ្ទៃ​ថៃ អាជ្ញាធរ​កម្ពុជា និង​ថៃ បាន​យល់ព្រម​បន្ធូរបន្ថយ​ក្នុង​ការ​ប្រើ​ប្រាស់​អំពើហិង្សា ប្រ​ឆាំ​ងនឹង​អ្នក​ឆ្ល​ងដែនខុស​ច្បាប់​ ចូលក្នុង​ប្រទេស​ទាំងពីរ ប៉ុន្តែ​ភាគី​ថៃ មិនបាន​សន្យា បញ្ឈ​ប់​ការ​បាញ់​ប្រហារ​ មក​លើពលរដ្ឋ​កម្ពុជា​ដែលលួចឆ្លង​ដែន​ខុស​ច្បាប់​នោះ​ទេ។

របាយការណ៍​របស់​ក្រសួង​មហា​ផ្ទៃចេញ​ ​កាលពី​ខែ​សីហា ឆ្នាំ ២០១៥ បាន​ឲ្យ​ដឹងថា មាន​អ្នកកាប់​ឈើ​ខុសច្បាប់​កម្ពុជាយ៉ាងហោ​ច​ណាស់​ ៥ នាក់​ត្រូវ​បាន​សមត្ថកិច្ច រាយ​ការណ៍ថា ត្រូវ​បាន​​អាជ្ញាធរ​ថៃ បាញ់​ស្លាប់ នៅក្នុងអំឡុ​ង​ឆមាស​ទី ១ ឆ្នាំ ២០១៥ នេះ​៕

អត្ថបទគួរចាប់អារម្មណ៍