The Phnom Penh Post Search

Search form




Logo of Phnom Penh Post newspaper Phnom Penh Post - ទាហាន កម្ពុជា-ថៃ ប៉ះ​ទង្គិច​គ្នា​មួយ​ប្រាវ

ទាហាន កម្ពុជា-ថៃ ប៉ះ​ទង្គិច​គ្នា​មួយ​ប្រាវ

ទាហាន កម្ពុជា-ថៃ ប៉ះ​ទង្គិច​គ្នា​មួយ​ប្រាវ

កោះកុងៈ កងទ័ព​កម្ពុជា​និង​ថៃ នៅ​ព្រំដែន​ខេត្ត កោះកុង បាន​ប៉ះ​ទង្គិច​គ្នា​មួយ​ប្រាវ កាល​ពី​ថ្ងៃ​សៅរ៍ ខណៈ​ពួក​គេ​កំពុង​ល្បាត នៅ​តាម​ខ្សែ​ព្រំដែន​រួម។

លោក​វរសេនីយ៍​ត្រី អុន ម៉ាណាប មេ​បញ្ជាការ​រង​នៃ​កង​វរសេនា​តូច​ថ្មើរ​ជើង​លេខ ៣០៣ ដែល​មាន​មូលដ្ឋាន​នៅ​ព្រំដែន​ក្នុង​ស្រុក ថ្មបាំង បាន​ថ្លែង​ថា ការ​ប៉ះ​ទង្គិច​គ្នា​រវាង​កង​កម្លាំង​របស់​លោក និង​ទាហាន ថៃ បាន​កើត​ឡើង​នៅ​វេលា​ម៉ោង​ប្រហែល ១១:៣០ ថ្ងៃ​ត្រង់ ខណៈ​ក្រុម​កងទ័ព​ឯក​សណ្ឋាន​ឈុត​ខ្មៅ​របស់​ថៃ កំពុង​ល្បាត នៅ​ខាង កម្ពុជា ហើយ​ពួក​គេ​ឲ្យ​ទាហាន កម្ពុជា ថយ​ក្រោយ ប៉ុន្តែ​ទាហាន​កម្ពុជា​មិន​ព្រម បន្ទាប់​មក​ពួក​គេ​បាន​បើក​ការ​បាញ់​រះ​មក​លើ​ទាហាន កម្ពុជា។ លោក អុន ម៉ាណាប បាន​ប្រាប់ ភ្នំពេញ ប៉ុស្តិ៍ ថា៖ «យើង​បាន​បាញ់​គ្នា​ទៅ​វិញ​ទៅ​មក​អស់​រយៈ​ប្រហែល ២០ នាទី»។ «ទាហាន​របស់​យើង​មិន​អី​ទេ ប៉ុន្តែ​ទាហាន​ថៃ​ម្នាក់​ត្រូវ​របួស​ត្រង់​ជើង»។ លោក​ឲ្យ​ដឹង​ទៀត​ថា ស្ថានការណ៍​មាន​លក្ខណៈ​តានតឹង​នៅ​តាម​ព្រំដែន​ដែល​មាន​ការ​ប៉ះ​ទង្គិច​គ្នា​នោះ ហើយ​ច្រក​របៀង​មួយ​ចំនួន ដែល​ប្រជាជន​ធ្លាប់​ចេញ​ចូល ត្រូវ​បាន​បិទ​ចាប់​តាំង​ពី​ការ​ប៉ះ​ទង្គិច​គ្នា​នោះ​មក។

លោក​ថ្លែង​ថា ឧប្បត្តិហេតុ​ដែល​បាន​កើត​ឡើង​នេះ គឺជា​លើក​ទី​បួន​ហើយ​ដែល​ទាហាន​ថៃ​ប៉ុនប៉ង​ឆ្លង​ចូល​មក​ខាង កម្ពុជា ហើយ​ពេល​ខ្លះ​ពួក​គេ​អះអាង​ថា វង្វេង​ផ្លូវ​បន្ទាប់​មក​មេ​បញ្ជាការ​មក​សម្រុះ​សម្រួល​បញ្ចប់​ករណី​នោះ។

ទោះ​យ៉ាង​ណា​ក្តី មេ​បញ្ជាការ​យោធា​ភូមិ​ភាគ ៣ និង​មេ​បញ្ជាការ​ក្នុង​ខេត្ត កោះកុង បាន​ធ្វើ​ដំណើរ​ទៅ​ខេត្ត ត្រាត ដើម្បី​ចរចា​ជាមួយ​ខាង ថៃ ហើយ​លទ្ធផល​មិន​ទាន់​បាន​ប្រកាស​នៅ​ឡើយ​ទេ។

លោក កុយ សារឿន មេ​បញ្ជាការ​នគរបាល​ថ្មើរ​ជើង​ព្រំដែន​លេខ ៨២៥ ក្នុង​ស្រុក វាលវែង ខេត្ត ពោធិ៍សាត់ ដែល​មាន​ព្រំដែន​ជាប់​នឹង​កន្លែង​ប៉ះ​ទង្គិច​គ្នា​ក៏​បាន​ថ្លែង​ផង​ដែរ​ថា ច្រក​ព្រំដែន​ដែល​ប្រជាជន​ធ្លាប់​ចេញ​ចូល​ដើម្បី​ទិញ​របស់​របរ​ម្ហូប​អាហារ​ជា​រៀងរាល់​ថ្ងៃ​សៅរ៍​និង​អាទិត្យ​ក៏​ត្រូវ​បាន​បិទ​ផង​ដែរ ចាប់​តាំង​ពី​ការ​ប៉ះ​ទង្គិច​គ្នា​នោះ​។ លោក​បន្ត​ថា៖ «ស្ថានភាព​នៅ​តំបន់​របស់​ខ្ញុំ​គឺ​ធម្មតា​ទេ ប៉ុន្តែ​អ្វី​ដែល​សំខាន់​គឺ​លទ្ធផល​ពី​កិច្ច​ប្រជុំ​ដែល​យើង​នឹង​ដឹង នៅ​ថ្ងៃ​ស្អែក»។

លោក​ឧត្តមសេនីយ៍​ឯក ឈុំ សុជាតិ អ្នក​នាំ​ពាក្យ​ក្រសួង ការពារ​ជាតិ​មិន​អាច​ទាក់​ទង​សុំ​អត្ថាធិប្បាយ​បាន​ទេ កាល​ពី​ថ្ងៃ​អាទិត្យ​ម្សិលមិញ៕ PS

អត្ថបទគួរចាប់អារម្មណ៍