ភ្នំពេញៈ ទិវាគ្រូបង្រៀនឆ្នាំនេះធ្វើឡើងក្រោមប្រធានបទ «គ្រូបង្រៀនឆ្លាតវៃ ដើម្បីការអប់រំឌីជីថល» នឹងមិនមានការផ្ដល់ពានរង្វាន់ដល់នាយកសាលា សាលារៀន និងគ្រូបង្រៀនល្អដូចរាល់ឆ្នាំឡើយ ពីព្រោះតែវិបត្ដិជំងឺកូវីដ ១៩ និងមិនទាន់បានប្រឡងបាក់ឌុបនៅឡើយ។ នេះបើតាមលោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា។
លោក ហង់ជួន ណារ៉ុន ថ្លែងក្នុងកិច្ចសម្ភាសន៍ស្ដីពីការត្រៀមរៀបចំទិវាគ្រូបង្រៀនថ្ងៃទី ៥ ខែតុលា ឆ្នាំនេះ ដែលរៀបចំដោយក្រសួងអប់រំពីម្សិលមិញថាជារៀងរាល់ឆ្នាំក្រសួងអប់រំបានប្រារព្ធទិវានេះឡើងតាមរយៈប្រធានបទ ឆ្លុះបញ្ចាំងនូវទិវាគ្រូបង្រៀនអន្តរជាតិផង និងឆ្លើយតបទៅនឹងបរិបទវិស័យអប់រំរបស់កម្ពុជាផង។ ការប្រារព្ធទិវានេះតែងតែលើកឡើងនូវប្រធានបទផ្សេងៗគ្នា ដើម្បីបង្ហាញពីគុណតម្លៃក៏ដូចជាលើកកម្ពស់កិត្ដិយសដល់គ្រូបង្រៀន។
លោករដ្ឋមន្ដ្រីថ្លែងថា៖ «ជារៀងរាល់ឆ្នាំយើងបានផ្ដល់ពានរង្វាន់នាយកល្អ និងគ្រូល្អទៅដល់លោកគ្រូ អ្នកគ្រូ។ ក៏ប៉ុន្ដែឆ្នាំនេះ ព្រោះតែបរិបទកូវីដ ១៩ ហើយជាពិសេសយើងមិនទាន់បានរៀបចំប្រឡងសញ្ញាបត្រមធ្យមសិក្សាទុតិយភូមិ។ ដូច្នេះយើងមិនអាចផ្ដល់ជូនពានរង្វាន់បានទេ»។ ក៏ប៉ុន្ដែទិវាឆ្នាំនេះនឹងមានធ្វើកិច្ចពិគ្រោះយោបល់ និងពិភាក្សាគ្នាទៅលើប្រធានបទមួយចំនួន ដូចជាតួនាទីរបស់នាយកសាលា តួនាទីសាលារៀន និងតួនាទីរបស់គ្រូបង្រៀននៅក្នុងយុគសម័យឌីជីថល។
បើតាមលោករដ្ឋមន្ដ្រី ទិវាគ្រូបង្រៀនឆ្នាំនេះក្រសួងបានជ្រើសរើសប្រធានបទ «គ្រូបង្រៀនឆ្លាតវៃ ដើម្បីការអប់រំឌីជីថល» ដើម្បីបង្ហាញឱ្យឃើញថា នៅក្នុងយុគសម័យឌីជីថល ពិសេសនៅក្នុងបរិបទកូវីដ១៩នេះ គ្រូបង្រៀនត្រូវតែឆ្លាតវៃអាចបង្រៀននៅក្នុងយុគសម័យឌីជីថលនេះបាន។ លោកបញ្ជាក់ថា៖ «ជារៀងរាល់ឆ្នាំការប្រារព្ធទិវានេះមានធ្វើបាឋកថាមួយ។ ដូច្នេះឆ្នាំនេះ យើងមានបាឋកថា មួយដែលពាក់ព័ន្ធទៅនឹងកំណែទម្រង់អប់រំជារួម ជាពិសេសផ្ដោតទៅលើការអនុវត្ដការគ្រប់គ្រងសាលារៀនប្រកបដោយប្រសិទ្ធភាព»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យថ្លែងពីម្សិលមិញថា ដើម្បីប្រារព្ធទិវាគ្រូបង្រៀននេះ សមាគមគ្រូបង្រៀន និងលោកគ្រូអ្នកគ្រូប្រមាណ ១៥០ នាក់គ្រោងរៀបចំធ្វើពិធីនៅទីលានប្រជាធិបតេយ្យដែលបានស្នើទៅសាលារាជធានី ប៉ុន្ដែសាលារាជធានីអនុញ្ញាតឱ្យជួបជុំគ្នាត្រឹម ៥០ នាក់។ «យើងប្រារព្ធពិធីនេះ មិនមែនធ្វើដូចក្រសួងអប់រំដែលគ្រាន់តែឱ្យរង្វាន់ ១ កញ្ចប់នៅក្នុងថ្ងៃប្រារព្ធទិវានេះទេ គឺយើងចង់ឱ្យ ១ ជីវិតរបស់គ្រូបង្រៀនទទួលបាននូវអត្ថប្រយោជន៍មួយដែលអាចបន្តទៅដល់ថ្ងៃមុខទៀត»។
បើតាមក្រសួងអប់រំទិវាគ្រូបង្រៀនឆ្នាំនេះនឹងត្រូវធ្វើឡើងនៅវិទ្យាស្ថានជាតិអប់រំរយៈពេល ១ ថ្ងៃដោយមានការចូលរួមពីលោកគ្រូ អ្នកគ្រូ បុគ្គលិកអប់រំ សមាគមបុគ្គលិកសិក្សាខ្មែរសមាគមគ្រឹះស្ថានឧត្ដមសិក្សា និងតំណាងដៃគូអភិវឌ្ឍន៍ពាក់ព័ន្ធ។
លោក រស់ សុវាចា អ្នកនាំពាក្យក្រសួងអប់រំបានប្រាប់ពីម្សិលមិញថា ការប្រារព្ធទិវាគ្រូបង្រៀន និងដោយឡែកទិវាដឹងគុណគ្រូបង្រៀននៅកម្ពុជាជាទិវាមួយដែលបានកើតឡើងក្រោមគំនិតផ្តួចផ្តើមប្រកបដោយគតិបណ្ឌិតរបស់លោកនាយករដ្ឋមន្ដ្រី ហ៊ុន សែន តាំងពីឆ្នាំ ១៩៩៧ មកក្នុងគោលបំណងបំផុសឡើងវិញនូវវប្បធម៌ និងប្រពៃណីនៃការរំឭកគុណូបការៈដ៏ថ្លៃថ្លារបស់សិស្ស ចំពោះគ្រូបង្រៀននៅទូទាំងប្រទេស។
«គ្រូបង្រៀនបានខិតខំអំណត់ ព្យាយាមក្នុងការបំពេញភារកិច្ចជាអ្នកបណ្តុះបណ្តាលដើម្បីផ្ទេរចំណេះដឹង ព្រមទាំងទូន្មាន សិស្សានុសិស្សឱ្យធ្វើតែអំពើល្អ ស្គាល់ខុសត្រូវ គោរព ចាស់ទុំ តាមគំនិតថ្មីនៃការអប់រំ គឺរៀនដើម្បីមានចំណេះដឹង រៀនដើម្បីមានចំណេះធ្វើ រៀនដើម្បីមានសីលធម៌ល្អ និងរៀនដើម្បីរួមរស់នៅជាមួយគ្នាប្រកបដោយភាពសុខដុម។ គ្រូបង្រៀនបានរួមចំណែកកសាងសិស្សានុសិស្សឱ្យក្លាយជាកូនល្អ សិស្សល្អ ពលរដ្ឋល្អដែលជាកម្លាំងចលករនៃការអភិវឌ្ឍសង្គមជាតិ»៕