.jpg)
ទីតាំងកំសាន្តបាញ់គ្រាប់ពិតក្នុងខេត្តកំពុងស្ពឺ ទំនងជាកន្លែងដែលបានស្លាប់មនុស្ស។ ហ្វេសប៊ុក
ភ្នំពេញៈ ទីលានបាញ់ស៊ីបកម្សាន្តមួយកន្លែងនៅក្នុងខេត្តកំពង់ស្ពឺដែលគេជឿថា ជាកន្លែងនៃការផ្ទុះគ្រាប់ដែលបណ្ដាលឲ្យស្លាប់ទាហានកម្ពុជាម្នាក់ និងទេសចរជនជាតិអូស្រ្តាលីម្នាក់ កាលពីសប្តាហ៍មុន ត្រូវបានបិទបណ្តោះអាសន្ន។
កន្លែងនេះដែលមានឈ្មោះថា Cambodia Shooting Range ស្ថិតនៅក្នុងខេត្តកំពង់ស្ពឺ ជាកន្លែងដែលគ្រាប់បែកមួយបានផ្ទុះបណ្ដាលឲ្យស្លាប់ជីវិតមនុស្សពីរនាក់និងធ្វើឲ្យរបួសមនុស្សពីរនាក់ដទៃទៀត កាលពីថ្ងៃព្រហស្បតិ៍សប្តាហ៍មុន។
រូបថតនៅលើបណ្ដាញសង្គមហ្វេសប៊ុកនេះ ទំនងជាដូចនឹងរូបនៃកន្លែងសោកនាដកម្មនោះ។ នៅពេលទាក់ទងតាមហ្វេសប៊ុក អ្នកគ្រប់គ្រងទំព័រហ្វេសប៊ុក Cambodia Shooting Range បានថ្លែងថា ពួកគេមិនបើកដំណើរការទេ។
ពួកគេនិយាយថា៖«ការបាញ់ទាំងអស់ ឥឡូវនេះ ត្រូវបានផ្អាករហូតទាល់តែមានការជូនដំណឹងជាថ្មី»។ ទំព័រហេ្វសប៊ុកនេះក្រោយមកត្រូវបានលុបចោល។
ទីកន្លែងនេះដែលមានទីតាំងស្ថិតនៅក្នុងមូលដ្ឋានយោធាមួយ មិនត្រូវបានស៊ើបអង្កេតដោយសមត្ថកិច្ចទេ។ នេះបើតាម លោក ឈុំ សុជាតិ អ្នកនាំពាក្យក្រសួងការពារជាតិ ដែលបានថ្លែងកាលពីថ្ងៃចន្ទ។ លោកបានថ្លែងថា ករណីគ្រោះថ្នាក់នេះគឺជា«រឿងឯកជន»រវាងមិត្តភក្តិ និងមិត្តភក្តិ។
ទីលានបាញ់នេះ គឺជាទីលានមួយក្នុងចំណោមទីលានជាច្រើនដែលស្ថិតនៅក្នុងមូលដ្ឋានយោធា ដែលភ្ញៀវទេសចរ អាចចូលទៅលេងបានតាមរយៈការបង់ប្រាក់ ដើម្បីបាញ់គ្រប់ពិត រួមទាំងគ្រប់បេ ផងដែរ។ កម្ពុជា ជាប្រទេសមួយមិនអាចផលិតគ្រាប់បែក ឬអាវុធជាតិផ្ទុះផ្សេងៗទេ ហើយសម្ភារៈទាំងនោះត្រូវបានទិញពីបរទេស។
បើទោះបីជាអ្នកនាំពាក្យក្រសួងមហាផ្ទៃ លោក ខៀវ សុភ័គ បាននិយាយ ពីពេលថ្មីៗនេះថា ការបើកដំណើរការនេះមានលក្ខណៈខុសច្បាប់អស់រយៈកាលជាងមួយទសវត្សរ៍មកហើយនោះ ក៏វានៅតែដំណើរការយ៉ាងសកម្ម។
លោក សាត ណាន់ធី ដែលជាបុគ្គលិកម្នាក់នៅសណ្ឋាគារ B52 ក្នុងរាជធានីភ្នំពេញ បានថ្លែងថា៖ «ពិតណាស់» ភៀវទេសចរ អាចបង់ប្រាក់ដើម្បីទៅបាញ់កាំភ្លើងលេងនៅទីលានបាញ់កាំភ្លើងនៅខេត្តកំពង់ស្ពឺ ដែលរូបថតទំនងជាដូចនឹងទីតាំងនៃការផ្ទុះគ្រាប់កាលពីថ្ងៃព្រហស្បតិ៍សប្ដាហ៍មុន។
លោកថ្លែងថា តម្លៃមានចាប់ពី២០ដុល្លារសម្រាប់ការបាញ់កាំភ្លើង រហូតដល់៣០០ដុល្លារសម្រាប់ការបាញ់គ្រាប់បេ។ លោកបានថ្លែងថា ជនជាតិអូស្រ្តាលីទាំងពីរនាក់ដែលពាក់ព័ន្ធនៅក្នុងការផ្ទុះនោះមិនស្នាក់នៅសណ្ឋាគារ B52ទេ។
អ្នកស្រី Evie Pettit ដែលជាភ្ញៀវទេសចរម្នាក់ដែលស្នាក់នៅសណ្ឋាគារ B52 កាលពីខែមករា បានថ្លែងថា អ្នកស្រីនិងអ្នកធ្វើដំណើរដូចគ្នាម្នាក់ទៀត បានឆ្លៀតឱកាសទៅបាញ់កាំភ្លើងលេង ហើយសណ្ឋាគារបានសន្យាផ្តល់«ការបញ្ចុះតម្លៃល្អមួយ»។
អ្នកស្រីបង់ប្រាក់៥០ដុល្លារដើម្បីបាញ់កាំភ្លើង M16 ខណៈមិត្តភក្តិរបស់អ្នកស្រីបង់ច្រើនជាងនេះដើម្បីបាញ់កំាភ្លើងយន្តនិងបេ។ បន្ទាប់ពីមានករណីសោកនាដកម្មកាលពីពេលថ្មីៗ អ្នកស្រី Pettit បានថ្លែងថា អ្នកស្រីបានក្រឡេកមើលក្រោយវិញ«ក្នុងអារម្មណ៍ផ្សេងពីមុន»។
អ្នកស្រីបានថ្លែងថា៖«ឥឡូវនេះ ខ្ញុំក្រឡេកមើលក្រោយវិញ វាហាក់បីដូចជាមិនមានសុវត្ថិភាពទាល់តែសោះ។ ខ្ញុំមិនបានឃើញវិធានការសុវត្ថិភាពណាមួយសម្រាប់អាវុធទាំងនោះ... ហើយកន្លែងដែលយើងបានបាញ់ចេញ គឺជាកន្លែងសាមញ្ញមួយ»។ «យើងមិនមានឧបករណ៍ពាក់ការពារភ្នែកផងដែរ»។
អ្នកស្រី Pettit បានថ្លែងថា បុរសម្នាក់ពីសណ្ឋាគារបានបើកឡានឌុបអ្នកទាំងពីរទៅកាន់ទីតាំងនោះ បានជំរុញឲ្យអ្នកស្រីទិញស្រាបៀទៅជាមួយ។ អាវុធត្រូវបានទុកនៅក្នុងរទេះមួយ ហើយជនជាតិកម្ពុជាដែលមើលការខុសត្រូវកន្លែងបាញ់នោះបាននាំគ្នាផឹកស្រាបៀយ៉ាងក្អាកក្អាយ៕ PS
