ភ្នំពេញៈ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) គ្រោងផ្តល់ជំនួយឥតសំណងសម្រាប់គម្រោងពង្រឹងសមត្ថភាពមន្ទីរពេទ្យកុមារជាតិក្នុងឆ្នាំ ២០២២ ដើម្បីប្រែក្លាយឲ្យទៅជាមន្ទីរពេទ្យឯកទេសរោគកុមារកម្រិតខ្ពស់ និងលើកកម្ពស់វិស័យសុខាភិបាលនៅក្នុងប្រទេសកម្ពុជា ជាពិសេសលើបញ្ហាសុខភាពរបស់កុមារកម្ពុជាទូទាំងប្រទេស។
លោក ហុក គឹមចេង អគ្គនាយកបច្ចេកទេសសុខាភិបាលបានប្រាប់ ភ្នំពេញ ប៉ុស្តិ៍ ពីម្សិលមិញថា តាមផែនការនៃគម្រោងជំនួយឥតសំណងនេះ KOICA នឹងជួយសាងសង់មន្ទីរពេទ្យ និងបើកការបណ្តុះបណ្តាល ដើម្បីពង្រឹងសមត្ថភាពមន្ត្រី និងបុគ្គលិកដែលកំពុងបម្រើការនៅក្នុងមន្ទីរពេទ្យរួមជាមួយនឹងការផ្តល់សម្ភារ និងបរិក្ខារពេទ្យមួយចំនួនទៀត ដើម្បីព្យាបាលទៅតាមឯកទេស។
ទោះយ៉ាងណាលោកអគ្គនាយកមានប្រសាសន៍ថា លោកមិនទាន់ដឹងពីទំហំទឹកប្រាក់ក្នុងការចំណាយ និងផ្តល់ដល់មន្ទីរពេទ្យកុមារជាតិនេះនៅឡើយទេ។ ប៉ុន្តែអាចនឹងដឹង បន្ទាប់ពី KOICA បញ្ជូនរបាយការណ៍សិក្សាទៅកាន់រដ្ឋាភិបាលរបស់ខ្លួន ដើម្បីឱ្យមានការសម្រេច និងអនុម័តក្នុងឆ្នាំ ២០២១ នេះ។
លោក ហុក គឹមចេង បញ្ជាក់ថា៖ «នេះគ្រាន់តែជាគម្រោងដែលបានដាក់ចេញដោយ KOICA ហើយមិនទាន់អនុម័តពីរដ្ឋាភិបាលរបស់គេទេ។ ដូច្នេះហើយ យើងមិនដឹងពីទំហំថវិកាប៉ុន្មានដែលត្រូវចំណាយលើគម្រោងនេះនោះទេ។ យើងរង់ចាំមើលសិន ប៉ុន្តែបើតាមរបាយការណ៍ការសិក្សាគឺមានទំហំធំ»។
បើតាមលោកអគ្គនាយកកន្លងមកនេះ KOICA បានជួយសាងសង់អគារមន្ទីរពេទ្យមួយរួចមកហើយ។ បើគម្រោងនេះត្រូវបានអនុម័តពីរដ្ឋាភិបាលកូរ៉េ គឺទីភ្នាក់ងារនេះនឹងសាងសង់ថ្មីមួយទៀតនៅក្នុងបរិវេណមន្ទីរពេទ្យកុមារជាតិ។ សម្រាប់គម្រោងនេះត្រូវបានសិក្សាពីអ្នកជំនាញនៅក្នុងមន្ទីរពេទ្យ ក៏ដូចជាអ្នកជំនាញរបស់ KOICA អស់រយៈពេលជាច្រើនលើកមកហើយ។
លោកបានថ្លែងទៀតថា៖ «គម្រោងនេះនឹងជួយដល់ការពង្រឹងសមត្ថភាពមន្ត្រីរបស់មន្ទីរពេទ្យមានទាំងមន្ត្រីជំនាញផ្នែកឯកទេស សេវាថែទាំ និងសេវាផ្សេងៗទៀត ដើម្បីឱ្យមានសមត្ថភាពព្យាបាលកុមារឱ្យបានកាន់តែប្រសើរឡើង។ គម្រោងហ្នឹងក៏នឹងជួយលើផ្នែកលោហិតវិទ្យា ច្រមុះ បំពង់ក អាហារូបត្ថម្ភ និងផ្នែកផ្សេងៗទៀតជាច្រើន»។
លោក ហុក គឹមចេង បញ្ជាក់ទៀតថា តាមរយៈគម្រោងនេះក៏អាចនឹងបញ្ជូនមន្ត្រីឱ្យទៅទទួលបានការបណ្តុះបណ្តាលនៅក្នុងប្រទេសកូរ៉េក៏ដូចជាបណ្តុះបណ្តាលបន្តនៅក្នុងមន្ទីរពេទ្យនេះ ដើម្បីធ្វើយ៉ាងណាឱ្យក្រុមគ្រូពេទ្យមានជំនាញច្បាស់លាស់ក្នុងការជួយសង្គ្រោះ និងថែទាំកុមារកម្ពុជាឱ្យកាន់តែប្រសើរមួយកម្រិតទៀត។
លោក ឌី មល មន្ត្រីគម្រោងរបស់អង្គការ KOICA ផ្នែកសុខាភិបាល បានឱ្យដឹងថា KOICA បានធ្វើការសិក្សាលទ្ធភាពលើកទី ២ នៃគម្រោងពង្រឹងសមត្ថភាពមន្ទីរពេទ្យកុមារជាតិនៅកម្ពុជាសម្រាប់គម្រោងអាទិភាពឆ្នាំ ២០២២ ។ គម្រោងនេះត្រូវបានស្នើដោយមន្ទីរពេទ្យកុមារជាតិតាមរយៈក្រសួងសុខាភិបាលនៃរាជរដ្ឋាភិបាលកម្ពុជា។ គោលបំណងសំខាន់នៃគម្រោងនេះ គឺដើម្បីពង្រឹងលើការអភិវឌ្ឍមន្ទីរពេទ្យកុមារជាតិឲ្យក្លាយទៅជាមន្ទីរពេទ្យជាន់ខ្ពស់តាមរយៈការកែលម្អគុណភាពសេវាថែទាំ។
លោកថ្លែងថា៖ «គម្រោងនេះជាគម្រោងប្រចាំឆ្នាំ ២០២២ និងជាអាទិភាពក្នុងការជួយទៅលើមន្ទីរពេទ្យកុមារជាតិ ព្រោះ KOICA មានគម្រោងប្រចាំឆ្នាំរបស់ខ្លួនជារៀងរាល់ឆ្នាំក្នុងការជួយដល់រដ្ឋាភិបាលកម្ពុជា។ ប៉ុន្តែយើងមិនទាន់សម្រេចជាផ្លូវការនៅឡើយទេ ហើយក៏មិនទាន់ដឹងថាគម្រោងនេះទទួលជោគជ័យ និងសម្រេចពីរដ្ឋាភិបាលកូរ៉េដែរទេ»។
នៅពេលទាក់ទងតាមទូរស័ព្ទទៅមន្ទីរពេទ្យកុមារជាតិពីម្សិលមិញ មន្ត្រីម្នាក់មិនបានធ្វើអត្ថាធិប្បាយនោះទេ ដោយប្រាប់ឲ្យមកជួបផ្ទាល់៕