The Phnom Penh Post Search

Search form




Logo of Phnom Penh Post newspaper Phnom Penh Post - ទីភ្នាក់ងារ​បារាំង​ផ្តល់​ថវិកា​២៥​ម៉ឺន​ដុល្លារ​សម្រាប់​គម្រោង​បណ្ណាល័យ​ក្នុង​ពន្ធនាគារ

ទីភ្នាក់ងារ​បារាំង​ផ្តល់​ថវិកា​២៥​ម៉ឺន​ដុល្លារ​សម្រាប់​គម្រោង​បណ្ណាល័យ​ក្នុង​ពន្ធនាគារ

ទីភ្នាក់ងារ​បារាំង​ផ្តល់​ថវិកា​២៥​ម៉ឺន​ដុល្លារ​សម្រាប់​គម្រោង​បណ្ណាល័យ​ក្នុង​ពន្ធនាគារ

130704_04
ពិធីចុះហត្ថលេខាផ្តល់មូលនិធិរបស់បារាំងលើគម្រោងបណ្ណាល័យក្នុងពន្ធនាគារ ម៉ៃ វីរៈ

ភ្នំពេញៈ ទីភ្នាក់ងារ​បារាំង​ដើម្បី​អភិវឌ្ឍន៍​(AFD) បាន​ព្រម​ព្រៀង​ផ្តល់​ថវិកា ប្រមាណ​២៥ម៉ឺន​ដុល្លារ​(១៩.២៤៦៧​អឺរ៉ូ)​លើ​គម្រោង​ពង្រីក​បណ្ណាល័យ​ក្នុង​ពន្ធនាគារ​នៅ​ប្រទេស​កម្ពុជា​តាម​រយៈ​អង្គការ​ស៊ីប៉ា។

ពិធី​ចុះ​អនុស្សរណៈ​យោគ​យល់​លើ​គម្រោង​ផ្តល់​ហិរញ្ញប្បទាន របស់​ទីភ្នាក់ងារ​បារាំង​នេះ ធ្វើ​ឡើង​កាល​ពី​ម្សិលមិញ នៅ​ទីស្តីការ​ក្រសួង​មហា​ផ្ទៃ និង​បាន​ចុះ​ហត្ថលេខា​ដោយ លោក គុយ ប៊ុនសន អគ្គ​នាយក​នៃ​អគ្គ​នាយកដ្ឋាន​ពន្ធនាគារ ជាមួយ​លោក ហុក សុទ្ធិ នាយក​អង្គការ​ស៊ីប៉ា។

លោក គុយ ប៊ុនសន បាន​ថ្លែង​ក្នុង​ពិធី​នោះ​ថា​៖«វា​ជា​គម្រោង​ល្អ​មួយ សម្រាប់​ទណ្ឌិត​ដែល​នឹង​មាន​ឱកាស​អាន​សៀវភៅ​...​ទោះ​ជា​ពួក​គេ​ជាប់​ឃុំ​នៅ​ក្នុង​ពន្ធនាគារ​ក៏​ដោយ​»។

លោក Beatrice Montariol ទី​ប្រឹក្សា​អង្គការ​ស៊ីប៉ា ជា​អង្គការ​អក្ខរកម្ម​របស់​បារាំង ដែល​ឃ្លាំ​មើល​គម្រោង​នេះ​ថ្លែង​ថា ស៊ីប៉ា​បាន​ចាប់​ផ្តើម​កម្មវិធី​សាក​ល្បង​កាល​ពី​ឆ្នាំ​២០០៤ ដោយ​បាន​បង្កើត​បណ្ណាល័យ​នៅ​ក្នុង​ពន្ធនាគារ​ខេត្ត​បាត់ដំបង។ ដោយ​សារ​តែ​គម្រោង​នេះ​ទទួល​បាន​ជោគជ័យ​នាយកដ្ឋាន​ពន្ធនាគារ ក៏​បាន​ស្នើ​សុំ​ឲ្យ​បង្កើត​បណ្ណាល័យ​ក្នុង​ពន្ធនាគារ​នៅ​ទូទាំង​ប្រទេស ទាំងអស់។

លោក Montariol ថ្លែង​ថា នៅ​ចុង​ឆ្នាំ​នេះ​អង្គការ​ស៊ីប៉ា សង្ឃឹម​ថា នឹង​មាន​បណ្ណាល័យ​មួយៗ​នៅ​គ្រប់​ពន្ធនាគារ​ទាំង​២៦​នៅ​ក្នុង​ប្រទេស​កម្ពុជា​។ លោក​ថា បើ​គម្រោង​នេះ​ជោគជ័យ មាន​ន័យ​ថា ប្រទេស​កម្ពុជា​បាន​អនុវត្ត​ច្បាប់​ស្តី​ពី​ពន្ធនាគារ ឆ្នាំ​២០១១​ដែល​ក្នុង​មាត្រា​១៣ ចែង​ថា «ពន្ធនាគារ​ទាំង​អស់​ត្រូវ​មាន​កន្លែង​សម្រាប់​ពិធី​សាសនា​បណ្ណាល័យ និង​ហ្វឹក​ហ្វឺន​ការងារ​»។ តែ​ទោះ​ជា​យ៉ាង​ណា ដោយ​សារ​តែ​ខ្វះ​ទីកន្លែង​បណ្ណាគារ​ខ្លះ​ក្នុង​ពន្ធនាគារ​មួយ ចំនួន​នៅ​មាន​ទំហំ​តូច​នៅ​ឡើយ។

លោក Montariol កត់​សម្គាល់​ថា ទណ្ឌិត​ចូល​ចិត្ត​អាន​សៀវភៅ​ហើយ​ពួកគេ​ហាក់​បាន​កែប្រែ​ជីវិត​របស់​ខ្លួន​ពេល​ដែល​ចាក​ចេញ​ពី​ពន្ធនាគារ​តាម​រយៈ​ការ​អាន​សៀវភៅ​នេះ​។ តែ​ថា សៀវភៅ​រឿង​ប្រលោម​លោក មាន​ការ​ទាក់​ទាញ​បំផុត ពិសេស​រឿង​ដែល​បញ្ចប់​ទៅ​ដោយ​តួអង្គ​បាន​ជួប​ជុំ​គ្នា រីឯ​សៀវភៅ​រឿង​មនោសញ្ចេតនា​កម្សត់​វិញ ពួក​គេ​មិន​សូវ​អាន​ទេ។

លោក បាន​ជំនួយ​របស់​រដ្ឋាភិបាល​បារាំង គឺ​បន្ថែម​លើ​ជំនួយ​សហភាព​អឺរ៉ុប​ដែល​បាន​ផ្តល់​ប្រាក់​ប្រមាណ​៣៩​ម៉ឺន​ដុល្លារ​សម្រាប់​កម្មវិធី​នេះ​នៅ​កម្ពុជា​ពី​មុន​មក។

លោក គុយ ប៊ុនសន បាន​បញ្ជាក់​ថា រាល់​សៀវភៅ​នៅ​ក្នុង​បណ្ណាល័យ ខាង​នាយកដ្ឋាន​ពន្ធនាគារ​តែង​ពិនិត្យ​មើល​ជា​មុន​សិន​មុន​នឹង​អនុញ្ញាត​ឲ្យ​ទណ្ឌិត​អាន។

លោក​មាន​ប្រសាសន៍​ថា​៖«ទណ្ឌិត​ប្រមាណ​ពី​៣០​ទៅ​៤០ ភាគរយ​នឹង​ឆ្លៀត​ឱកាស​ទាញ​យក​ផល​ចំណេញ​ពី​បណ្ណាល័យ​នេះ ដោយ​សារ​ការ​ប្រើ​ចំណេះ​ដឹង​ដែល​បាន​មក​ពី​ការ​អាន​សៀវភៅ ដើម្បី​កែប្រែ​ជីវិត​របស់​ពួក​គេ​ទៅ​ថ្ងៃ​អនាគត»៕ NR

អត្ថបទគួរចាប់អារម្មណ៍