The Phnom Penh Post Search

Search form




Logo of Phnom Penh Post newspaper Phnom Penh Post - ទី​សត្វ​ឃាត​ខ្វះ​ស្តង់ដារ​អនាម័យ​និង​មាន​ហានិភ័យ​ខ្ពស់




ទី​សត្វ​ឃាត​ខ្វះ​ស្តង់ដារ​អនាម័យ​និង​មាន​ហានិភ័យ​ខ្ពស់

ទី​សត្វ​ឃាត​ខ្វះ​ស្តង់ដារ​អនាម័យ​និង​មាន​ហានិភ័យ​ខ្ពស់

Content image - Phnom Penh Post

ភ្នំពេញៈ នៅ​ម៉ោង​មួយ​យប់ ជា​ពេល​ដែល​មនុស្ស​ម្នា​រស់នៅ​ភ្នំ ពេញ​កំពុង​ដេក​ស្កប់ស្កល់ ប៉ុន្តែ ក៏​ជា​ពេល​ដែល​ក្រុម​ឈ្មួញ​ដឹក​សត្វពាហនៈ​ចូល​មក​កាន់​ទី​សត្វ​ឃាត​ដើម្បី សម្លាប់​យក​សាច់​លក់​ផង​ដែរ ដូចជា ទី​សត្វ​ឃាត​ក្នុង​ខណ្ឌ​ឫស្សីកែវ​នេះ។ សត្វ​ជ្រូក​រាប់​រយ​ក្បាល ត្រូវ​គេ​ដឹក​ទាំង​យប់​មក​សម្លាប់​យក​សាច់​លក់​តាម​ទីផ្សារ ក្នុង​រាជធានី។

នៅ​ប្រទេស​កម្ពុជា​សត្វ​ជ្រូក​ភាគ​ច្រើន​ត្រូវ សម្លាប់​តាម​ប្រពៃណី នៅ​ក្នុង​រោង​ដែល​មាន​ត្រឹម​តែ​ដំបូល​និង​ក្រាល​បេតុង គឺ​ពុំមាន​កន្លែង​និង​ម៉ាស៊ីន​ទំនើប​ដើម្បី​សម្លាប់​សត្វ​ឡើយ។

ការ សម្លាប់​ជ្រូក គឺជា​ការងារ​របស់​បុរស​មួយ​ក្រុម​ដែល​ប្រើ​កាំបិត​មុត​ស្រួច​សម្លាប់​វា ដើម្បី​យក​សាច់​បំពេញ​តម្រូវ​ការ​បរិភោគ។

លោក ដាញ់ វីរៈ អាយុ​៣៥​ឆ្នាំ ស្ថិត​ក្នុង​ចំណោម​អ្នក​ចាក់​ក​ជ្រូក ដែល​បាន​លះបង់​ការងារ​នៅ​រោងចក្រ​កាត់ដេរ មក​ស្វែងរក​ឱកាស​ការងារ​ឲ្យ​ប្រសើរ​ជាង​មុន។ គាត់​និយាយ​ថា៖«ធ្វើ​ជ្រូក​មួយ តម្លៃ​៥​ពាន់​រៀល។ ខ្ញុំ​បាន​៣​ពាន់​រៀល រីឯ​ប្រាក់​នៅ​សល់ គឺ​បាន​ទៅ​ដៃ​គូ​ខ្ញុំ​ម្នាក់​ទៀត»។ គាត់​ថា៖ «ដៃ​គូ​ខ្ញុំ គាត់​ខ្លាច​មិន​សូវ​ហ៊ាន​ចាក់ក​ជ្រូក​ទេ ដូច្នេះ​ខ្ញុំ​រក​ប្រាក់​បាន​ច្រើន​ជាង​។ ក្នុង​មួយ​យប់​ខ្ញុំ​អាច​ចាក់​ក​ជ្រូក​ដល់​២០​ក្បាល គឺ​ចាប់​ធ្វើ​ការ​ពី​ម៉ោង​១​យប់ ទៅ​ដល់​ម៉ោង​៥​កន្លះ​ឬ​៦​ព្រឹក»។

ការ កាប់​ជ្រូក​យក​សាច់​គឺ​សាមញ្ញ មុន​នឹង​សម្លាប់ ត្រូវ​នាំ​ជ្រូក​មក​ដាក់​ក្នុង​ក្រោល ជិត​កន្លែង​ព្យួរ​សាច់​កាប់​ហើយ។ ជ្រូក​ខ្លះ​នៅ​ប្រកាច់​ហូរ​ឈាម  ខណៈ​ជ្រូក​ឯ​ទៀត​កំពុង​ត្រូវ​ចាក់ក​សម្លាប់​នៅ​ជិត​នោះ​បន្ត​បន្ទាប់ គ្នា។

អ្នក​សម្លាប់​ជ្រូក​នៅ​ទីនេះ ធ្វើ​ការ​លឿន​ណាស់។ នៅ​ពេល​នាំ​ជ្រូក​មក​ដាក់​ក្នុង​ក្រោល បើ​មាន​ជ្រូក​ណា​ក្រាញ​មិន​ព្រម​ចូល ពួកគេ​ប្រើ​ដំបង​វាយ​បង្ខំ ហើយ​បន្ត​មក​ជ្រូក​ទាំង​នោះ​ត្រូវ​សម្លាប់​និង​កោស ពុះ​វះ​ជា​បំណែកៗ​យ៉ាង​លឿន។  មាន​កម្មករ​ខ្លះ ត្រូវ​ត្រង​យក​ឈាម​ទុក មុន​នឹង​អូស​យក​ទៅ​ស្រុស​ទឹក​ក្តៅ​កោស​រោម។ ការ​សម្លាប់​ជ្រូក គឺ​ធ្វើ​ឡើង​រាល់​ថ្ងៃ​ដោយ​បុរស​ជា​កម្មករ​ប្រមាណ​២០​នាក់ គឺ​ប្រាំ​ម៉ោង​ក្នុង​មួយ​ថ្ងៃ និង​រៀងរាល់​សប្តាហ៍។

កំណើន​មនុស្ស​និង កម្រិត​ជីវភាព​តាម​គ្រួសារ បាន​ធ្វើ​ឲ្យ​តម្រូវ​ការ​សាច់​ជ្រូក​កើន​ឡើង នៅ​ក្នុង​ប្រទេស​កម្ពុជា ក្នុង​រយៈកាល​២​ទសវត្សរ៍​ចុង​ក្រោយ​នេះ។ ប៉ុន្តែ ខណៈ​អាជីវកម្ម​នេះ​កំពុង​កាក់កប បទ​ប្បញ្ញត្តិ​នានា​មិន​មាន​គ្រប់គ្រាន់​នៅ​ឡើយ ពិសេស​ការកំណត់​កន្លែង​សម្លាប់​សត្វ។

លោក សួន សុ​ធឿន អនុប្រធាន​នាយកដ្ឋាន​បសុសត្វ​នៃ​ក្រសួង​កសិកម្ម​បាន​ឲ្យ​ដឹង​ថា អាជីវករ​ប្រតិបត្តិ​ផ្អែក​លើ​អនុក្រឹត្យ ដែល​គ្រប់គ្រង​ទៅលើ​ទី​សត្វឃាត ជា​ពិសេស​បញ្ហា​អនាម័យ​និង​ស្តង់ដារ​សម្លាប់​សត្វ នៅ​ក្នុង​កម្រិត​ទាប​នៅ​ឡើយ។

លោក សុ​ធឿន បាន​បន្ត​ថា៖ «ឥឡូវ នេះ​សត្វ​ជ្រូក​និង​គោ នៅ​តាម​ទី​សត្វ​ឃាត គឺ​សម្លាប់​ដោយ​ដៃ​ផ្ទាល់ តាម​បែប​ប្រពៃណី។ ទី​សត្វឃាត​មួយ​ចំនួន​មាន​ប្រើ ចរន្ត​អគ្គិសនី​ឆក់​សម្លាប់​សត្វ​ក៏​មាន»។ «ជា​ទម្រង់​នៃ​ការ​សម្លាប់​ដែល​មិនល្អ។ សត្វ​ទទួល​រង​ការ​ឈឺចាប់។ វា​អាច​ប៉ះពាល់​ដល់ក​ម្មករ​ព្រោះ កាំបិត ឈាម និង​ការ​សម្លាប់​សត្វ​បែប​នេះ អាច​ធ្វើ​ឲ្យ​ពួក​គេ​មាន​របួស​បាន»។

តែ​ប៉ុន្មាន​ម៉ោង សត្វ​ជ្រូក​ត្រូវ​សម្លាប់​យក​សាច់ ធ្វើ​យ៉ាង​ស្អាត ហើយ​ត្រូវ​លើក​ដាក់​ឡាន​ខ្លះ​ដឹក​តាម​ម៉ូតូ ខ្លះ​យក​ទៅ​ដាក់​លក់​តាម​ទីផ្សារ។ អ្នក​ដឹក​សាច់​ជ្រូក​ម្នាក់ ផ្ទុក​សាច់​ជ្រូក​ច្រើន​ជ្រុល ស្ទើរ​តែ​រក​កន្លែង​អង្គុយ​ខ្លួន​ឯង​មិន​បាន ប៉ុន្តែ​គាត់​ប្រឹង​ច្រក​គាវ ឲ្យ​តែ​ជើង​អាច​ជាន់ ហ្វ្រាំង​និង​ចង្កឹះ​លេខ​បាន។

130903_6a
កម្មករកំពុងធ្វើការ នៅក្នុងទីសត្វឃាតជ្រូកមួយ នៅក្នុងខណ្ឌឫស្សីកែវ រាជធានីភ្នំពេញ ហុង មិនា

លោក ឃួន សំអឿន ជា​ពេទ្យ​សត្វ​នៅ​ក្នុង​ខណ្ឌ​ឫស្សីកែវ បាន​ប្រាប់​ថា៖ «ខ្ញុំ​មក​ទីនេះ​រាល់​យប់ ដើម្បី​ពិនិត្យ​សាច់​ជ្រូក និង​ពិនិត្យ​មេរោគ​ចម្លង ព្រោះ​រដ្ឋាភិបាល​កំពុង​តែ​បារម្ភ​ពី​បញ្ហា​នេះ»។

លោក​ថា អាជ្ញាធរ​ក៏​បារម្ភ​ដែរ​អំពី​មេរោគ​ដែល​កើត​លើ​សាច់​សត្វ ដែល​យក​មក​សម្លាប់។

ការ​កើត​ជំងឺ​ផ្តាសាយ​ជ្រូក​នៅ​ឆ្នាំ​២០០៩ នៅ​តែ​មាន​ការ​យក​ចិត្ត​ទុក​ដាក់​ពី​មន្ត្រី​សាធារណៈ ទៅ​លើ​បញ្ហា​អនាម័យ និង​ការ​ឆ្លង​នៃ​ជំងឺ​នេះ​ទៅ​មនុស្ស។

តែ​លោក ឃួន សំអឿន ទទួល​ស្គាល់​ថា វា​មិន​ជា​រឿង​ងាយ​ទេ ដើម្បី​ពន្យល់​អំពី​បញ្ហា​នេះ​ទៅ​ដល់​កម្មករ​ដែល​កាប់​សត្វ​យក​សាច់ លក់​នោះ។ លោក​បន្ត​ថា​៖ «ឈ្មួញ​មួយ​ចំនួន ... ប្រើ​ម៉ូតូ​ដឹក​សាច់​ផ្ទាល់។ ខ្ញុំ​ប្រាប់​គាត់​ឲ្យ​ប្រើ​ប្លាស្ទិក​គ្រប​សាច់ ប៉ុន្តែ​គាត់​ថា ផ្សារ​នៅ​ជិត​នេះ​វា​មិន​អី​ទេ។ ខ្ញុំ​កំពុង​ព្យាយាម​ប្តូរ​ទម្លាប់​គាត់»។

តាម​អង្គការ​ស្បៀងអាហារ​ពិភពលោក​(FAO)​គោលការណ៍​សំខាន់​នៃ​អនាម័យ​គឺ​មិន​ត្រូវ​ឲ្យ​សាច់ សត្វ​ដែល​សម្លាប់​រួច ប៉ះ​នឹង​ដី​ផ្ទាល់​ទេ។ នៅ​ទី​សត្វ​ឃាត​ខ្លះ​សត្វ​ត្រូវ​គេ​សម្លាប់​ផ្ទាល់​នៅ​លើ​កម្រាល​បេតុង និង​លាង​នៅ​លើ​នោះ​ផ្ទាល់​តែ​ម្តង ដើម្បី​វះ​យក​សាច់​និង​គ្រឿង​ក្នុង​ចេញ។

គេ​សង្កេត​ឃើញ​ថា ក្រុម​បុរស​អ្នក​កាប់​ជ្រូក​ទាំង​នោះ គ្មាន​ពាក់អាវ​ការពារ​ខ្លួន​ទេ ក្រៅ​ពី​ស្លៀក​ខោខ្លី​មក​ធ្វើ​ការ។

តែ​តាម​លោក សំអឿន បើ​ពួក​គេ​គោរព​បញ្ញត្តិ​របស់​ក្រសួង​កសិកម្ម ពួក​គេ​ត្រូវ​មាន​ឯកសណ្ឋាន​សម្រាប់​ការពារ​ខ្លួន។ លោក​បន្ត​ថា៖ «ពួក​គេ​ត្អូញត្អែរ​អំពី​ការ​តម្រូវ​ស្លៀក​ឯ​កសណ្ឋាន ដោយ​សារ​ថា បាន​ទម្លាប់​ស្លៀកខោ​ខ្លី​ធ្វើ​ការងារ​អស់​ច្រើន​ឆ្នាំ​មក​ហើយ ហើយ​វា​ស្រួល​ជាង​ការ​ស្លៀកពាក់​ខោអាវ។ ខ្ញុំ​ជា​ធម្មតា​ក៏​បណ្តោយ​តាម​ពួក​គេ»។

ការ​ធ្វើ​បែប​នេះ គឺជា​គំរូ​មិន​ល្អ​ទេ​ផ្នែក​អនាម័យ ពេល​ខ្លះ​ខ្លួន​ប្រាណ​ប្រឡាក់​ឈាម​ជោក។

ដោយ​បារម្ភ​អំពី​ការ​កើត​ជំងឺ​និង​ការ​ឆ្លង​មេរោគ ពេល​សម្លាប់​សត្វ​យក​សាច់ រដ្ឋាភិបាល​បាន​និង​កំពុង​ចាត់​វិធានការ ធ្វើ​ឲ្យ​មាន​របៀប​និង​អនាម័យ​ត្រឹមត្រូវ សម្រាប់​អាជីវកម្ម​នេះ។

លោក សួន សុធឿន បញ្ជាក់​ដែរ​ថា ដោយ​សហការ​ជាមួយ​អង្គការ FAO ក្រសួង​កសិកម្ម បាន​ចំណាយ​ពេល​បី​ឆ្នាំ ចាប់​ពី​ឆ្នាំ​២០០៩​មក ដើម្បី​បង្កើត​ច្បាប់​មួយ សម្រាប់​ធ្វើ​ឲ្យ​មាន​ស្តង់ដារ​ប្រសើរ​ឡើង​ក្នុង​វិស័យ​នេះ។

លោក បន្ត​ថា៖«ចាប់ពី​សង្គ្រាម​ស៊ីវិល​បញ្ចប់ យើង​មិន​បាន​គោរព​ទៅ​តាម​កាតព្វកិច្ច​អន្តរជាតិ​ទេ។​ពាក់ព័ន្ធ នឹង​បញ្ហា​ផលិតកម្ម​និង​សុខភាព​សត្វ យើង​មាន​ត្រឹម​តែ​អនុក្រឹត្យ»។ លោក​ថ្លែង​សំដៅ​ទៅ​លើ​អនុក្រឹត្យ​លេខ​១០៨ ចេញ​ឆ្នាំ​២០០៧ ដែល​បញ្ញតិ្ត​លើ​ការ​គ្រប់គ្រង​ទី​សត្វឃាត​និង​ការ​ពិនិត្យ​សាច់ និង​ផលិតផល​សាច់។ ក្រៅពី​នេះ​នៅ​មាន​អនុក្រឹត្យ​លេខ​១៦​ចេញ​ឆ្នាំ​២០០៣ សម្រាប់​គ្រប់គ្រង​លើ​អនាម័យ​នៃ​សត្វពាហនៈ​និង​ផលិតផល​ដែល​ចេញ​ពី សត្វ​ពាហនៈ។

លោក Lotfi Allal ពេទ្យ​សត្វ​ដែល​ធ្វើការ​ឲ្យ​អង្គការ FAO ក្នុង​ប្រទេស​កម្ពុជា​តាំងពី​ឆ្នាំ​២០០៨ បាន​ហៅ​សេចក្តី​ព្រាង​ច្បាប់​ថ្មី មិន​ទាន់​អនុម័ត​នេះ​ថា«ជា​ច្បាប់​ពេទ្យសត្វ​ទី១ បន្ទាប់​ពី​សម័យ​អាណានិគម»ដើម្បី​ធ្វើ​ឲ្យ​ប្រសើរ​ឡើង​នៅ​ក្នុង​អាជីកម្ម​នេះ។

លោក​ថ្លែង​ថា​៖ «ច្បាប់​នេះ​ត្រូវ​តែ​ឆ្ពោះ​ទៅ​រក​ជំហាន​ថ្មី​មួយ... នៅ​មុន​ការ​អនុម័ត​ច្បាប់​នេះ ដែល​រំពឹង​ថា ធ្វើ​ឆ្នាំ​ក្រោយ​។ខ្លឹម​សារ​ច្បាប់​នេះ​នឹង​គ្រប​ដណ្តប់​ទៅ​លើ​ការ ពិនិត្យ​សត្វពាហនៈ ទាំង​រស់ និង​ក្រោយ​ពេល​សម្លាប់ នៅ​ទី​សត្វ​ឃាត»។

ម្ចាស់​ទី​សត្វ​ឃាត​នៅ​ឫស្សីកែវ គឺ​ធ្វើ​អាជីវកម្ម នៅ​លើ​ដី​ឯកជន ដែល​ពួក​គេ​បាន​ជួល​បន្ត។

ឈ្មួញ​កណ្តាល​ទិញ​ជ្រូក​ពី​កសិករ​ហើយ​ត្រូវ​ទូទាត់​ប្រាក់​ថ្លៃ​ជ្រូក​ឲ្យ​កសិករ បន្ទាប់​កាប់សាច់​លក់​នៅ​ផ្សារ​អស់។

ឈ្មួល​កណ្តាល​រក​ស៊ី​កាប់​ជ្រូក​ខ្លះ​ជា​ពាណិជ្ជករ ដែល​ប្រើ​យុវជន​ឲ្យ​សម្លាប់​សត្វ​ជ្រូក​ឲ្យ។ តែ​ក៏ មាន​ខ្លះ ជា​អាជីវកម្ម​គ្រួសារ មាន​ការ​ចូលរួម​រវាង​ប្តី ប្រពន្ធ និង​កូនៗ​ក៏​មាន។ អ្នក​ធ្វើ​ការ​នៅ​ទី​សត្វ​ឃាត គឺ​មាន​ភាព​រហ័ស​រហួន​និង​មាន​ប្រសិទ្ធភាព។

ការ​បរិភោគ​មាន​សុខភាព​ល្អ​វេជ្ជបណ្ឌិត សួន សុធឿន ថ្លែងថា ទាក់ទង​នឹង​សាច់​សត្វ​ដែល​លក់​សម្រាប់​បរិភោគ​ត្រូវ​តែ​ធានា​អនាម័យ​និង​គុណភាព​ចាប់​ពី​កសិករ រហូត​ដល់​តុ​អាហារ។ នេះ​ជា​វិធាន​ក្នុង​ច្បាប់​ថ្មី។

លោក​បន្ត​ថា ទន្ទឹម​នឹង​នេះ អនុក្រឹត្យ​ស្តីពី​ទី​សត្វឃាត ចែង​អំពី​ការ​ប្រុងប្រយ័ត្ន​ជា​មូលដ្ឋាន​ទៅ​លើ​សុខភាព ដើម្បី​បង្ការ​ការ​រីក​រាល​ដាល​នៃ​ជំងឺ​ឆ្លង។ លោក​បន្ត​ថា​៖ «យើង​ព្យាយាម​កាត់​បន្ថយ​ជំងឺ​ឲ្យ​បាន​អតិបរមា។ ជា​ធម្មតា​ជំងឺ​មក​ពី​កសិដ្ឋាន ដូច្នេះ យើង​ព្យាយាម​កាត់​បន្ថយ​ហានិភ័យ​នៃ​ការ​ឆ្លង​ជំងឺ​ឲ្យ​បាន​ច្រើន ដែល​យើង​អាច​ធ្វើ​ទៅ​បាន»។

បើ​រក​ឃើញ​នៅ​ទី​សត្វ​ឃាត មាន​សត្វ​កើត​ជំងឺ ចាំបាច់​ត្រូវ​យក​សត្វ​នោះ​ចេញ​ភ្លាម។  «ការ​ឆ្លង​ជំងឺ​ក៏​អាច​កើត​ឡើង នៅ​នឹង​កន្លែង​សម្លាប់​សត្វ ដែល​ខ្វះ​អនាម័យ​តាម​ការ​ដឹក​ជញ្ជូន​និង​កន្លែង​លក់​ផង​ដែរ»។

វេជ្ជ បណ្ឌិត Allal ពី​អង្គការ FAO បាន​ថ្លែងថា អង្គការ​សហប្រជាជាតិ​កំពុង​ធ្វើ​ការ​ជាមួយ​នឹង​ដៃ​គូ​អភិវឌ្ឍន៍​ដើម្បី ធានា​ថា ស្តង់ដារ​សុខភាព​សត្វ​គឺជា​អាទិភាព​ក្នុង​ឧស្សាហកម្ម​សាច់ សត្វ​នៅ​កម្ពុជា។ លោក​បន្ត​ថា៖«វា​គួរតែ​ជា​រឿង​សំខាន់ ព្រោះ​យើង​កំពុង​តែ​ធ្វើ​ការ​ក្នុង​ប្រទេស​ដែល​សត្វ​ជា​ច្រើន​មាន​ជំងឺ »។

លោក Sonny Krishnan មន្ត្រី​ទំនាក់​ទំនង​នៃ​អង្គការ​សុខភាព​ពិភពលោក​នៅ​កម្ពុជា ថ្លែង​ថា លោក​បារម្ភ​អំពី​ទី​សត្វឃាត​ខុស​ច្បាប់។ លោក​ថា៖ «យើង​មាន​ក្តីបារម្ភ បើ​ពួក​គេ​គ្មាន​អាជ្ញាប័ណ្ណ»។ ម្យ៉ាង​ការ​ឆ្លង​ជំងឺ​អាច​កើត​មាន​ក្នុង​ចង្វាក់​ផលិតកម្ម។

ការ​កាត់​បន្ថយ​ហានិភ័យ​តាម​លោក​វេជ្ជបណ្ឌិត សួន សុធឿន ពី​ក្រសួង​កសិកម្ម​ឲ្យ​ដឹងថា ការ​ស្លាប់​ដោយ​សារ​ពុល​អាហារ​គឺ​កម្រ​នៅ​កម្ពុជា ហើយ​ក៏​គ្មាន​ទិន្នន័យ​ដើម្បី​ធ្វើការ​បញ្ជាក់​ជា​ភ័ស្តុតាង​ដែរ។

មន្ត្រី​ក្រសួង​សុខាភិបាល​មិន​អាច​ទាក់ទង​ដើម្បី​សួរនាំ​អំពី​បញ្ហា​នេះ​បាន​ទេ។

តែ វេជ្ជបណ្ឌិត សួន សុធឿន បន្ត​ថា​៖«នៅ​កម្ពុជា​ប្រជាជន​មិន​ប្រើ​ទូ​ក្លាស្សេ​សាច់​ទេ។ ជា​ធម្មតា គេ​សម្លាប់​ពេល​ព្រឹក ហើយ​ដឹក​ជញ្ជូន​ទៅ​កាន់​ទីផ្សារ​តែ​ម្តង»។ លោក​ថា ដើម្បី​កែ​លម្អ​ស្ថានភាព​នេះ រដ្ឋាភិបាល​កំពុង​ព្យាយាម​បញ្ចុះ​បញ្ចូល​ក្រុមហ៊ុន​ឲ្យ​សង់​ទី​សត្វ ឃាត​ទំនើប ដែល​ចំណាយ​ប្រាក់​រាប់​លាន​ដុល្លារ។

លោក​សួន សុធឿន ថ្លែង​ទៀតថា កន្លែង​បែប​នេះ​គេ​អាច​ទិញ សម្លាប់​សត្វ និង​ធ្វើ​ការ​វេច​ខ្ចប់​ដោយ​ត្រូវ​ធ្វើ​ឲ្យ​ល្អ​ប្រសើរ​ឡើង។ ប៉ុន្តែ ទី​សត្វ​ឃាត​បែប​នេះ គឺ​កំពុង​សាងសង់​នៅ​ក្នុង​ខេត្ត​កំពត សម្រាប់​សម្លាប់​សត្វ​គោ ប៉ុន្តែ​លោក​មិន​ចាំ​ថា ក្រុមហ៊ុន​ណា​សាងសង់​ឡើយ៕  PS /TK

អត្ថបទគួរចាប់អារម្មណ៍

  • ភ្នំពេញៈ ប្រទេស​ កាតា បាន​ចុះ​អនុស្សរណៈ​ជាមួយ​ក្រសួង​អប់រំ យុវជន និង​កីឡា​លើ​គម្រោង​អភិវឌ្ឍន៍​ដើម្បី​កុមារ​ដំណាក់កាល​ទី​២ ដោយ​ផ្ដល់​មូលនិធិ​ជា​ថវិកា​ជាង​ ១៣ ​លាន​ដុល្លារ​អាមេរិក ដើម្បី​រួមចំណែក​ពង្រឹង​វិស័យ​អប់រំ​កម្ពុជា​ដោយ​ផ្ដោតលើ​កុមារ​ងាយ​រងគ្រោះ​ក្នុង​ការសិក្សា​នៅ​កម្រិត​បឋមសិក្សា ស្របតាម​គោលដៅ​អភិវឌ្ឍន៍​ប្រកប​ដោយ​ចីរភាព​ឆ្នាំ​ ២០៣០​។

  • ភ្នំពេញៈ ក្រុមហ៊ុន Asiatic Group (Holdings) Ltd ដែលមាន​មូលដ្ឋាន​នៅ​ប្រទេស​សិង្ហបុរី​កំពុង​ស្វែងរក​ការទាមទារ​ទឹកប្រាក់​ចំនួន​ ១៤,៤ ​លាន​ដុល្លារ​ ពី​ក្រុមហ៊ុនតំបន់​សេដ្ឋកិច្ច​ពិសេស​ភ្នំពេញ (PPSP) ​ដែល​ចុះបញ្ជី​នៅ​ក្រុមហ៊ុន​ផ្សារមូលបត្រ​កម្ពុជា (CSX) ចំពោះ​ការចោទប្រកាន់​ដែល​ថា​បាន​រំលោភ​លើ​កិច្ចព្រមព្រៀង​វិនិយោគ​រួម (JV) នៃ​រោងចក្រ​ថាមពល​មួយ​។

  • ភ្នំពេញៈ មន្ត្រី​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​អះអាង​ថា កម្ពុជា និង​សិង្ហបុរី​បាន​ប្តេជ្ញា​បន្ត​កិច្ចសហការ​គ្នា​ឱ្យ​កាន់តែ​រឹងមាំ​ថែមទៀត ក្នុង​ការពង្រីក​លើ​វិស័យ​ការងារ និង​បណ្តុះបណ្តាល​ធនធាន​មនុស្ស​របស់​កម្ពុជា​ជាពិសេស​នៅក្នុង​បរិបទ​នៃ​ជំងឺ​​កូវីដ ​១៩​។

  • ភ្នំពេញ៖ ត្រឹមតែ​រយៈពេល ​១០ ​ខែ​ ភោជនីយដ្ឋាន ​Uncle Fu បាន​ធ្វើ​ឱ្យ​ភ្ញៀវ​​ចម្រុះ​ជាតិ​សាសន៍​ជាប់​ចិត្ត​នឹង​រសជាតិ​​ម្ហូប​ម៉ាឡេស៊ី​ និង​សិង្ហបុរី​។

  • កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ក្នុង​ ១ ​ថ្ងៃ​។

  • ភ្នំពេញៈ អគ្គស្នងការរង​នគរបាល​ជាតិ លោក ស ថេត ជំរុញ​ឱ្យ កងកម្លាំង​ប្រដាប់អាវុធ និង​មន្ត្រីរាជការ​ត្រូវ​ធ្វើជា​គំរូ​ដ៏ល្អ​សម្រាប់​ប្រជាពលរដ្ឋ​ទូទៅ​ក្នុង​ការគោរព​ច្បាប់​ចរាចរណ៍​នៅលើ​ដងផ្លូវ ដោយ​លោក​ប្រាប់​ឱ្យ​មន្ត្រី​នគរបាល​ចរាចរណ៍​កុំ​ភ័យខ្លាច​ក្នុង​ការអនុវត្ត​ច្បាប់​លើ​មន្ត្រី​ជាន់ខ្ពស់​ណា​ដែល​ប្រព្រឹត្ត​ខុស ខណៈ​ការបើកបរ​ល្មើសច្បាប់​នៅតែ​ជា​បញ្ហា​សម្រាប់​កម្ពុជា​។