.jpg)
ទឹកនៅស្ទឹងសង្កែ ក្នុងក្រុងបាត់ដំបង នៅថ្ងៃទី១៦ ខែសីហា ឆ្នាំ២០១៨។ រូបថត ក្រសួងធនធានទឹក
បាត់ដំបងៈ ទឹកជំនន់បានបន្តហក់ឡើងខ្លាំង នៅតាមបណ្តាខេត្តជាប់ទន្លេមេគង្គ ហើយក៏កំពុងហក់ឡើងខ្លាំងដល់កម្រិតប្រកាសអាសន្ន នៅទន្លេសេសាន ខេត្ដរតនគិរី និងស្ទឹងសង្កែ ខេត្ដបាត់ដំបង គិតត្រឹមល្ងាចថ្ងៃទី១៦ ខែសីហានេះ។
លោក កែវ វី អ្នកនាំពាក្យគណៈកម្មាធិការជាតិ គ្រប់គ្រងគ្រោះមហន្ដរាយ បានប្រាប់ភ្នំពេញបុស្ដិ៍នៅថ្ងៃទី១៦ ខែសីហាថា ការហក់ឡើងវិញនៃទឹកជំនន់ នៅទន្លេសេសាន គឺបណ្ដាលមកពីការបើកទ្វារទឹកបង្ហូរមកពីប្រទេសវៀតណាម រួមផ្សំនឹងកំណើនទឹកភ្លៀង នៅតាមតំបន់ដោយផ្ទាល់ផងដែរ។
លោកថ្លែងថា៖«ប៉ុន្ដែទឹកនេះ ហក់ឡើងតែពីរបីថ្ងៃនឹងស្រកចុះទៅវិញហើយ មិនមានការព្រួយបារម្ភអីទេ។ ទឹកនេះហក់ឡើងដូចការបើកទ្វារទំនប់នៅទឹកឈូរយើងចឹង គ្រាន់តែយើងមិនបានដឹង ទើបតែខេត្ដនៅវៀតណាមគេទាក់ទងប្រាប់មកទើបយើងដឹងហ្នឹង»។
បើតាមលោក កែវ វី ទឹកជំនន់នៅទន្លេសេសាន នឹងមានការធូរស្រាលឡើងវិញ ត្រឹមរយៈពេលពីរបីថ្ងៃទៀត ប៉ុន្ដែទឹកនេះ ក៏នឹងធ្វើឲ្យប៉ះពាល់ដល់ហេដ្ឋារចនាសម្ព័ន្ធ វាលស្រែមួយចំនួនផងដែរ។
លោក សយ សូណា ប្រធានមន្ទីរកសិកម្ម ខេត្ដរតនគិរី បានឲ្យដឹងថា ទឹកជំនន់កំពុងបន្ដហក់ឡើង លិចតំបន់មួយចំនួនថែមទៀត នៅស្រុកវើនសៃ ហើយពេលនេះ លោកកំពុងប្រមូលទិន្នន័យផលប៉ះពាល់សរុប។
លោកបញ្ជាក់ថា៖«ខ្ញុំកំពុងចុះទៅអង្កេតស្ថានភាពទឹកបន្ថែម ដែលកំពុងលិចវាលស្រែមួយចំនួន ឥឡូវខ្ញុំកំពុងសង្កេតមើលសិន ព្រោះទឹកនេះ ទើបតែហក់ឡើងបានពីរបីថ្ងៃនេះដែរទេ»។
ក្រសួងធនធានទឹក បានប្រកាសនៅថ្ងៃទី១៦ សីហាថា កម្ពស់ទឹកស្ទឹងសង្កែ ខេត្តបាត់ដំបង ឡើងដល់កម្រិតប្រកាសឲ្យមានការប្រុងប្រយ័ត្ន ហើយទឹកចាប់ផ្ដើមហូរលិចតំបន់ផ្សារបឹងឈូក ខណៈអាជ្ញាធរកំពុងជួយទប់ស្កាត់។
ក្រសួងអំពាវនាវថា៖«ពលរដ្ឋដែលរស់នៅតាមដងស្ទឹងសង្កែ សូមមានការប្រុងប្រយ័ត្នព្រោះទឹកស្ទឹងសង្កែពេលនេះឡើងដល់កម្រិតប្រកាសអាសន្នហើយ»។
លោក ឡុង ផល្គន ប្រធានមន្ទីរធនធានទឹក ខេត្ដបាត់ដំបង បានឲ្យដឹងថា ដោយសារតែកម្ពស់ទឹកស្ទឹងសង្កែ បានហក់ឡើងខ្លាំងលើសពីសញ្ញាប្រកាសអាសន្ន លោក ងួន រតន: អភិបាលខេត្តបាត់ដំបង បាននិងកំពុងដឹកនាំកម្លាំងចម្រុះ ចុះអន្តរាគមន៍ ទប់ស្កាត់ជំនន់ទឹកស្ទឹងសង្កែ ដែលកំពុងគំរាមកំហែង និងហូរចូលមួយភាគមកក្នុងក្រុងបាត់ដំបង។
លោកបន្ដថា៖«ត្រឹមព្រឹកថ្ងៃទី១៦ ខែសីហា កម្ពស់ទឹកស្ទឹងសង្កែ ខេត្តបាត់ដំបង បានហក់ឡើងដល់កម្ពស់ ១៣,៧៥ ម៉ែត្រ ដែលជាកម្រិតប្រកាសឲ្យមានការប្រុងប្រយ័ត្ន ខណៈដែលតំបន់ផ្សារបឹងឈូក ក្នុងក្រុងបាត់ដំបង ត្រូវបានទឹកជន់លិចជាបណ្ដើរៗ តាមរយៈហូរតាមលូ»។
បើតាមក្រសួងធនធានទឹក នៅថ្ងៃទី១៦ ខែសីហា អាជ្ញាធរ កម្លាំងសមត្ថកិច្ច បូករួមទាំងកម្លាំងយោធារបស់ភូមិភាគទី ៥ ជាច្រើននាក់ កំពុងតែជួយអន្ដរាគមន៍យកបាវខ្សាច់ចំនួន ៥០០០ បាវ ទៅទប់តាមមាត់ស្ទឹងសង្កែនៅត្រង់កន្លែងដែលទាបជាងគេ ក្នុងគោលបំណងការពារទឹកឡើងបន្ដ ហើយហូរចូលក្រុងបាត់ដំបង៕
