ភ្នំពេញៈ ខណៈទឹកជំនន់កំពុងតែបន្តឡើងខ្លាំងកាលពីម្សិលមិញក្នុងតំបន់មួយចំនួននៅតាមបណ្ដោយទន្លេក្នុងរាជធានីភ្នំពេញកំពុងប្រឈមនឹងការជន់លិច និងបានធ្វើឲ្យច្រាំងទន្លេនៅក្នុងភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ បាក់ស្រុតជាង ៥០ ម៉ែត្រធ្វើឲ្យមានការផ្អាកចរាចរណ៍ឆ្លងកាត់តាមផ្លូវមាត់ទន្លេទាំងស្រុង។
លោក ឃ្លាំង ហួត អភិបាលខណ្ឌជ្រោយចង្វារបានប្រាប់ភ្នំពេញ ប៉ុស្ដិ៍ កាលពីថ្ងៃអាទិត្យម្សិលមិញថា គ្រោះមហន្ដរាយធម្មជាតិនេះបណ្ដាលឲ្យបាក់ច្រាំងប្រមាណជាង ៥០ ម៉ែត្រ និងជម្រៅបាក់ចូលជាង ២០ ម៉ែត្របណ្ដាលឲ្យប៉ះពាល់ដល់ផ្លូវលំធ្វើដំណើររបស់ប្រជាពលរដ្ឋនៅទីនោះផងដែរ។
លោកបន្ដ៖ «យើងបានបញ្ជាឲ្យខាងមន្ទីរសាធារណការ និងមន្ទីរធនធានទឹក សហការគ្នាធ្វើហើយការងារហ្នឹង។ ច្រាំងនេះបាក់តាំងពីថ្ងៃសៅរ៍ ប៉ុន្ដែរហូតដល់ថ្ងៃអាទិត្យម្សិលមិញមិនមានការបាក់បន្ថែមទៀតទេ។ យើងបានរៀបចំទប់ស្កាត់បណ្ដោះអាសន្ន ហើយខាងមន្ទីរធនធានទឹក និងមន្ទីរសាធារណការ ដែលជាក្រុមបច្ចេកទេសគាត់នឹងរៀបចំធ្វើយ៉ាងណាឲ្យមានសុវត្ថិភាពនៅកន្លែងកើតហេតុហ្នឹង»។
លោក ឃ្លាំង ហួត ថ្លែងទៀតថាអាជ្ញាធរបានយកដំថ្មធំៗទប់ច្រាំងដែលស្រុតបាក់នោះ ហើយការចំណាយចំពោះការទប់ស្កាត់ការបាក់ច្រាំងនេះគឺជាថវិការបស់សាលាក្រុងភ្នំពេញ។
លោកថ្លែងថា៖ «ប្រហែលជាមិនបាក់ថែមទៀតទេ ព្រោះយើងបានប្រើថ្មធំៗមកទប់គ្រាន់តែចំណាយថវិកាបន្ដិច...មិនមានប៉ះពាល់ដល់ប្រជាពលរដ្ឋទេ យើងក៏បានត្រៀមសម្រាប់ជម្លៀសពួកគាត់ទៅកន្លែងសុវត្ថិភាពដែរ»។
អ្នកស្រី ប្រាក់ សោភា ជាប្រជាពលរដ្ឋមានលំនៅទល់មុខច្រាំងទន្លេបាក់នេះ បានប្រាប់ភ្នំពេញប៉ុស្ដិ៍កាលពីម្សិលមិញដែរថា ក្នុងហេតុការណ៍បាក់ច្រាំងនេះ អ្នកស្រីកំពុងលង់លក់ក្នុងដំណេកជាមួយកូនម៉ោងប្រហែល ១២ យប់ក៏ ឮសំឡេងបាក់ស្រុតខ្លាំងធ្វើឲ្យអ្នកស្រីភ្ញាក់ភ័យញ័រខ្លួនទាំងកណ្ដាលយប់។
អ្នកស្រីថា៖ «ខ្ញុំភ្ញាក់ឡើងញ័រដូចកូនសត្វអ៊ីចឹង ម៉ោងប្រហែល ១២ យប់ ឮសំឡេងបាក់ច្រាំងលាន់គ្រាំង ខ្ញុំភ្ញាក់ឡើងដាស់កូនលែងហ៊ានដេកផ្ទះ ទៅសុំផ្ទះបងប្អូនស្នាក់នៅ។ កុំតែមានអាជ្ញាធរមកពិនិត្យ និងធ្វើការជួសជុលចាក់ថ្ម ឡើងវិញអ៊ីចឹង កុំអីខ្ញុំមិនហ៊ានស្នាក់នៅផ្ទះទៀតទេ។ ខ្ញុំសុខចិត្ដទៅជួលផ្ទះគេស្នាក់វិញ»។
តាមការឲ្យដឹងពីគេហទំព័រផ្លូវការរបស់រដ្ឋបាលសាលារាជធានីភ្នំពេញម្សិលមិញថា បន្ទាប់ពីលោក ឃួង ស្រេង អភិបាលរាជធានីភ្នំពេញ ចុះទៅពិនិត្យករណីបាក់ច្រាំងទន្លេសាបនៅថ្ងៃទី ៤-៥ ខែសីហាឆ្នាំ ២០១៨ នេះមន្ទីរសាធារណការ និងដឹកជញ្ជូនរាជធានីបានសហការជាមួយមន្ទីរធនធានទឹក និងឧតុនិយមរាជធានីចុះវាស់ស្ទង់ និងកំពុងចាក់ក្រាលថ្មធំៗទប់ជើងច្រាំងបាក់ជាបណ្តោះអាសន្ន ដើម្បីទប់ស្កាត់កុំឲ្យបាក់ច្រាំងបន្តទៀត។
សេចក្ដីជូនដំណឹងរបស់សាលារាជធានីបញ្ជាក់ថា៖ «ជាផែនការនៅពេលទឹកស្រកចុងរដូវវស្សានេះមន្ទីរនឹងសិក្សាបច្ចេកទេសដើម្បីពិនិត្យលទ្ធភាពសាងសង់ច្រាំងបេតុងការពារច្រាំងទន្លេនេះតែម្ដង»។
គួរបញ្ជាក់ថា រដូវនេះជារដូវវស្សាទឹកទន្លេនឹងបន្ដហក់ឡើងនៅតាមដងទន្លេមេគង្គ និងទន្លេសាបនៃប្រទេសកម្ពុជា។
តំបន់មួយចំនួននៅតាមទីទំនាបអាចនឹងប្រឈមការលិចលង់ និងបាក់ច្រាំងទន្លេ។ អាជ្ញាធរបានចេញសេចក្ដីប្រកាសជាបន្ដបន្ទាប់ឲ្យប្រជាពលរដ្ឋដែលរស់នៅតាមដងទន្លេ និងក្បែរច្រាំងទន្លេឲ្យមានការប្រុងប្រយ័ត្នខ្ពស់ ដើម្បីបញ្ចៀសគ្រោះថ្នាក់ដោយចៃដន្យណាមួយកើតឡើង៕