ភ្នំពេញៈ ស្ថានភាពកម្រិតទឹកក្នុងទន្លេមេគង្គ និងតាមទន្លេសំខាន់ៗដទៃទៀតនឹងមានការហក់ឡើងវិញក្នុងរយៈពេលប្រមាណជា ៣ ខែទៀតបន្ទាប់ពីទឹកទន្លេនេះបានរីងស្រកប្រមាណជា ២ ឆ្នាំដោយសារឥទ្ធិពលនៃបាតុភូតអ៊ែលនីណូ (Elnino) មិនមែនដោយការបិទទំនប់វារីអគ្គិសនីនៅប្រទេសចិន និងឡាវទេ។ នេះបើតាមមន្ត្រី។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានថ្លែងក្នុងសន្និសីទសារព័ត៌មានកាលពីម្សិលមិញថា កត្តាដែលនាំឲ្យទឹកទន្លេមេគង្គ និងទឹកទន្លេសាបមានកម្រិតទាប គឺមានការពាក់ព័ន្ធយ៉ាងជិតស្និទ្ធទៅនឹងឥទ្ធិពលបាតុភូតអ៊ែលនីណូ ហើយបាតុភូតនេះបានធ្វើឱ្យមានការប៉ះពាល់ទៅនឹងរបបទឹកភ្លៀង ប៉ុន្តែក្នុងរយៈពេលប្រហែលជា ១០ ថ្ងៃក្នុងខែសីហានេះ កម្រិតទឹកក្នុងអាងទន្លេមេគង្គ និងស្ថានីយទន្លេបាសាក់ចតុមុខក្នុងរាជធានីភ្នំពេញ ទឹកបានហក់ឡើងវិញ ទោះបីជាមិនច្រើនក៏ដោយ បន្ទាប់ពីឥទ្ធិពលបាតុភូតអ៊ែលនីណូ បានអូសបន្លាយអស់រយៈពេលប្រមាណជា ២ ឆ្នាំកន្លងមកគឺក្នុងឆ្នាំ ២០១៩ និង ២០២០ នេះ។
លោក យុត្ថា បន្តថា៖ «នេះគឺជាលើកទី ១ បើគិតពីឆ្នាំ ១៩៥១ នៅតំបន់ប៉ាស៊ីហ្វិកខាងលិចដែលនៅក្នុងខែកក្កដាតែងតែមានព្យុះ ២ ឬ ៣ កើតមានឡើង ហើយដែលព្យុះនោះ តិច ឬច្រើន និងមានឥទ្ធិពលទៅលើអាងទន្លេមេគង្គ ឬតំបន់ផ្ទៃរងទឹកភ្លៀងរបស់ទន្លេនេះ។ លោកថា កាលណាមានឥទ្ធិពលគឺនាំឱ្យមានភ្លៀងធ្លាក់»។
លោកបន្ថែមថា ប៉ុន្តែដោយឡែកក្នុងខែកក្កដាឆ្នាំ ២០២០ គឺជាលើកទី ១ ដែលមិនមានព្យុះកើតឡើងក្នុងតំបន់ប៉ាស៊ីហ្វិកខាងលិច ឬសមុទ្រចិនខាងត្បូង ប៉ុន្តែទើបតែឃើញមានព្យុះ ភ្លៀងកើតមានក្នុងដើមខែសីហានេះពីកម្រិតបង្គួរទៅច្រើននៅតំបន់ផ្ទៃរងទឹកភ្លៀងទន្លេមេគង្គ។
លោក តែ ណាវុធ អនុប្រធានអចិន្រៃ្តយ៍នៃគណៈកម្មការទន្លេមេគង្គបានលើកឡើងកាលពីម្សិលមិញថា កម្ពស់ទឹកភ្លៀងតាមការវាស់វែងតាមស្ថានីយចំនួន ១១៩ ស្ថានីយដែលប្រមូលបាននៅប្រទេសថៃ ឡាវ កម្ពុជា និងវៀតណាម រកឃើញថានៅក្នុងរយៈពេល ៧ ខែដើមឆ្នាំ ២០២០ នេះ បរិមាណទឹកភ្លៀងជាមធ្យមមាន ៣៩៧ មិល្លីម៉ែត្រដែលនេះជាកម្រិតទាបខ្លាំង បើធៀបទៅនឹងឆ្នាំ ២០១៨ តិចជាង ៦៧២ មិលី្លម៉ែត្រ និងតិចជាង ២៣១ មិលី្លម៉ែត្រក្នុងឆ្នាំ ២០១៩។
លោក ណាវុធ ថ្លែងថា៖ «បើយោងតាមការព្យាករដោយ The National Aeronautics and Space Administration (NASA) សម្រាប់ ២ ខែបន្ទាប់គឺខែសីហា និងខែកញ្ញាបង្ហាញថានឹងមានទឹកភ្លៀងកើនឡើងលើសកម្រិតមធ្យម ដោយកើនចាប់ពី ៤៥ មិលី្លម៉ែត្រទៅ ១០០ មិល្លីម៉ែត្រក្នុងអាងទន្លេមេគង្គក្រោម។ នេះនឹងជាស្ថានភាពសើមជាងនៅឆ្នាំ ២០១៩»។
លោកបន្តថា នេះបង្ហាញផងដែរថា អាចនឹងកើតមានវិសម្ពាធត្រូពិក (TD) ព្យុះត្រូពិក (TS) ឬព្យុះទីហ្វុង (TY) នៅក្នុងអាងទន្លេមេគង្គក្រោមនៅខែសីហា និងខែកញ្ញា ឆ្នាំ ២០២០។
មន្ត្រីគណៈកម្មាធិការទន្លេមេគង្គរូបនេះបន្ថែមថា ទឹកទន្លេមេគង្គ និងទន្លេសំខាន់ៗដទៃៗទៀតមានកម្រិតទាបនេះគឺមិនមែនដោយសារការបិទទំនប់វារីអគ្គិសនីក្នុងប្រទេសចិន និងឡាវនោះទេ ប៉ុន្តែកត្តាចម្បងគឺពីដើមឆ្នាំ ២០២០ ភ្លៀងធ្លាក់តិចតួច ឥទ្ធិពលបាតុភូតអែលនីណូ ភាពរាំងស្ងួត និងកម្រិតទឹកទាបនៅឆ្នាំ ២០១៩ និងកម្រិតលំហូរទឹកតាមបណ្តាដៃទន្លេមេគង្គ ហូរចូលមកទន្លេមេ មានការធ្លាក់ចុះ៕