The Phnom Penh Post Search

Search form




Logo of Phnom Penh Post newspaper Phnom Penh Post - ទុស្សេ​ខ្សែភ្លើង​នៅ​កំពង់ស្ពឺ​សន្លប់​របួស​កម្មករ​៧នាក់

ទុស្សេ​ខ្សែភ្លើង​នៅ​កំពង់ស្ពឺ​សន្លប់​របួស​កម្មករ​៧នាក់

ទុស្សេ​ខ្សែភ្លើង​នៅ​កំពង់ស្ពឺ​សន្លប់​របួស​កម្មករ​៧នាក់

121107_08
កម្មការិនីរោងចក្រកាត់ដេរដែលរងគ្រោះថ្នាក់ ក្នុងម៉ោងធ្វើការងារកន្លងមក ហុង មិនា

កំពង់ស្ពឺៈ កម្មការិនី​រោងចក្រ​កាត់​ដេរ សាប្រ៊ីណា ៧ នាក់​ក្នុង​ស្រុក​សំរោងទង ខេត្ត​កំពង់ស្ពឺ ខ្លះ​បាន​ដួល​សន្លប់​និង​រយះ​ដៃ​ជើង ដោយ​សារ​មុត​នឹង​កញ្ចក់ ពេល​ភ័យរត់​រក​ច្រក​ចេញ​ក្នុង​ហេតុការណ៍​មាន​ទុស្សេ​ខ្សែ​ភ្លើង​ក្នុង​រោងចក្រ​នេះ​កាលពី​រសៀល​ថ្ងៃ​អង្គារ​ម្សិលមិញ។

លោក ប្រែង ភីរុណ អធិការ​រង​នគរបាល​ស្រុក​សំរោង​ទង កាលពី​ម្សិលមិញ​បាន​ឲ្យ​ដឹង​ថា រោងចក្រ​កាត់ដេរ​សាប្រ៊ីណា មាន​ទីតាំង​ក្នុង​ភូមិ​ត្រពាំង​ឫស្សី​ឃុំ​សំបូរ ស្រុក​សំរោង​ទង ខេត្ត​កំពង់ស្ពឺ បាន​ទុស្សេ​ខ្សែ​ភ្លើង​បណ្តាល​ឲ្យ​កម្មការិនី​៧នាក់ សន្លប់​និង​ខ្លះ​ទៀត​មុត​កញ្ចក់​រយះ​ដៃ​និង​ជើង ដោយ​សារ​តែ​ភ័យ​ឆោឡោ​នាំ​គ្នា​រត់​ទៅ​ប៉ះ​នឹង​ទ្វារ​កញ្ចក់​រោងចក្រ និង​ត្រូវ​រោងចក្រ​ធានា​រ៉ាប់រង​បញ្ជូន​ទៅ​ព្យាបាល​នៅ​មន្ទីរពេទ្យ​ខេត្ត​កំពង់ស្ពឺ។

លោក​បន្ត​ថា៖ «សមត្ថកិច្ច​បាន​ចុះ​ទៅ​ពិនិត្យ​កន្លែង​កើត​ហេតុ​រក​ឃើញ​ថា ខ្សែ​ភ្លើង​ដែល​ទុស្សេ​ឆេះ​នោះ​ត្រូវ​បាន​សន្តិសុខ​ខាង​រោងចក្រ​បាញ់​ពន្លត់ ក្រោយ​ពី​ឆេះ​បែក​ជា​ផ្កា​ភ្លើង​ចេញ​ពី​ពិតាន»។

លោក មួច សំអាង មន្ត្រី​នគរបាល​ផ្នែក​សន្តិសុខ​បាន​ប្រាប់​ដែរ ថា កម្មការិនី​រងគ្រោះ​ទាំង​៧នាក់ មាន​ឈ្មោះ គង់ ស្រីវិន អាយុ​២៥​ឆ្នាំ  យឹម សុរី អាយុ​៣០​ឆ្នាំ  នៅ សាម៉ន អាយុ ៣៥​ឆ្នាំ  ហាង ណារី អាយុ​២៤​ឆ្នាំ  បូក សុខនី អាយុ​១៨​ឆ្នាំ ដួង ជួន អាយុ​១៩​ឆ្នាំ​និង​ហ៊ុល សាវឺន អាយុ​៣៧​ឆ្នាំ​សុទ្ធ​តែ​ជា​អ្នក​នៅ​ខេត្ត​កំពង់ស្ពឺ។

លោក​ឲ្យ​ដឹង​បន្ត​ថា នៅ​ម៉ោង​៤រសៀល ពេល​កម្មករ​កំពុង​ធ្វើ​ការ​ក្នុង​រោងចក្រ ស្រាប់​តែ​មាន​ផ្សែង​ហុយ និង​បែក​ផ្កា​ភ្លើង​ចេញពី​ពិតាន​អគារ កម្មករ​ផ្អើល​ឆោ​ឡា​បាន​រត់​ចេញ​ប្រជែង​គ្នា​ធ្វើ​ឲ្យ​ប៉ះ​នឹង​ទ្វារ​កញ្ចក់​របួស​និង​ដួល​សន្លប់ ខ្លះ ហើយ​ត្រូវ ខាង​រោងចក្រ​យក​រថយន្ត​ដឹក​បញ្ជូន​ទៅ​កាន់​មន្ទីរពេទ្យ​ខេត្ត​ដើម្បី​សង្គ្រោះ។

អ្នក​តំណាង​រោងចក្រ​មិន​អាច​ទាក់ទង​សុំ​បញ្ជាក់​ពី​ករណី​នេះ​បាន​ទេ កាលពី​ម្សិលមិញ។

លោក ស ម៉ូរ៉ា ប្រធាន​សហជីព​កម្មករ​ចំណី​អាហារ​និង​សេវាកម្ម​កម្ពុជា​យល់​ឃើញ​ថា បញ្ហា​កម្មករ​ដែល​រងគ្រោះ​ក្នុង​ម៉ោង​បំពេញ​ការងារ​បែប​នេះ តែង​កើត​មាន​ជា​រឿយៗ មូលហេតុ​គឺ​មក​ពី​ការ​សាងសង់​រោងចក្រ​ពុំ​មាន​ប្រព័ន្ធ​សុវត្ថិភាព​ត្រឹមត្រូវ។

លោក​បន្ត​ថា៖ «គ្មាន​ការ​រៀបចំ​ប្រព័ន្ធ​ការងារ​ឲ្យ​មាន​សុវត្ថិភាព ទេ ដូចជា រោងចក្រ​ចង្អៀត​ពុំ​មាន​ខ្យល់​ចេញ​ចូល​គ្រប់គ្រាន់...ដែល​បញ្ហា​នេះ​រោងចក្រ​ភាគច្រើន​មិន​បាន​ខ្វាយខ្វល់​នោះ​ទេ ព្រោះ​ខាង អធិការ​កិច្ច​នៃ​ក្រសួង​ការងារ​នៅ​ខ្សោយ​ក្នុង​ការ​ត្រួត​ពិនិត្យ​គឺ​គ្រាន់​តែ​ទៅ​អើតៗ​ហើយ​មក​វិញ»។

លោក​បញ្ជាក់​ដែរ​ថា មាន​រោងចក្រ​កាត់ដេរ​ធំៗ​ប្រមាណ​ជាង ២០០ ដែល​មាន​អាជ្ញាប័ណ្ណ​នាំ​ចេញ ក្នុង​នេះ​មាន​៦០​ទៅ​៧០​ភាគរយ មាន​ប្រព័ន្ធ​សុវត្ថិភាព​ការងារ​ត្រឹមត្រូវ ប៉ុន្តែ​រោងចក្រ​កាត់ដេរ​ពី​៣០​ទៅ​៤០​ភាគរយ​ទៀត ពុំ​មាន​ប្រព័ន្ធ​សុវត្ថិភាព​ការងារ​ទេ ព្រោះ​ជា​រោងចក្រ​តូចៗ ជួល​បន្ត​ពី​គេ ហើយ​ថៅកែ​ក៏​មិន​បាន​គិត​គូរ​ពី​សុវត្ថិភាព​កម្មករ​ដែរ​ទេ។ លោក​ថា តាម​ច្បាប់​ការងារ​រាល់​សហគ្រាស ដែល​មាន​កម្មករ​ចាប់​ពី​៨នាក់​ឡើង​ទៅ​គឺ​តម្រូវ​ឲ្យ​មាន​ការ​រៀបចំ​ប្រព័ន្ធ​សុវត្ថិភាព​ការងារ​ជា​ចាំបាច់៕

អត្ថបទគួរចាប់អារម្មណ៍