ភ្នំពេញៈ ស្ថានទូតកម្ពុជាប្រចាំប្រទេសម៉ាឡេស៊ីបានជួយអន្តរាគមន៍ដល់ពលការិនីខ្មែរ ២ រូប ដែលបម្រើការងារនៅប្រទេសម៉ាឡេស៊ីឱ្យវិលត្រឡប់មកប្រទេសកម្ពុជាវិញ ក្រោយពីពួកគេត្រូវបាននិយោជក វាយធ្វើបាប និងមិនបើកប្រាក់ខែឱ្យ។
លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិប្រាប់ ភ្នំពេញ ប៉ុស្តិ៍ នៅថ្ងៃទី ៥ ខែតុលា ថា ក្រោមកិច្ចជួយអន្តរាគមន៍ពីស្ថានទូតកម្ពុជាប្រចាំប្រទេសម៉ាឡេស៊ី ពលការិនីឈ្មោះ ងួន វ៉ាន់ អាយុ ៣១ ឆ្នាំ និងពលការិនីឈ្មោះ ឯល ម៉ារី អាយុ ៣២ ឆ្នាំ ដែលអ្នកទាំង ២ បានរងការវាយធ្វើបាបពីនិយោជក ជនជាតិម៉ាឡេស៊ី ត្រូវបានធ្វើមាតុភូមិនិវត្តន៍មកកាន់ប្រទេសកម្ពុជា កាលពីល្ងាចថ្ងៃទី ៤ ខែ តុលា ឆ្នាំ ២០២០។ បើតាមលោក កុយ គួង នៅពេលនេះពលការិនីទាំង ២ នាក់ បានទៅដល់លំនៅឋានរបស់ពួកគេរៀងៗខ្លួន ដោយសុវត្ថិភាពហើយ។
យោងតាមឯកសារដែល ភ្នំពេញ ប៉ុស្តិ៍ ទទួលបានកាលពីថ្ងៃទី ៥ ខែតុលា ពលការិនីឈ្មោះ ងួន វ៉ាន់ មានលំនៅភូមិស្យា ឃុំកណ្ដៀង ស្រុកកណ្ដៀង ខេត្តពោធិ៍សាត់ បានទៅធ្វើការងារផ្ទះដោយស្របច្បាប់ជាមួយនិយោជក ឈ្មោះ Wing SaiLoong នៅទីក្រុងគូឡាឡាំពួ ប្រទេសម៉ាឡេស៊ីតាមរយៈក្រុមហ៊ុនឈ្មោះ CECH កាលពីឆ្នាំ ២០១០។
ឯកសារបានគូសបញ្ជាក់ថា៖ «ដោយចង់ត្រឡប់មកកម្ពុជាវិញ វ៉ាន់ បានរត់ចេញពីផ្ទះនិយោជក និងបានមកដល់ស្ថានទូតនៅថ្ងៃទី ២១ ខែ កញ្ញា ឆ្នាំ ២០២០។ ស្ថានទូតបានជួយសម្របសម្រួលទាមទារប្រាក់ខែនៅខ្វះពីនិយោជកចំនួន ៣៨ ៨០០ រីងហ្គីត ប្រមាណ ៩ ពាន់ដុល្លារអាមេរិក និងស្នើនិយោជករៀបចំឯកសារពាក់ព័ន្ធទៅអគ្គនាយកដ្ឋានអន្តោប្រវេសន៍ម៉ាឡេស៊ី ដើម្បីឱ្យនាងអាចត្រឡប់មកកម្ពុជាបាន»។
ក្នុងអំឡុងពេលនៃការរង់ចាំត្រឡប់មកកម្ពុជាវិញ ស្ថានទូតក៏បានផ្ដល់កន្លែងស្នាក់នៅ និងម្ហូបអាហារដល់នាងព្រមទាំងចាត់មន្ត្រីជូនដំណើរនាងទៅកាន់អាកាសយានដ្ឋានអន្តរជាតិ KLAI ផងដែរ។ តាមឯកសារដដែល ពលការិនីឈ្មោះ ឯល ម៉ារី ដែលមានលំនៅក្នុងខណ្ឌជ្រោយចង្វារ រាជធានីភ្នំពេញបានទៅធ្វើការងារផ្ទះ «ដោយខុសច្បាប់» នៅ Bentong រដ្ឋ Pahang កាលពីខែមីនា ឆ្នាំ ២០១៨ តាមរយៈមេខ្យល់ឈ្មោះ ហាសាណាស់។
នៅទីនោះ ម៉ារី ត្រូវនិយោជកប្រើឱ្យធ្វើការងារផ្ទះ និងជួយលក់ខោអាវ គ្មានពេលសម្រាក និងមិនផ្ដល់ការហូបចុកគ្រប់គ្រាន់ទេ។ ប្រភពបញ្ជាក់ថា៖ «នាងបានរត់ចេញពីផ្ទះនិយោជកនៅថ្ងៃទី ២ ខែឧសភា ឆ្នាំ ២០២០ បន្ទាប់ពីត្រូវបាននិយោជក វាយធ្វើបាបជាប្រចាំ និងមានស្នាមរបួសពេញដៃជើង ហើយជាចុងក្រោយនាងត្រូវបាននិយោជក វាយបាក់ធ្មេញមុខអស់ ២»។
នៅតាមផ្លូវ នាងបានរត់ទៅជួបអ្នកទទួលខុសត្រូវមជ្ឈមណ្ឌលសាសនាម្នាក់ឈ្មោះ មហាម៉េត អាសាំអាស៊ីមូត និងបានសូមឱ្យគាត់ជួយ ហើយនាងត្រូវបានអ្នកទទួលខុសត្រូវនៅមជ្ឈមណ្ឌលនោះនាំទៅដាក់ពាក្យប្ដឹងប៉ូលិសនៅតំបន់នោះ។ បន្ទាប់មក និយោជកដែលនាងធ្វើការជាមួយនោះ ត្រូវប៉ូលិសចាប់ខ្លួន និងចោទប្រកាន់ពីបទ «ប្រើប្រាស់ការងារដោយបង្ខំ» និងកំពុងដំណើរការក្តីនៅតុលាការ។ នេះបើតាមឯកសារខាងលើ។
ប្រភពដដែលបន្តថា ក្រោយទទួលបានការជួយអន្តរាគមន៍ នាងត្រូវបានអនុញ្ញាតឱ្យស្នាក់នៅក្នុងមជ្ឈមណ្ឌលមួយរបស់រដ្ឋាភិបាលម៉ាឡេស៊ី។ ចំពោះប្រាក់ខែ និងសំណងផ្សេងៗ អាជ្ញាធរម៉ាឡេស៊ីនឹងរៀបចំទៅតាមការសម្រេចរបស់តុលាការនៅពេលបញ្ចប់ការកាត់ក្តី ដែលត្រូវធ្វើឡើងនៅថ្ងៃទី ២៥ វិច្ឆិកា ឆ្នាំនេះ។
ប៉ុន្តែដោយនាង និងគ្រួសារនៅកម្ពុជា ក្រីក្រខ្លាំង អង្គការសម្ព័ន្ធចាប់ដៃនៅកម្ពុជាក៏បានជួយទិញសំបុត្រយន្តហោះជូននាងឱ្យបានវិលត្រឡប់មកកាន់កម្ពុជាវិញផងដែរ៕