ខេត្តសៀមរាបៈ លោក W. Patrick Murphy ឯកអគ្គរដ្ឋទូតនៃសហរដ្ឋអាមេរិកប្រចាំនៅព្រះរាជាណាចក្រកម្ពុជាកាលពីថ្ងៃទី ១៨ ខែមករា បានបើកសម្ពោធមជ្ឈមណ្ឌលផ្តល់ប្រឹក្សាស្តីពីការស្វែងរកព័ត៌មានអំពីការអប់រំនៅសហរដ្ឋអាមេរិកនៅក្នុងសាកលវិទ្យាល័យបញ្ញាសាស្ត្រកម្ពុជាក្នុងខេត្តសៀមរាប ដែលជាមជ្ឈមណ្ឌលទី៣ នៅកម្ពុជា។ ក្រោមជំនួយគាំទ្រពីថវិការបស់ក្រសួងការបរទេសសហរដ្ឋអាមេរិក។
លោក Patrick Murphy ថ្លែងថា៖ «មជ្ឈមណ្ឌលថ្មីនេះ គឺជាកន្លែងដែលឪពុកម្តាយ អាណាព្យាបាល និងសិស្ស និស្សិតអាចមកទទួលការផ្តល់ប្រឹក្សាដោយផ្ទាល់ ដើម្បីស្វែងយល់ពីការសិក្សានៅក្នុងសហរដ្ឋអាមេរិក។ មជ្ឈមណ្ឌលនេះផ្តល់ការណែនាំស្តីពីរបៀបស្វែងរកមើលសាកលវិទ្យាល័យនានា និងឱកាសអាហារូបករណ៍ ផ្តល់ព័ត៌មានស្តីពីកម្មវិធីដែលឧបត្ថម្ភដោយរដ្ឋាភិបាលសហរដ្ឋអាមេរិក ហើយផ្តល់ប្រឹក្សាក្នុងការដាក់ពាក្យ និងសរសេរពាក្យសុំចូលរៀននៅតាមមហាវិទ្យាល័យនៅទីនោះ»។
លោក Murphy បានឱ្យដឹងថា កន្លងមកមជ្ឈមណ្ឌលផ្តល់ប្រឹក្សាស្តីពីការអប់រំនៅសហរដ្ឋអាមេរិកមានចំនួន ២ រួចមកហើយនៅក្នុងរាជធានីភ្នំពេញ ដោយមានទីតាំងមួយស្ថិតនៅក្នុងស្ថានទូតសហរដ្ឋអាមេរិក និងមួយទៀតស្ថិតនៅក្នុងសាកលវិទ្យាល័យបញ្ញាសាស្ត្រកម្ពុជា។
លោក Murphy បញ្ជាក់ថាក្រោមជំនួយគាំទ្រពីថវិការបស់ក្រសួងការបរទេសសហរដ្ឋអាមេរិក មជ្ឈមណ្ឌលផ្តល់ព័ត៌មានទាន់ពេល ច្បាស់លាស់ ពេញលេញ មិនលម្អៀង និងត្រឹមត្រូវស្តីពីស្ថាប័នអប់រំក្នុងសហរដ្ឋអាមេរិក ហើយផុ្តល់ការណែនាំចំពោះអ្នកដែលមានលក្ខណសម្បត្តិគ្រប់គ្រាន់ឱ្យចាប់យកឱកាសទាំងនោះ។
លោក Patrick Murphy សង្ឃឹមថានឹងមានកំណើននៃនិស្សិតកម្ពុជាបន្ថែមទៀត ទៅសិក្សានៅក្នុងសហរដ្ឋអាមេរិក ពិសេសអ្នករស់នៅតាមបណ្តាខេត្ត ក្រៅពីរាជធានីភ្នំពេញ។
របាយការណ៍អប់រំឆ្នាំ ២០២០ របស់វេបសាយ Open Door ស្តីពីការផ្លាស់ប្តូរលើការសិក្សាអប់រំជាអន្តរជាតិ បានបង្ហាញឱ្យដឹងថា មាននិស្សិតកម្ពុជាចំនួន ៧៤២ នាក់ បានសិក្សានៅក្នុងសហរដ្ឋអាមេរិកនៅឆ្នាំសិក្សា ២០១៩-២០២០។ ចំនួននេះគឺកើនជាង ៨% លើសឆ្នាំមុន ដែលបង្ហាញពីការបន្តនូវកំណើនជាវិជ្ជមានក្នុងរយៈពេល ៦ ឆ្នាំកន្លងមកនេះ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជាប្រាប់ ភ្នំពេញ ប៉ុស្តិ៍ កាលពីម្សិលមិញថា ទំនាក់ទំនងរវាងកម្ពុជា និងសហរដ្ឋអាមេរិកលើវិស័យអប់រំក្នុងពេលកន្លងទៅមានភាពល្អប្រសើរដោយសារតែសហរដ្ឋអាមេរិកបានជួយកម្ពុជាច្រើនពាក់ព័ន្ធវិស័យអប់រំខុសពីបញ្ហានយោបាយដែលមានការរកាំរកូស។
លោក ភា ថ្លែងថា៖ «ទំនាក់ទំនងរវាងកម្ពុជា និងអាមេរិកក្នុងវិស័យអប់រំ ខ្ញុំយល់ថាល្អ ដោយសារតែសហរដ្ឋអាមេរិកក៏បានជួយកម្ពុជាច្រើនដែរលើវិស័យអប់រំ ព្រោះវាជាវិស័យមួយដែលមិនមានលក្ខណៈរសើបទេ ខុសពីវិស័យនយោបាយដែលយើងមើលទៅឃើញថា មានការចម្រូងចម្រាសបន្តិច»។
លោក ជា សានច័ន្ទថន អធិការបតីសាកលវិទ្យាល័យបញ្ញាសាស្ត្រកម្ពុជា ថ្លែងថា មជ្ឈមណ្ឌលផ្តល់ប្រឹក្សាស្តីពីការអប់រំនៅសហរដ្ឋអាមេរិកគឺជាមជ្ឈមណ្ឌលមួយដ៏សំខាន់សម្រាប់និស្សិតខ្មែរ ជាពិសេសសិស្សដែលទើបបញ្ចប់ថ្នាក់ទី-១២ ដែលអាចទទួលបានព័ត៌មានពីអាហារូបករណ៍ ឬព័ត៌មានពីសាកលវិទ្យាល័យនានានៅសហរដ្ឋអាមេរិក ហើយមានការផ្តល់ប្រឹក្សាជារៀងរាល់ថ្ងៃ ដោយសាស្ត្រាចារ្យដែលមានបទពិសោធផ្ទាល់។ សម្រាប់ការណែនាំសិស្សនិស្សិតគឺបើកឡើង ៧ ថ្ងៃតែម្តង៕