.jpg)
លោក William A. Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដែលនឹងចប់អាណត្តិ។
ភ្នំពេញៈ លោក William A. Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដែលនឹងចប់អាណត្តិនាពេលខាងមុខនេះបានអះអាងថា លោកនឹងបន្តលើកយកការស្នើសុំឱ្យរដ្ឋាភិបាលអាមេរិកពិនិត្យលទ្ធភាពសម្រួល ឬក៏ដកចេញនូវទណ្ឌកម្មទិដ្ឋាការដែលបានដាក់មកលើមន្ត្រីរដ្ឋាភិបាលកម្ពុជាមួយចំនួនដែលការលើកឡើងនេះធ្វើនៅក្នុងជំនួបពិភាក្សា និងជម្រាបលាជាមួយលោក ស ខេង រដ្ឋមន្ត្រីក្រសួងមហាផ្ទៃកាលពីម្សិលមិញនៅទីស្តីការក្រសួង។
លោក ផាត សុផានិត អ្នកនាំពាក្យរងក្រសួងមហាផ្ទៃប្រាប់ក្រុមអ្នកសារព័ត៌មានថាលោក William A. Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជាបានស្នើសុំឱ្យរដ្ឋាភិបាលសហរដ្ឋអាមេរិកពិនិត្យលទ្ធភាពសម្រួល ឬក៏ដកចេញនូវទណ្ឌកម្មទិដ្ឋាការមកលើមន្ត្រីរដ្ឋាភិបាលកម្ពុជា។
លោក សុផានិត ថាបើទោះបីរហូតមកដល់ពេលនេះលោកឯកអគ្គរដ្ឋទូតនៅមិនទាន់ទទួលការឆ្លើយតបពីខាងអន្តោប្រវេសន៍សហរដ្ឋអាមេរិកក៏ដោយ លោកនឹងនៅតែបន្តលើកយកទៅពិភាក្សាជាមួយរដ្ឋាភិបាលអាមេរិកនៅពេលដែលលោកត្រឡប់ទៅកាន់ប្រទេសខ្លួនវិញ។
លោក សុផានិត ថ្លែងថា៖ «ក្នុងនាមឯកឧត្តមផ្ទាល់ខ្លួនបានស្នើជាយោបល់ថា គួរសហរដ្ឋអាមេរិកអាចពិនិត្យលទ្ធភាពសម្រួល ឬក៏ដកចេញនូវទណ្ឌកម្ម visa ដែលបានដាក់មកលើមន្ត្រីរបស់កម្ពុជាមួយចំនួន ហើយទោះបីជាមកដល់ពេលនេះឯកឧត្តមមិនទាន់ទទួលបានការឆ្លើយតបយ៉ាងណាពីខាងអន្តោប្រវេសន៍សហរដ្ឋអាមេរិក ក៏ប៉ុន្តែឯកឧត្តមក៏នឹងបន្តយកបញ្ហានេះទៅជជែកជាមួយខាងសហរដ្ឋអាមេរិក»។
លោកបន្តថាជាការឆ្លើយតបលោក ស ខេង បានសម្ដែងនូវការអរគុណចំពោះឯកអគ្គរដ្ឋទូតដែលបានស្នើឱ្យរដ្ឋាភិបាលអាមេរិកពិនិត្យលទ្ធភាពសម្រួល ឬក៏ដកចេញនូវទណ្ឌកម្មទិដ្ឋាការទៅលើមន្ត្រីរដ្ឋាភិបាលកម្ពុជាមួយចំនួន ហើយលោកបានអះអាងថា ប្រសិនបើរដ្ឋាភិបាលអាមេរិកលុបចោលនូវបម្រាមនោះបាន នេះជាការផ្ដល់កាដូមួយសម្រាប់កម្ពុជា ដើម្បីលើកកម្ពស់នូវទំនាក់ទំនងកិច្ចសហប្រតិបត្តិការរវាងប្រទេសទាំង ២ ឡើងវិញ។
លោកថ្លែងថា៖ «សម្តេច [ស ខេង] ក៏បានលើកឡើងថាសម្រាប់រាជរដ្ឋាភិបាលកម្ពុជាជាគោលការណ៍យើងមិនមានអ្វីប្រែប្រួលទេគឺនឹងបន្តអនុវត្តតាមអ្វីដែលបានព្រមព្រៀងគ្នា»។
លោក សុផានិត បន្ថែមថាលោក William A. Heidt បានថ្លែងអំណរគុណដល់កម្ពុជាដែលបន្តអនុវត្តការធ្វើមាតុភូមិនិវត្តន៍ពលរដ្ឋខ្មែរពីសហរដ្ឋអាមេរិកស្របតាមស្មារតី MoU ដែលរដ្ឋាភិបាលនៃប្រទេសទាំង ២ បានចុះហត្ថលេខាជាមួយគ្នា៕
