.jpg)
លោក Partick និងលោក ប្រាក់ សុខុន។ ហុង មិនា
ភ្នំពេញៈ ស្ថានទូតសហរដ្ឋអាមេរិកប្រចាំកម្ពុជាកាលពីម្សិលមិញបានប្រារព្ធខួបទី ៧០ នៃទំនាក់ទំនងការទូតជាមួយកម្ពុជាដោយប្រកាសនូវសកម្មភាពសំខាន់ៗដែលស្ថានទូតនឹងរៀបចំឡើងក្នុងរយៈពេល ១២ ខែក្នុងឆ្នាំ ២០២០ នេះ។ សកម្មភាពទាំងនេះបង្ហាញពីការចូលរួមរបស់អាមេរិកក្នុងការអភិវឌ្ឍនៅកម្ពុជា និងភាពជាដៃគូរនៃប្រទេសទាំង ២។
យោងតាមសេចក្ដីប្រកាសព័ត៌មានរបស់ស្ថានទូតអាមេរិកសកម្មភាពសំខាន់ៗនៅក្នុងខែនីមួយៗក្នុងឆ្នាំ ២០២០ នេះនឹងគ្របដណ្ដប់លើប្រធានបទជាច្រើនរាប់ចាប់ពីកសិកម្ម ការអប់រំ បច្ចេកវិទ្យា ស្ត្រី និងភាពស្មើគ្នាផ្នែកយេនឌ័រ បរិស្ថាន សុខភាពសាធារណៈ និងទំនាក់ទំនងប្រជាជន និងប្រជាជន។ ប្រធានបទផ្សេងទៀតដែលស្ថានទូតនឹងធ្វើរួមមានពាណិជ្ជកម្ម និងវិនិយោគ ជំនួយមនុស្សធម៌ ការអនុវត្តច្បាប់ សហប្រតិបត្តិការក្នុងតំបន់ និងអាស៊ាន។ ក្រៅពីនេះប្រធានបទពាក់ព័ន្ធនឹងសិទ្ធិមនុស្ស និងប្រជាធិបតេយ្យក៏ត្រូវបានបញ្ជូលនៅក្នុងផែនការសកម្មភាពរបស់ខ្លួនផងដែរសម្រាប់ខែធ្នូ។
ការប្រារព្ធខួបទី ៧០ នៃទំនាក់ទំនងការទូតប្រទេសទាំង ២ ចាប់ផ្ដើមដោយស្ថានទូតបានធ្វើដំណើរតាមរ៉ឺម៉កកង់ ៣ ចំនួន ២៥ គ្រឿងចេញពីស្ថានទូតទៅវត្តភ្នំ ដើម្បីបួងសួងនៅទីនោះ ហើយត្រឡប់ទៅកាន់ Future Factory នៅខណ្ឌដូនពេញក្នុងរាជធានីភ្នំពេញ។
លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាបានថ្លែងថា សហរដ្ឋអាមេរិក និងកម្ពុជាបានបង្កើតទំនាក់ទំនងការទូតលើកដំបូងនៅឆ្នាំ ១៩៥០ គឺ ៣ ឆ្នាំមុនពេលកម្ពុជាទទួលបានឯករាជ្យ។ ចំណងការទូតនៅធ្វើឡើងដោយមន្ត្រីការទូតសហរដ្ឋអាមេរិក Donald Heath ដែលកាលនោះមានមូលដ្ឋាននៅទីក្រុងសៃហ្គន។ លោក Donald Heath បានបង្ហាញសារតាំងរបស់លោកនៅពេលនោះថ្វាយដល់សម្ដេចព្រះបរមរតនកោដ្ឋ នរោត្តម សីហនុ។
លោក Patrick Murphy បន្តថា ស្ថានទូតសហរដ្ឋអាមេរិកបានធ្វើការអស់រយៈពេលជាច្រើនក្នុងការជួយដល់រដ្ឋាភិបាលកម្ពុជាធ្វើការពង្រឹងដល់បច្ចេកវិទ្យាកសិកម្ម (AG technologies)។ នៅប៉ុន្មានសប្ដាហ៍ខាងមុខ ក្រុមហ៊ុនមួយចំនួនពីសហរដ្ឋអាមេរិកនឹងមកកម្ពុជាដើម្បីចូលរួមក្នុងកម្មវិធីមួយឈ្មោះថា «ប្រតិភូពាណិជ្ជកម្ម AG»។
លោកបានថ្លែងថា៖ «យើងនឹងពឹងផ្អែកលើដៃគូរបស់យើងជាច្រើនដែលពេលនេះនៅទីនេះ ដើម្បីធ្វើឲ្យសម្រេចបាននូវការប្រារព្ធបុណ្យខួបដែលមានរយៈពេល ១ ឆ្នាំពេញ។ ដៃគូនានារួមមានអង្គការក្រៅរដ្ឋាភិបាលអ្នកបញ្ចប់ការសិក្សាពីសហរដ្ឋអាមេរិកក្នុងកម្មវិធីផ្លាស់ប្ដូរការសិក្សាពីសាកលវិទ្យាល័យ អ្នកមានវិជ្ជាជីវៈ ធុរកិច្ចអាមេរិកាំង និងមន្ត្រីរដ្ឋាភិបាលផងដែរ។ ការរួមចំណែករបស់សហរដ្ឋអាមេរិកនៅកម្ពុជា កើតមានទៅបានអាស្រ័យដោយពួកគាត់ទាំងនេះ ហើយក៏ដោយសារប្រជាពលរដ្ឋកម្ពុជាផងដែរ ហើយក៏ដោយសារតែសហគមន៍ខ្មែរអាមេរិកាំង អង្គទូត និងមន្ត្រីការទូតនានាដែលជំរុញដល់ពួកយើង»។
លោ Patrick Murphy បានបន្តថា ពេញ ១ ឆ្នាំ ២០២០ នេះ ស្ថានទូតនឹងរៀបចំព្រឹត្តិការណ៍សាធារណៈជាច្រើនដើម្បីបង្ហាញភាពជាដៃគូ ដែលព្រឹត្តិការណ៍ទាំងនោះរួមមានការប្រគំតន្ត្រី សន្និសីទ និងកម្មវិធីថ្មីៗទៀត។ នៅខែកក្កដាជាខែដែលសហរដ្ឋអាមេរិករៀបចំបុណ្យឯករាជ្យជាតិ និងរៀបចំរំឭកខួបនៃទំនាក់ទំនងអាមេរិក និងកម្ពុជា ស្ថានទូតនឹងរៀបចំកម្មវិធីពេញ ១ ខែដើម្បីរំឭកដល់ខួបនៃទំនាក់ទំនងការទូតនេះ។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងកាលពីម្សិលមិញថា ភាពរកាំរកូសដែលមានកន្លងមកគឺជារឿងធម្មតាទេរវាងប្រជាជាតិមួយ និងប្រជាជាតិមួយទៀតដែលភាគីទាំងសងខាងមានផលប្រយោជន៍រៀងៗខ្លួន និងអធិបតេយ្យភាពរៀងៗខ្លួន»។
លោកបន្តថា៖ «យើងនៅតែមើលឃើញសហរដ្ឋអាមេរិកគឺជាដៃគូដ៏ល្អក្នុងកិច្ចសហប្រតិបត្តិការ និងពង្រឹងទំនាក់ទំនងល្អ»។
លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងក្នុងពិធីប្រារព្ធខួប ៧០ នៃទំនាក់ទំនងការទូតនេះថា ទំនាក់ទំនងរយៈពេល ៧០ ឆ្នាំ ជារយៈពេលវែងមួយហើយ ប៉ុន្តែអ្វីដែលសំខាន់គឺការខិតខំប្រឹងប្រែងដើម្បីឲ្យទំនាក់ទំនងនោះយល់គ្នាបានច្បាស់ និងគោរពគ្នាទៅវិញទៅមក និងស្វែងរកចំណុចរួមមួយ និងការផ្ដោតការយកចិត្តទុកដាក់ឆ្ពោះទៅរកប្រវត្តិសាស្ត្រសម័យថ្មី។
លោក ប្រាក់ សុខុន ក៏បានកោតសរសើរដល់ទំនាក់ទំនងពាណិជ្ជកម្មរបស់កម្ពុជាអាមេរិក ជាពិសេសការនាំចេញផលិតផលសម្លៀកបំពាក់ និងស្បែកជើង និងសម្ភារសម្រាប់ការធ្វើដំណើរដែលមានទឹកប្រាក់សរុប ៥ ពាន់លានដុល្លារ។ ទាំងនេះបានធ្វើឲ្យមានលទ្ធផលវិជ្ជមានដល់កម្មករកម្ពុជា។ លោកក៏បានកោតសរសើរដល់ជំនួយនានារបស់សហរដ្ឋអាមេរិកជាពិសេសជំនួយក្នុងការជួសជុលប្រាសាទបុរាណ។
លោក ប្រាក់ សុខុន ថ្លែងថា៖ «កម្ពុជាបញ្ជាក់ជំហរធ្វើការជាមួយសហរដ្ឋអាមេរិកដ៏ជិតស្និទ្ធ ដោយគោរពលើការយល់គ្នាទៅវិញទៅមក និងការគោរពគ្នាទៅវិញទៅមក ហើយយើងត្រៀមខ្លួនរួចហើយក្នុងការធ្វើឲ្យរស់ឡើងវិញទំនាក់ទំនងរបស់យើង និងស្វែងរកចំណុចមានសក្ដានុពលនៃទំនាក់ទំនងរបស់យើង ដើម្បីជាប្រយោជន៍រួមនៃប្រជាជនទាំង ២ របស់យើង»។
លោកបញ្ជាក់ថា ការផ្ញើលិខិតទៅវិញទៅមករវាងលោក ត្រាំ និងលោកនាយករដ្ឋមន្ត្រី ហ៊ុន សែន បានបង្ហាញនូវការធ្វើកិច្ចសហការថ្មី និងមិត្តភាពថ្មីរវាងប្រទេសទាំង ២។ អ្នកវិភាគនយោបាយ លោក ឡៅ ម៉ុងហៃ ថ្លែងថាការរៀបចំខួបនៃទំនាក់ទំនងប្រទេសទាំង ២ នេះមានន័យថា គឺជាការធ្វើទំនាក់ទំនងឡើងវិញ និងធ្វើឲ្យកាន់តែរឹងមាំ។ ដូច្នេះការប្រារព្ធខួបនេះគឺជាដំណាក់កាលមួយទៀតក្នុងការធ្វើឲ្យប្រសើរឡើងទំនាក់ទំនងអាមេរិក និងកម្ពុជា៕
