.jpg)
លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ថ្លែងក្នុងពិធីប្រារព្ធខួបទី ៧០ នៃទំនាក់ទំនងការទូតរវាងសហរដ្ឋអាមេរិក និងព្រះរាជាណាចក្រកម្ពុជាកាលពីល្ងាចថ្ងៃពុធ។ ហុង មិនា
ភ្នំពេញៈ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក Patrick Murphy នៅថ្ងៃទី ៨ មករា បានកោតសរសើរពីការរីកចម្រើននៃប្រទេសមួយនេះហើយអះអាងថា កម្ពុជា និងសហរដ្ឋអាមេរិកដែលមានមូលដ្ឋានគ្រឹះនៃកិច្ចសហប្រតិបត្តិការ និងមានទំនាក់ទំនងល្អនឹងជួយពង្រឹងទំនាក់ទំនងទ្វេភាគីឲ្យកាន់តែល្អប្រសើរ។
លោក Patrick Murphy ថ្លែងដូច្នេះទៅកាន់អ្នកសារព័ត៌មានក្នុងពិធីប្រារព្ធខួបទី ៧០ នៃទំនាក់ទំនងការទូតរវាងសហរដ្ឋអាមេរិក និងព្រះរាជាណាចក្រកម្ពុជាកាលពីល្ងាចថ្ងៃពុធក្នុងបរិវេណ Future Factory ក្នុងខណ្ឌដូនពេញ រាជធានីភ្នំពេញដែលមានការចូលរួមពីមន្ត្រីជាន់ខ្ពស់កម្ពុជាជាច្រើនផងដែរ។
លោកលើកឡើងថា ប្រទេសទាំង ២ មានមូលដ្ឋានគ្រឹះនៃកិច្ចសហប្រតិបត្តិការ និងទំនាក់ទំនងល្អដែលមានស្រាប់ ដើម្បីជួយឲ្យមានទំនាក់ទំនងល្អ និងរីកចម្រើនទៅមុខទៀត។ មូលដ្ឋានគ្រឹះរឹងមាំនេះក៏នឹងជួយបោះជំហានទៅរកការសហការគ្នាក្នុងការដោះស្រាយការលំបាក និងការខ្វែងគំនិតគ្នាដែលធ្លាប់មាននាពេលកន្លងមក។
លោកបញ្ជាក់ថា៖ «យើងមានមូលដ្ឋានគ្រឹះនៃកិច្ចសហប្រតិបត្តិការល្អ និងទំនាក់ទំនងល្អ ដូច្នេះយើងផ្តោតទៅលើគ្រឹះនេះដើម្បីឲ្យទំនាក់ទំនងរបស់យើងរីកចម្រើនទៅមុខទៀតទាំងវិស័យវប្បធម៌ក្តី សេដ្ឋកិច្ចក្តី និងវិស័យផ្សេងៗទៀត។ ជាមួយនឹងមូលដ្ឋានគ្រឹះរឹងមាំនេះយើងអាចធ្វើការច្រើន ដើម្បីកែលម្អលទ្ធិប្រជាធិបតេយ្យ សិទ្ធិមនុស្ស ហើយយើងក៏បានសម្តែងកង្វល់របស់យើងផងដែរបញ្ហាអស់ទាំងនេះ ហើយយើងសង្ឃឹមថា យើងនឹងមានការរីកចម្រើនទៅមុខ»។
ឆ្លើយតបនឹងអ្នកសារព័ត៌មានចោទសួរថា ក្រោមកិច្ចសហការ ៧០ ឆ្នាំ កម្ពុជា-អាមេរិក តើអ្វីជាលទ្ធផលសម្រេចបានហើយលោកពេញចិត្តជាងគេបំផុត? លោក Patrick Murphy ប្រាប់ថា៖ «អ្វីដែលយើងឃើញកន្លងមកយើងឃើញថា កម្ពុជាបានឆ្លងកាត់កាលៈទេសៈដ៏លំបាកហើយក្នុងពេល ២ ទសវត្សរ៍កន្លះមកនេះ យើងឃើញថា មានការរីកចម្រើនខ្លាំងបោះទៅមុខ»។
លោកក៏ចង់ឃើញឲ្យមានការកែលម្អច្រើនទៀតផ្អែកទៅតាមរដ្ឋធម្មនុញ្ញនៃប្រទេសកម្ពុជា។ លោកសង្ឃឹមថា ជាមួយនឹងការខិតខំប្រឹងប្រែងលើវិស័យទាំងនេះរួមមានសិទ្ធិមនុស្ស ប្រជាធិបតេយ្យនឹងមានការរីកចម្រើន ហើយសង្ឃឹមថា នឹងមានការបោះជំហានជាមួយគ្នាទៅមុខទៀត។
លោក សុខ ឥសាន អ្នកនាំពាក្យគណបក្សប្រជាជនកម្ពុជាសម្តែងការស្វាគមន៍ការលើកឡើងរបស់លោក Patrick Murphy។ លោកចាត់ទុកការលើកឡើងនេះនឹងជួយពង្រឹង និងពង្រីកមូលដ្ឋានគ្រឹះនៃកិច្ចសហប្រតិបត្តិការ និងទំនាក់ទំនងរវាងកម្ពុជា និងអាមេរិក។ លោកថា លោក Patrick Murphy បានឈរនៅលើមូលដ្ឋានដែលគោរព និងឲ្យតម្លៃគ្នាទៅវិញទៅមកដោយមិនជ្រៀតជ្រែកកិច្ចការផ្ទៃក្នុង។
លោកថា៖ «ប្រសាសន៍របស់លោកឯកអគ្គរដ្ឋទូតសហរដ្ឋអាមេរិកប្រចាំកម្ពុជាគឺជាការថ្លែងការណ៍ពិតជាក់ពីកម្ពុជា។ លោក Patrick Murphy បានបង្ហាញការយកចិត្តទុកដាក់ក្នុងការពង្រឹងទំនាក់ទំនងមិត្តភាព និងសាមគ្គីភាព កិច្ចសហប្រតិបត្តិការ ពិសេសទំនាក់ទំនងការទូតដែលមាន ៧០ ឆ្នាំកន្លងមកនេះ។ តាំងតែពីគាត់អញ្ជើញមកដល់កម្ពុជា ខ្ញុំយល់ថា គាត់ដូចជាអត់លូកដៃចូលកិច្ចការផ្ទៃក្នុង»។
លោកបញ្ជាក់ថា៖ «ការខ្វែងគំនិតគ្នានាពេលកន្លងមកគឺជាបញ្ហាបុគ្គលទេ គឺលោកអគ្គរដ្ឋទូតមុនគាត់មានទស្សនៈដែលគាត់មិនចេះធ្វើការងារទូត ហើយដើរផ្ទុយគោលនយោបាយការបរទេសរបស់រដ្ឋាភិបាលលោក ដូណាល់ ត្រាំ។ យើងឃើញថា រវាងលោក William A. Heidt និងលោក Patrick Murphy គឺនិយាយខុសគ្នាដូចមេឃហើយដី។ មួយហាក់ដូចប្រឈមនឹងវាយលុកមកកម្ពុជាតែម្តង»។
លោក កុយ គួង អ្នកនាំពាក្យក្រសួងការបរទេសបានបដិសេធក្នុងការធ្វើអត្ថាធិប្បាយពាក់ព័ន្ធនឹងការលើកឡើងរបស់លោក Patrick Murphy។
អ្នកវិភាគនយោបាយលោក ឡៅ ម៉ុងហៃ បានថ្លែងថា នេះគឺជាសេចក្តីថ្លែងការណ៍វិជ្ជមានមួយទៀតក្នុងការកសាងទំនុកចិត្តទៅវិញទៅមករវាងប្រទេស កម្ពុជា និងសហរដ្ឋអាមេរិក។ សេចក្តីថ្លែងការណ៍នេះក៏បានលើកទឹកចិត្តកម្ពុជាឲ្យស្តារឡើងវិញនូវរបៀបរៀបរយទៅតាមច្បាប់រដ្ឋធម្មនុញ្ញ និងគោលនយោបាយ ការបរទេសនៃអព្យាក្រឹតភាពរបស់ខ្លួនផងដែរ៕
