The Phnom Penh Post Search

Search form




Logo of Phnom Penh Post newspaper Phnom Penh Post - ទេព នីថា ​ចូល​កាន់​តំណែង​ជា​អគ្គលេខាធិការ គជប ថ្មី

ទេព នីថា ​ចូល​កាន់​តំណែង​ជា​អគ្គលេខាធិការ គជប ថ្មី

(ពី​ស្តាំ​ទៅ​ឆ្វេង) លោក ទេព នីថា និង​អគ្គលេខាធិការ​រង​ ៤ ​រូប​ក្នុង​ពិធី​កាលពី​ម្សិលមិញ​។
(ពី​ស្តាំ​ទៅ​ឆ្វេង) លោក ទេព នីថា និង​អគ្គលេខាធិការ​រង​ ៤ ​រូប​ក្នុង​ពិធី​កាលពី​ម្សិលមិញ​។ ផា លីណា

ទេព នីថា ​ចូល​កាន់​តំណែង​ជា​អគ្គលេខាធិការ គជប ថ្មី

ភ្នំពេញៈ លោក ទេព នីថា ដែល​ត្រូវ​បាន​ជ្រើស​តាំង​ជា​អគ្គលេខាធិការ​នៃ​គណៈកម្មាធិការ​ជាតិ​រៀបចំ​ការ​បោះឆ្នោត​ដែល​មាន​ភាព​ចម្រូង​ចម្រាស​កាលពី​ម្សិលមិញ​ត្រូវ​បាន​ប្រកាស​ចូល​កាន់​តំណែង​ក្នុង​អាណត្តិ​ថ្មី​ជា​ផ្លូវការ​ខណៈ​មន្ត្រី​ជាប់​កិច្ចសន្យា​បម្រើ​ការងារ​នៅ គ.ជ.ប ​ជាង ៣០០ ​នាក់​ផ្សេង​ទៀត​ត្រូវ​បាន​ធ្វើ​សមាហរណកម្ម​ផ្ទេរ​ចូល​មន្ត្រី​ក្របខ័ណ្ឌ​រដ្ឋ។

ក្នុង​ពិធី​ប្រកាស​តែងតាំង​អគ្គលេខាធិការ អគ្គលេខាធិការ​រង និង​មន្ត្រី​ក្រោម​ឱវាទ​ចូល​កាន់​តំណែង និង​ការ​ផ្ទេរ​បញ្ចូល​មន្ត្រី គជប ទៅ​ក្នុង​​ក្របខ័ណ្ឌ​អ្នក​រាជការ​ប្រធាន គជប លោក ស៊ិក ប៊ុនហុក មាន​ប្រសាសន៍​ថា​មន្ត្រី គជប ទាំង​ចាស់​ និង​ថ្មី​ត្រូវ​អនុវត្ត​​​ទៅ​តាម​ច្បាប់​ដែល​មាន​ចែង​បទបញ្ជា​ផ្ទៃក្នុង​នីតិវិធី និង​ពង្រឹង​ក្រមសីលធម៌​​ឱ្យ​បាន​​ខ្ជាប់ខ្ជួន​។

លោក​ថា៖ «មន្ត្រី​ជាប់​កិច្ចសន្យា​មួយ​ឆ្នាំ​ធ្វើ​ម្តង​អត់​មាន​លំនឹង​តែ​ឥឡូវ​នឹងនរ​ហើយ​ព្រោះ​ក្លាយ​ជា​មន្ត្រី​រាជការ​ហើយ​មាន​លក្ខន្តិកៈ​មន្ត្រី​រាជការ​ការពារ​មាន​ចរិត​វែង​ឆ្ងាយ​ហើយ​ទទួល​បាន​ប្រាក់​ចូលនិវត្តន៍​»​។ តែ​លោក​​បញ្ជាក់​ថា​សមាជិក គជប ដែល​ចូល​កាន់​តំណែង​ត្រូវ​តែ​ឈរ​លើ​គោលការណ៍​ឯករាជ្យ។

លោក​ថា៖ «ទោះ​ជា​ចេញ​មកពី​ប្រភព​ណា​ក៏ដោយ​គឺ​ត្រូវ​តែ​អនុវត្ត​តួនាទី​របស់​ខ្លួន​ដោយ​ឯករាជ្យ និង​អព្យាក្រឹត​ដោយ​មិន​ទទួល​នូវ​ការ​គាបសង្កត់​ការ​គំរាមកំហែង​ពី​បុគ្គល​ណា​មួយ​ឡើយ»។

លោក​បាន​ព្រមាន​ថា​អ្នក​ប្រព្រឹត្ត​ខុស​នឹង​គោលការណ៍​ច្បាប់​ដែល​មាន​ចែង​ប្រឈម​នឹង​ការ​ផាកពិន័យ ឬ​ក្រម​ព្រហ្មទណ្ឌ​ដោយ​មិន​លើក​លែង​ឡើយ។

ក្រោយពី​បញ្ចប់​ពិធី​ប្រកាស​​ចូល​កាន់​តំណែង​លោក ទេព នីថា ពុំ​បាន​ផ្តល់​បទសម្ភាស​ដល់​អ្នក​កាសែត​នោះ​ទេ។

យោង​តាម​ព្រះរាជក្រឹត្យ​ដែល​បាន​ផ្សព្វផ្សាយ​ជា​សាធារណៈ​កាលពី​ម្សិលមិញ​បាន​តែងតាំង​លោក ទេព នីថា ជា​អគ្គលេខាធិការ គជប មាន​ឋានៈ​ និង​បុព្វសិទ្ធិ​ស្មើ​រដ្ឋលេខាធិការ។ ​

លោក​ ម៉ៅ សុភារិទ្ធ លោក សោម សូរីដា លោក នី ចរិយា និង​លោក ម៉ុក ដារ៉ា ជា​​អគ្គលេខាធិការរង​មាន​ឋានៈ​ និង​បុព្វសិទ្ធិ​ស្មើ​នឹង​អនុរដ្ឋ​លេខាធិការ​។ ចំណែក​មន្ត្រី​​ជាប់​កិច្ចសន្យា​ធ្លាប់​​បម្រើ​ការងារ​នៅ គជប ដែល​ត្រូវ​បាន​បញ្ចូល​ក្នុង​ក្របខ័ណ្ឌ​រដ្ឋ​សរុប​មាន​ចំនួន ៣៦២ នាក់។

អ្នក​នាំពាក្យ គជប លោក ហង្ស ពុទ្ធា បាន​បញ្ជាក់​ពី​មូលហេតុ​ដែល គជប ផ្ទេរ​មន្ត្រី​ជាប់​កិច្ចសន្យា​ចូល​ទៅ​ក្នុង​ក្របខណ្ឌ​រដ្ឋ​ថា​ដោយសារ​ពួកគេ​មាន​បទពិសោធ​ស្រាប់ និង​អ្នក​ខ្លះ​ធ្វើការ​ជិត ២០ ឆ្នាំ​មក​ហើយ។

លោក​បាន​និយាយ​ថា​ «​គណបក្ស​ទាំង​ពីរ​ប្រកាស​កែទម្រង់​អ៊ីចឹង​ចង់​ឱ្យ គជប អព្យាក្រឹត​ត្រូវ​​បញ្ចូល​​ពួក​គាត់​ឱ្យ​ពេញ​សិទិ្ធ​ក្របខ័ណ្ឌ​រដ្ឋ​ព្រោះ​កាល​ណា​គាត់​ជា​មន្ត្រី​ជាប់​កិច្ចសន្យា​ខ្លាច​គេ​គំរាម​កំហែង​មិន​បន្ត​កិច្ចសន្យា​ឱ្យ​ធ្វើ​ឱ្យ​ពួក​គាត់​លម្អៀង»។

អតីត​មន្ត្រី​ជាន់​ខ្ពស់​នៅ​សមាគម​អាដហុក និង​ត្រូវ​បាន​តែងតាំង​ជា​អគ្គលេខាធិការរង គជប លោក នី ចរិយា ថ្លែង​ថា​ទោះបី​ជា​ស្ថាប័ន​បោះឆ្នោត​មួយ​នេះ​ធ្លាប់​រង​ការ​រិះគន់​ក្តី​តែ​លោក​នឹង​ខិតខំ​​ធ្វើ​យ៉ាង​ណា​កែលម្អ​ដើម្បី​ឱ្យ​ប្រជាជន​ទុក​ចិត្ត​លើ​ស្ថាប័ន​នេះ​វិញ។

លោក​បាន​បញ្ជាក់​ថា៖ «មាន​ការ​រិះគន់​ជា​រឿង​ពី​មុន​ប៉ុន្តែ​អ្វី​ដែល​យើង​ខិតខំ​ប្រឹងប្រែង​ធ្វើ​គឺ​ត្រូវ​យ៉ាង​ម៉េច​កែលម្អ​ឱ្យ​ប្រជាជន​មាន​ជំនឿ​មក​លើ​ស្ថាប័ន​បោះឆ្នោត​ឡើង​វិញ​នេះ​ជា​វត្ថុ​បំណង​របស់​យើង»។ លោក​បន្ត​ថា​នៅពេល​ប្រជាជន​មាន​ជំនឿ​លើ​ស្ថាប័ន គជប នោះ​លទ្ធផល​ការ​បោះឆ្នោត​នឹង​អាច​ទទួល​យក​បាន​ពី​គ្រប់​ភាគី​ទាំងអស់​។

នាយក​ប្រតិបត្តិ​អង្គការ​តម្លាភាព​កម្ពុជា និង​ជា​សមាជិក​ម្នាក់​ក្នុង​សម្ព័ន្ធ​កំណែ​ទម្រង់​ការ​បោះឆ្នោត ERA លោក ព្រាប កុល បាន​ថ្លែង​​ថា​ការ​ត្រឡប់​មក​កាន់​តំណែង​អគ្គលេខាធិការ គជប របស់​លោក ទេព នីថា ចង់​មិន​ចង់​នឹង​ធ្វើ​ឱ្យ​ប្រជាជន​នៅ​មាន​មន្ទិល​សង្ស័យ​ដដែល​ហើយ​ប្រជាជន​នឹង​រង់ចាំ​មើល​ការ​អនុវត្ត​តទៅ​មុខ​ទៀត។

លោក​ថា៖ «អ្វី​ដែល​សំខាន់​ការ​អនុវត្ត​ការងារ​​របស់​គាត់​ក្នុង​មុខ​តំណែង​អគ្គលេខាធិការ​ក្រោម​ច្បាប់ និង​បែបបទ​ធ្វើការ​ថ្មី​របស់ គជប តើ​នឹង​មាន​អ្វី​​ជម្រះ​មន្ទិល​សង្ស័យ ឬ​បំភ្លឺ​ចំណោទ​ដែល​ប្រជាពលរដ្ឋ​មាន​ក្នុង​ចិត្ត​ហើយ​រង់ចាំ​មើល​ទាំងអស់​គ្នា»។

ទោះ​យ៉ាង​ណា​​លោក​ ព្រាប កុល បញ្ជាក់​ថា​កំណែទម្រង់​ថ្មី​របស់ គជប ដែល​តម្រូវ​ឱ្យ​មាន​អគ្គលេខាធិការ​រង​ចំនួន ៤ នាក់​កាន់​ការងារ​ផ្សេង​គ្នា​ជា​រឿង​ល្អ​មួយ​ក្នុង​ការ​កាត់​បន្ថយ​អំណាច​អគ្គលេខាធិការ គជប​៕

អត្ថបទគួរចាប់អារម្មណ៍