ភ្នំពេញៈ លោកស្រី ទេព វន្នី ជាសកម្មជនដីធ្លីបឹងកក់ កាលពីម្សិលមិញត្រូវបានក្រុមគ្រួសារដាក់ញត្តិជាថ្មីម្ដងទៀតទៅកាន់ខុទ្ទកាល័យលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងក្រសួងយុត្តិធម៌ ដើម្បីសុំកិច្ចអន្តរាគមន៍ស្នើទៅព្រះមហាក្សត្រ សុំលើកលែង និងបន្ធូរបន្ថយទោសក្នុងអំឡុងពេលថ្ងៃបុណ្យវិសាខបូជាខាងមុខនេះ។
អ្នកស្រី ហួត ច័ន្ទសុវណ្ណ ជាបងស្រី អ្នកស្រី ទេព វន្នី បានឲ្យដឹងថាអ្នកស្រីបានយកញត្តិមកដាក់ជាលើកទី ៣ ខណៈលើកមុនមន្ត្រីខុទ្ទកាល័យនាយករដ្ឋមន្ត្រីមិនទទួលដោយសារឯកសារ មិនគ្រប់គ្រាន់ ប៉ុន្ដែពេលនេះមន្ត្រីព្រមទទួល ព្រោះឯកសារមានគ្រប់គ្រាន់ហើយ។ អ្នកស្រីរំពឹងថានៅថ្ងៃ ២៩ ខែមេសា ដែលជាថ្ងៃបុណ្យវិសាខបូជានោះព្រះមហាក្សត្រ និងរាជរដ្ឋាភិបាលនឹងជួយសម្រួលឲ្យមានការដោះលែង ឬបន្ធូរបន្ថយទោសអ្នកស្រី ទេព វន្នី។
តុលាការកំពូលនៅព្រឹកថ្ងៃទី ៧ ខែកុម្ភៈឆ្នាំនេះបានបើកសវនាការ និងប្រកាសតម្កល់សាលដីកាតុលាការថ្នាក់ក្រោមដែលផ្តន្ទាទោសអ្នកស្រី ទេព វន្នី ឲ្យជាប់ពន្ធនាគារ ២ ឆ្នាំកន្លះដដែលទាក់ទិននឹងករណីបង្ករបួសស្នាមនៅជិតភូមិគ្រឹះនាយករដ្ឋមន្ត្រីកាលពីដើមឆ្នាំ ២០១៣។ ក្នុងសវនាការដែលដឹកនាំដោយចៅក្រមលោកស្រី គឹម សត្ថាវី និងមានមេធាវីការពារក្តីអ្នកស្រី ទេព វន្នី ផងនោះបានសម្រេចរក្សាបទចោទ និងតម្កល់សាលដីកាតុលាការថ្នាក់ក្រោមនៅដដែល។ អ្នកស្រី ទេព វន្នី ដែលត្រូវបាននាំមកសវនាការនៅពេលនោះបានឆ្លើយប្រាប់តុលាការថា អ្នកស្រីមិនបានប្រព្រឹត្តដូចការចោទប្រកាន់នោះទេ។ នេះជាសវនាការលើបណ្តឹងសារទុក្ខចំពោះសំណុំរឿងអ្នកស្រី ទេព វន្នី ដែលត្រូវបានចាប់ខ្លួនកាលពីខែសីហា ឆ្នាំ ២០១៦ និងត្រូវបានចោទប្រកាន់ថាបានបង្ករបួសស្នាមលើសន្តិសុខខណ្ឌដូនពេញ ២ នាក់។ សំណុំរឿងនេះត្រូវបានតុលាការថ្នាក់ក្រោមកាត់ក្តីឲ្យជាប់ពន្ធនាគារ ២ ឆ្នាំកន្លះពាក់ព័ន្ធនឹងបទប្រើហិង្សាដោយចេតនាមានស្ថានទម្ងន់ទោស។
អ្នកស្រី ច័ន្ទសុវណ្ណ ថ្លែងថា៖ «លើកនេះខ្ញុំមានសង្ឃឹមច្រើនជាងលើកមុនៗ ព្រោះថ្ងៃបុណ្យវិសាខបូជាជាថ្ងៃសំខាន់មួយក្នុងពុទ្ធសាសនា ហើយព្រះមហាក្សត្រក៏ប្រោសព្រះរាជទានការលើកលែងទោសដល់អ្នកទោសជាច្រើនផងដែរហើយក្នុងនោះ ខ្ញុំរំពឹងថានឹងមានឈ្មោះ វន្នី ប្អូនស្រីខ្ញុំម្នាក់ដែរ។ ម្យ៉ាងទៀត វន្នី ក៏មិនមានទោសអ្វីដល់ថ្នាក់នេះទេអ៊ីចឹងសូមសម្ដេចជួយកូនចៅផង»។
លោក គង់ ចំរើន មន្ត្រីផ្នែកទទួលពាក្យបណ្ដឹងនៅខុទ្ទកាល័យនាយករដ្ឋមន្ត្រី កាលពីម្សិលមិញបានទទួលយកញត្តិ ខណៈដែលកាលពីថ្ងៃទី ៥ ខែមីនាថ្មីៗនេះលោកធ្លាប់ច្រានចោលមិនទទួលយកដោយអះអាងថាគ្មានឯកសារគ្រប់គ្រាន់គឺខ្វះសាលក្រមស្ថាពរ។
លោក គង់ ចំរើន អះអាងថានឹងយកញត្តិទៅពិនិត្យ និងចាត់ចែងតាមនីតិវិធីច្បាប់។
លោក គង់ ចំរើន ថ្លែងថា៖ «ខ្ញុំបានទទួលហើយ ប៉ុន្ដែយើងនៅពិនិត្យខ្លឹមសារលើឯកសារនេះសិនរួចហើយខ្ញុំត្រូវបញ្ជូនទៅថ្នាក់លើទៀត ហើយលទ្ធផលយ៉ាងណានោះខ្ញុំមិនទាន់និយាយបានទេ»។
តាមញត្តិដែលអ្នកស្រី ហួត ច័ន្ទសុវណ្ណ ត្រូវជាបងស្រីអ្នកស្រី ទេព វន្នី ដាក់ទៅនាយករដ្ឋមន្ត្រីនៅថ្ងៃទី ២៣ មេសានេះបានបង្ហាញថាសំណើសុំ «សម្ដេចជួយអន្តរាគមន៍លើកលែង ឬបន្ថយទោសដល់អ្នកស្រី ទេព វន្នី ដែលកំពុងអនុវត្តទោសនៅមណ្ឌលអប់រំកែប្រែទី ២»។
លោក សុច សុផាន់ណា អគ្គនាយករងនៃអគ្គនាយកដ្ឋានកិច្ចការអយ្យការ និងព្រហ្មទណ្ឌក្រសួងយុត្តិធម៌បានឲ្យដឹងថាទណ្ឌិតចំនួន ២២៨ នាក់ដែលជាប់ឃុំនៅក្នុងគុកចំនួន ១៨ ក្នុងនោះមានស្ត្រី ១៨ នាក់ត្រូវបានស្នើសុំបន្ធូរបន្ថយទោស និងលើកលែងទោសនៅក្នុងពិធីបុណ្យពិសាខបូជានាពេលខាងមុខនេះដែលទណ្ឌិតទាំងនោះពាក់ព័ន្ធក្នុងរឿងក្ដីឆក់ និងប្លន់ឆបោកឃាតកម្មជាដើម៕