សៀមរាបៈ ជនជាតិចិនដែលរងរបួស នៅក្នុងគ្រោះថ្នាក់ចរាចរណ៍ក្រឡាប់រថយន្ត នៅលើកំណាត់ផ្លូវចំណោតចុះពីភ្នំគូលែន កាលពីថ្ងៃអាទិត្យ បានស្លាប់ម្នាក់ទៀតហើយ បន្ទាប់ពីបានសម្រាកព្យាបាលអស់រយៈពេល ៣ ថ្ងៃ នៅក្នុងមន្ទីរពេទ្យរស្មីអង្គរ ខេត្តសៀមរាបធ្វើឲ្យចំនួនអ្នកស្លាប់កើនឡើងដល់ ៣ នាក់។
ស្នងការខេត្តសៀមរាប លោក ទិត្យ ណារ៉ុង បានប្រាប់ភ្នំពេញប៉ុស្តិ៍កាលពីម្សិលមិញថា ជនរងគ្រោះឈ្មោះ Liu Huaxiang ភេទប្រុសអាយុ ៥៦ ឆ្នាំ បានស្លាប់កាលពីវេលាម៉ោង ៨ និង ៣០ នាទីព្រឹកថ្ងៃពុធម្សិលមិញ។ ជនរងគ្រោះបានចូលមកកម្ពុជា កាលពីថ្ងៃទី ១៦ ខែ កក្កដា ឆ្នាំ២០១៩ តាមច្រកព្រលានយន្តហោះអន្តរជាតិសៀមរាប តាមរយៈក្រុមហ៊ុនទេសចរណ៍ ឆាង យ៉ុង (Chhang Yong Tourism) និងបានស្នាក់នៅសណ្ឋាគារ 7 Happy Night ដែលមានទីតាំងស្ថិតនៅ ភូមិវត្តបូព៌ សង្កាត់ សាលាកំរើក ក្រុងខេត្តសៀមរាប។
លោកថ្លែងថា៖ «យោងតាមការសន្និដ្ឋានរបស់គ្រូពេទ្យជំនាញ នៃមន្ទីរពេទ្យរស្មីអង្គរ ការស្លាប់របស់ជនរងគ្រោះខាងលើនេះ គឺបណ្ដាលមកពីមានរបួសគ្រាំក្នុងធ្ងន់ធ្ងរពេក»។
លោកបន្ថែមថា សពជនរងគ្រោះត្រូវបានគេគ្រោងនាំយកទៅបូជានៅឈាបនដ្ឋានវត្តគោកចក។
កាលពីថ្ងៃទី ២១ ខែ កក្កដា ឆ្នាំ ២០១៩ រថយន្តទេសចរណ៍មួយគ្រឿង ពាក់ស្លាកលេខ សៀមរាប 2A-9016 ដែលមានផ្ទុកទេសចរចិន ១៣ នាក់ បានក្រឡាប់ជាច្រើនត្រឡប់ផ្ងារជើងនៅលើកំណាត់ផ្លូវចំណោតចុះពីភ្នំគូលែនភាគខាងកើត បណ្ដាលឲ្យអ្នកដំណើរជនជាតិចិនទាំងអស់របួសធ្ងន់និងស្រាល។ ចំណែកអ្នកបើកបររថយន្ត គេពុំដឹងថា បានរងរបួសដែរឬមួយយ៉ាងណានោះទេ ដោយសារតែបានរត់គេចខ្លួនពីកន្លែងកើតហេតុ មុនពេលសមត្ថកិច្ចទៅដល់។
ស្ត្រីរងគ្រោះ ២ នាក់ ដែលម្នាក់ឈ្មោះ CAO JIE អាយុ ៥៩ ឆ្នាំ រស់នៅខេត្ត Liaoning ភាគខាងជើងប្រទេសចិន និង ម្នាក់ទៀតឈ្មោះ HOU YUJIE អាយុ ១៧ ឆ្នាំ រស់នៅខេត្ត Hebei ភាគខាងជើងប្រទេសចិនបានស្លាប់ពេលបញ្ជូនទៅកាន់មន្ទីរពេទ្យ។
លោក ហួ ហុកម៉េង នាយរងផ្នែកចរាចរណ៍ស្រុកស្វាយលើ ដែលបានចុះអន្តរាគមន៍ជួយជនរងគ្រោះនៅកន្លែងកើតហេតុនាថ្ងៃនោះ ថ្លែងថា គ្រោះថ្នាក់ចរាចរណ៍នេះ បង្កឡើងដោយអ្នកបើកបរមានភាព «ធ្វេសប្រហែស និងខ្វះការប្រុងប្រយ័ត្ន» ខណៈស្ថានភាពផ្លូវ មានរបត់ច្រើនកន្លែង និងចំណោតខ្ពស់ដែលអាចឲ្យរថយន្តរអិលជាន់ហ្រ្វាំងមិនស៊ី។
ចំណែកពលរដ្ឋដែលបានឃើញ ហេតុការណ៍នោះ បាននិយាយដាក់បន្ទុកទៅលើក្រុមហ៊ុនទេសចរណ៍ ដែលនាំទេសចរចិនទាំងនោះចូលមកទស្សនាកម្ពុជាថា ខ្វះការទទួលខុសត្រូវជ្រើសរើស អ្នកបើកបរដែលគ្មានក្រមសីល ធម៌ វិជ្ជាជីវៈ មកបម្រើការងារ។
លោក ឈិត ឆាត នាយរងការិយាល័យចរាចរណ៍ខេត្តសៀមរាប បានប្រាប់ភ្នំពេញប៉ុស្តិ៍កាលពីម្សិលមិញថា សមត្ថកិច្ចបានស្វែងរកឃើញអត្តញ្ញាណម្ចាស់រថយន្តខាងលើនោះហើយ គឺឈ្មោះ នាង សំអាត ជាអ្នករស់នៅសង្កាត់ស្លក្រាម ខេត្តសៀមរាប ប៉ុន្តែឈ្មោះនេះជាម្ចាស់ដើម ចំណែកម្ចាស់ថ្មីរបស់រថយន្តនេះ នៅមិនទាន់ដឹងពីអត្តសញ្ញាណនៅឡើយទេ។
លោកថ្លែងថា៖ «យើងបានចេញលិខិតកោះអញ្ជើញឲ្យឈ្មោះនាង សំអាតមកចូលខ្លួនឆ្លើយបំភ្លឺនៅថ្ងៃព្រហស្បតិ៍នេះ ដើម្បីស្វែងរកអត្តសញ្ញាណម្ចាស់ថ្មីរបស់រថយន្តនោះនិងអ្នកបើកបរ ដើម្បីសាកសួរ និងកសាងសំណុំរឿងបញ្ជូនទៅតុលាការ ចាត់ការបន្តតាមនីតិវិធីច្បាប់»។
លោក ឆាត បានឲ្យដឹងទៀតថា សមត្ថកិច្ច ក៏កំពុងរៀបចំឯកសារកោះអញ្ជើញភាគីក្រុមហ៊ុនទេសចរណ៍ ដែលបាននាំទេសចរចិនទាំង ១៣ នាក់នោះ មកសាកសួរជុំវិញហេតុការណ៍ដែលនាំឲ្យទេសចរចិនទាំងនោះនាំគ្នាទៅទស្សនាភ្នំគូលែនដោយគ្មានភ្នាក់ងារមគ្គុទេ្ទសក៍ទេសចរណ៍ទៅជាមួយ។ «ករណីនេះវាធ្វើឲ្យប៉ះពាល់ធ្ងន់ធ្ងរដល់វិស័យទេសចរណ៍នៅកម្ពុជា»។
កាលពីម្សិលមិញ ក្រុមហ៊ុនទេសចរណ៍ ឆាង យ៉ុង ដែលមានទីស្នាក់ការនៅខេត្តសៀមរាបមិនអាចទាក់ទងសុំការពន្យល់បានទេ ដោយទូរស័ព្ទចូលជាច្រើនដង តែគ្មានអ្នកលើក។
យ៉ាងណា លោក Kelvin Tan ប្រធានក្រុមការងារទីផ្សារអាស៊ី នៃសមាគមទីភ្នាក់ងារទេសចរណ៍កម្ពុជា ដែលមានក្រុមហ៊ុនទីភ្នាក់ងារទេសចរណ៍ប្រមាណ ៣០០ ក្រុមហ៊ុន ជាសមាជិកបានថ្លែងថា ហេតុការណ៍ដែលបានកើតឡើងនាថ្ងៃនោះ វាមិនមែនជាការទទួលខុសត្រូវរបស់ភាគីក្រុមហ៊ុនទេ ព្រោះវាជាថ្ងៃឈប់សម្រាក ហើយក្រុមទេសចរចិនទាំងនោះ បានជួលរថយន្តពីខាងក្រៅតាមប្រព័ន្ធ Online ដើម្បីទៅកម្សាន្តនៅទីនោះដោយខ្លួនឯង៕