The Phnom Penh Post Search

Search form




Logo of Phnom Penh Post newspaper Phnom Penh Post - ទោះ​មាន​ច្បាប់​ក៏​អ្នក​បើក​ម៉ូតូ​នៅ​តែ​មិន​ពាក់​មួក

ទោះ​មាន​ច្បាប់​ក៏​អ្នក​បើក​ម៉ូតូ​នៅ​តែ​មិន​ពាក់​មួក

ទោះ​មាន​ច្បាប់​ក៏​អ្នក​បើក​ម៉ូតូ​នៅ​តែ​មិន​ពាក់​មួក

Content image - Phnom Penh Post

ភ្នំពេញៈ ទោះ​ជា​ច្បាប់​ចរាចរណ៍​ផ្លូវ​គោក​ពី​ឆ្នាំ ២០០៩ បាន​តម្រូវ​ឲ្យ​អ្នក​បើក​បរ​ម៉ូតូ​ពាក់​មួក​សុវត្ថិភាព​ក៏​ដោយ ក៏​អ្នក​ដំណើរ​តាម​ម៉ូតូ​មួយ​ភាគ​ធំ​នៅ​តែ​មិន​សូវ​ពាក់​មួក​សុវត្ថិភាព​ដដែល។

ជា​ផ្នែក​មួយ​នៃ​សុវត្ថិភាព​តាម​ផ្លូវ​នៅ​ក្នុង​គម្រោង​១០​ប្រទេស​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវ​គោក បាន​ធ្វើ​សិក្ខាសាលា ស្ដី​ពី​ចំណេះ​ដឹង​ពី​ការ​ពាក់​មួក​សុវត្ថិភាព នៅ​ក្នុង​ចំណោម​អ្នក​រត់​ម៉ូតូ​ឌុប កាល​ពី​ព្រឹក​ថ្ងៃ​ចន្ទ​នៅ​ឯ​មជ្ឈមណ្ឌល​សហ​ប្រតិបត្តិការ​កម្ពុជា-ជប៉ុន ដោយ​មាន​ការ​គាំទ្រ​ពី​អង្គការ​សុខភាព​ពិភពលោក និង​Bloomberg ដែល​មាន​មូលដ្ឋាន​នៅ​ក្រុង​ញូវយ៉ក។ អ្នក​រត់​ម៉ូតូ​៦០០​នាក់​បាន​អញ្ជើញ​ឲ្យ​ចូល​រួម​ហើយ​ម្នាក់ៗ​ទទួល​បាន​មួក​សុវត្ថិភាព​មួយ​ដោយ​ឥត​គិត​ថ្លៃ។

យោង​តាម​ការ​ធ្វើ​អង្កេត​មួយ​នៅ​ក្នុង​ឆ្នាំ ២០១២ បាន​ឲ្យ​ដឹង​ថា ជា​មធ្យម​មនុស្ស​៥​នាក់​បាន​ស្លាប់​រាល់​ថ្ងៃ​នៅ​លើ​ដង​ផ្លូវ​នៅ​ប្រទេស​កម្ពុជា ដែល​ជិត​បួន​នាក់​ពាក់​ព័ន្ធ​នឹង​ការ​បើក​ម៉ូតូ​ហើយ​ការ​រង​របួស​ក្បាល​នៅ តែ​ជា​មូល​ហេតុ​ចម្បង​បណ្ដាល​ឲ្យ​ស្លាប់​នៅ​ក្នុង​ចំណោម​គ្រោះថ្នាក់​នៃ​អ្នក​ប្រើ​ប្រាស់​ម៉ូតូ។

តាម​ការ​អង្កេត​បង្ហាញ​ថា ការ​ពាក់​មួក​សុវត្ថិភាព​កាត់​បន្ថយ​ការ​រង​របួស​ត្រូវ​ក្បាល​ធ្ងន់ ធ្ងរ​បាន​៧០​ភាគរយ និង​បន្ថយ​អត្រា​ស្លាប់​បាន​ដល់​៤០​ភាគរយ។

ជាង​នេះ​ទៀត​មាន​អត្រា​អ្នក​បើក​ម៉ូតូ​ចំនួន​៦៥​ភាគរយ និង​អ្នក​រួម​ដំណើរ​ជាមួយ​៩​ភាគរយ​បាន​ពាក់​មួក​សុវត្ថិភាព​បើ​ទោះ​ជា​អ្នក​ដំណើរ​តាម​ម៉ូតូ​ងាយ​នឹង​រង​របួស​ត្រូវ​ក្បាល​ក៏​ដោយ។

លោក​ស្រី វេជ្ជបណ្ឌិត ម៉ូម៉ូ តាគឺជី មន្ត្រី​គ្រប់​គ្រង​កម្មវិធី​នៅ​អង្គការ​សុខភាព​ពិភពលោក​បាន​ថ្លែង​ថា ការ​ទប់​ស្កាត់​គ្រោះថ្នាក់​នៅ​តាម​ផ្លូវ​គឺជា​វិធី​ធម្មតា​មួយ​សម្រាប់​ទីភ្នាក់ងារ​សុខភាព​សាធារណៈ​ដូចជា​អង្គការ WHO ... ប៉ុន្តែ​គេ​ចង់​ផ្សព្វ​ផ្សាយ​ឲ្យ​បាន​ទូលំ​ទូលាយ និង​អប់រំ​ពលរដ្ឋ​ឲ្យ​យល់​ដឹង​ពី​វិធានការ​ទប់​ស្កាត់​និង​កាត់​បន្ថយ​ការ​ស្លាប់​មុន​វ័យ​ជរា និង​គ្រោះថ្នាក់​មក​ពី​មិន​ប្រើ​មួក​សុវត្ថិភាព។

លោក​ស្រី​បន្ត​ថា៖«​យើង​ទទួល​បាន​ជោគ​ជ័យ​មួយ​ចំនួន​ដោយ​ពលរដ្ឋ​ពាក់​មួក​សុវត្ថិភាព​នៅ​ក្នុង​ពេល​ថ្ងៃ​តែ​នគរបាល​ឈប់​ធ្វើ​ការ​យាម​ល្បាត​ចាប់​ពី​ម៉ោង​៥​ល្ងាច​ទៅ ដែល​ពេល​នោះ​ពលរដ្ឋ​ឈប់​ពាក់​មួក​សុវត្ថិភាព​។ នេះ​មិន​មែន​ជា​ដំណោះស្រាយ​ស្នូល​ទេ​តែ​ជា​ផ្នែក​មួយ​នៃ​កញ្ចប់​ទាំង​មូល»។

130716_01a
អ្នកចូលរួម នាំគ្នាពាក់មួកសុវត្ថិភាព កាលពីថ្ងៃចន្ទម្សិលមិញ នៅក្នុងសិក្ខាសាលាស្ដីអំពីចំណេះដឹងពីការពាក់មួកសុវត្ថិភាព នៅក្នុងសិក្ខាសាលានេះ មានអ្នករត់ម៉ូតូ ៦០០នាក់ចូលរួម ហើយម្នាក់ៗទទួលបានមួកសុវត្ថិភាពមួយដោយឥតគិតថ្លៃ ម៉ៃ វីរៈ

លោក​ស្រី ម៉ូម៉ូ ក៏​បាន​រៀប​រាប់​ពី​ស្ថានភាព​ស្រដៀង​គ្នា​នៅ​ប្រទេស​ថៃ និង​វៀតណាម​ដោយ​អ្នក​បើកបរ​បាន​រំលោភ​ច្បាប់​ពាក់​មួក​សុវត្ថិភាព​។ ប៉ុន្តែ​រយៈ​ពេល​៥​ឆ្នាំ​ក្រោយ​ការ​កាត់​បន្ថយ​ទទួល​បាន​ជោគជ័យ ទៅ​លើ​ចំនួន​គ្រោះថ្នាក់​ត្រូវ​ក្បាល​តែ​បញ្ហា​នេះ​មិន​ទាន់​បាន​ដោះស្រាយ​នៅ​ឡើយ។

លោក​ស្រី​បន្ត​ថា៖ «ទោះ​ជា​ពលរដ្ឋ​នៅ​វៀតណាម​កំពុង​ពាក់​មួក​សុវត្ថិភាព​ក្ដី ក៏​គ្រោះថ្នាក់​ត្រូវ​ក្បាល​នៅ​តែ​កើត​មាន​ជា​ដដែល ដោយ​សារ​តែ​មួក​សុវត្ថិភាព​មាន​តម្លៃ​ថោក ដូច​ជា មួក​សុវត្ថិភាព​ពាក់​ជិះ​កង់​អ៊ីចឹង​។ យើង​ត្រូវ​តែឲ្យ​ប្រាកដ​ថា យើង​បាន​ប្រើ​មួក​សុវត្ថិភាព​គុណភាព​ល្អ​ត្រឹម​ត្រូវ»។

លោក ពៅ ម៉ាលី អគ្គ​នាយក​រង នៃ​អគ្គ​នាយកដ្ឋាន​ដឹក​ជញ្ជូន​ឲ្យ​ដឹង​ក្នុង​សិក្ខាសាលា​នេះ​ដែរ​ថា គ្រោះថ្នាក់​ចរាចរណ៍​លើ​អ្នក​ប្រើ​ប្រាស់​ម៉ូតូ​អ្នក​ស្លាប់​មាន​រហូត​៦៨​ភាគរយ​នៃ​ជន​រងគ្រោះ​ស្លាប់​សរុប ក្នុង​នេះ ៦៦​ភាគរយ ស្លាប់​ដោយ​ការ​ប៉ះ​ទង្គិច​ក្បាល​។ ឯ​អ្នក​ជិះ​ម៉ូតូ​ពាក់​មួក​សុវត្ថិភាព​ជួប​គ្រោះថ្នាក់​មាន​តែ​២២​ភាគរយ​ប៉ុណ្ណោះ​ដែល​នៅ​ក្នុង​កម្រិត​ទាប​នៅ​ឡើយ។

លោក​បញ្ជាក់​ថា អ្នក​បើក​បរ​ម៉ូតូ​និង​អ្នក​រួម​ដំណើរ​ត្រូវ​តែ​ពាក់​មួក​សុវត្ថិភាព​ឲ្យ​បាន​១០០​ភាគរយ​និង​គ្រប់​ពេល​វេលា​ទោះ​បី​ធ្វើ​ដំណើរ​ពេល​ថ្ងៃ​ឬ​យប់​ក៏​ដោយ​ព្រោះ​«នៅ​កម្ពុជា​យើង​គ្រោះថ្នាក់​ស្លាប់​មាន​ច្រើន​សម្រាប់​អ្នក​ជិះ​ម៉ូតូ​ក្នុង​ចំនួន​ជន​រងគ្រោះ​ស្លាប់​១០០​នាក់ គឺ​មាន​អ្នក​ជិះ​ម៉ូតូ​៦៦​នាក់​ហើយ​មូលហេតុ​នៃ​ការ​ស្លាប់​គឺ​បណ្តាល​មក​ពី​ការ​ដួល​បោក​ក្បាល​ទៅ​លើ​ផ្លូវ​ថ្នល់​»។ លោក​ថា មូលហេតុ​នៃ​គ្រោះថ្នាក់​ចរាចរណ៍​ភាគ​ច្រើន គឺ​បណ្តាល​មក​ពី​កត្តា​មនុស្ស​មាន​៩៦​ភាគរយ​ក្នុង​នោះ​អ្នក​ស្លាប់​ដោយ​ការ​បើក​បរ​ហួស​ល្បឿន​មាន​៥២​ភាគរយ​អ្នក​ស្លាប់​ដោយ​ការ​បើក​បរ​ក្រោម​ឥទ្ធិពល​គ្រឿង​ស្រវឹង​មាន​១៣​ភាគរយ នៃ​ចំនួន​អ្នក​ស្លាប់​សរុប។

មុន​ពេល​ចែក​ចាយ​មួក​សុវត្ថិភាព​ចំនួន ៦០០​នេះ​អ្នក​ចូល​រួម​ត្រូវ​បាន​អញ្ជើញ​ទៅ​មើល​ការ​ចាក់​ផ្សាយ​សកម្មភាព​ខ្លីៗ​រៀបរាប់​ពី​យុវជន ដែល​ទទួល​ការ​ផាក​ពិន័យ​ចំពោះ​ការ​មិន​ពាក់​មួក​សុវត្ថិភាព​ក្នុង​ពេល​ធ្វើ​ដំណើរ​។ ឃ្លីប​វីដេអូ​មួយ​ទៀត បង្ហាញ​ពី​លោក​នាយក​រដ្ឋ​មន្ត្រី ហ៊ុន សែន កំពុង​ជំរុញ​ឲ្យ​ប្រជា​ពលរដ្ឋ​ពាក់​មួក​សុវត្ថិភាព​ដើម្បី​ទប់​ស្កាត់​ការ​បាត់បង់​ដ៏​ធំ​ធេង​គឺ​ទាំង​សេដ្ឋកិច្ច និង​មនោសញ្ចេតនា។

លោក​នាយក​រដ្ឋ​មន្ត្រី​ថ្លែង​ថា៖ «គ្រប់​ពេល​គ្រប់​ទីកន្លែង​ទោះ​ជា​ឆ្ងាយ​ក្ដី ជិត​ក្ដី អ្នក​ទាំង​អស់​គ្នា​ទាំង​អ្នក​បើក និង​អ្នក​ជិះ​ម៉ូតូ​ត្រូវ​តែ​ពាក់​មួក​សុវត្ថិភាព​ឲ្យ​បាន​ត្រឹម​ត្រូវ​គ្រប់ៗ​គ្នា»។

លោក​វេជ្ជបណ្ឌិត សៅ រតនៈ បម្រើ​ការ​នៅ​កម្មវិធី​សុវត្ថិភាព​តាម​ផ្លូវ​របស់​អង្គការ​សុខភាព​ពិភពលោក​បាន​ថ្លែង​ថា ច្បាប់​ត្រូវ​បាន​បង្កើត​រួច​ហើយ​ហើយ​តម្រូវ​ឲ្យ​អ្នក​ធ្វើ​ដំណើរ​ដោយ​ម៉ូតូ​ប្រើ​មួក​សុវត្ថិភាព​តែ​មិន​ទាន់​អនុម័ត​ជា​ធរមាន​នៅ​ឡើយ៕ PN

អត្ថបទគួរចាប់អារម្មណ៍