ភ្នំពេញ៖ ធនាគារជាតិនៃកម្ពុជាប្រកាសច្រានចោលទាំងស្រុងចំពោះព័ត៌មានដែលបានផ្សាយលើបណ្តាញសង្គម ដែលថាធនាគារជាតិផ្តល់ជំនួយចំនួន ៣ លានរៀលទៅឲ្យមនុស្សចំនួន ៥០ នាក់។
ជុំវិញព័ត៌មាននេះ ធនាគារជាតិអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ក្នុងដំណាក់កាលនេះ ចៀសវាងមានការចាញ់បោក។
ការប្រកាសបដិសេធនេះបានធ្វើឡើង បន្ទាប់ពីមានគណនីហ្វេសប៊ុកមួយ ដែលមានឈ្មោះថា Cambodia bank បង្ហោះសារដោយបានប្រកាសថា ធនាគារជាតិនៃកម្ពុជានឹងផ្តល់ជំនួយចំនួន ៣ លានរៀលទៅមនុស្ស ៥០ នាក់ ដែលបានចុះឈ្មោះឥឡូវនេះ ដើម្បីចាប់ឆ្នោត ដោយមានភ្ជាប់ និងលីង សម្រាប់ឲ្យអ្នកប្រើប្រាស់ចុចចុះឈ្មោះដើម្បីផ្តល់ព័ត៌មាន។
លោក គិត សុវណ្ណារិទ្ធ អគ្គនាយករងទី ១ នៃអគ្គនាយកដ្ឋានត្រួតពិនិត្យធនាគារជាតិនៃកម្ពុជាបានបញ្ជាក់នៅថ្ងៃទី ២៦ មេសានេះថាការប្រកាសនូវព័ត៌មានយ៉ាងដូច្នេះ គឺជាករណីឆបោក ព្រោះធនាគារជាតិនៃកម្ពុជាមិនដែលមានកម្មវិធីប្រកាសផ្តល់ជំនួយដល់ពលរដ្ឋក្នុងចំនួនទឹកប្រាក់ទាំងនេះនោះទេ។
លោកថ្លែងថា៖ «សូមបងប្អូនប្រជាពលរដ្ឋមានការប្រយ័ត្នប្រយែង កុំមានការចាញ់បោកឲ្យសោះ ព្រោះនេះជាករណីឆបោកទេ។ សូមឲ្យបងប្អូនប្រជាពលរដ្ឋយើង សូមកុំជឿ និងកុំផ្ញើលុយ ឬចុះឈ្មោះឲ្យសោះ»។
លោក គិត សុវណ្ណារិទ្ធ បញ្ជាក់ទៀតថា គណនីហ្វេសប៊ុកទាំងនេះមិនមែនជាគណនីហ្វេសប៊ុករបស់ធនាគារជាតិនៃកម្ពុជានោះទេ។
កាលពីថ្មីៗនេះនាយកដ្ឋានប្រឆាំងបទល្មើសបច្ចេកវិទ្យាក្រសួងមហាផ្ទៃធ្លាប់ប្រកាសរួចមកហើយ ដើម្បីឲ្យប្រជាពលរដ្ឋមានការប្រុងប្រយ័ត្នជាមួយល្បិចកលបោកប្រាស់មួយចំនួនក្នុងពេលដែលជំងឺកូវីដ១៩ កំពុងតែរីករាលដាល។
នាយកដ្ឋាននេះបានលើកឡើងថា ក្នុងពេលនេះជនខិលខូចមួយចំនួនបានកំពុងរិះរកល្បិចកល ដើម្បីបោកប្រាស់ប្រជាពលរដ្ឋ ដោយបន្លំធ្វើជាអាជ្ញាធរ ឬសប្បុរសជន ដើម្បីចែកម្ហូបអាហារ ជួយឧបត្ថម្ភថវិកា ឬផ្ដល់ប្រាក់កម្ចីជាដើម ដោយបានធ្វើឡើងតាមរយៈទូរស័ព្ទ ឬបណ្ដាញទំនាក់ទំនងសង្គមក្រោមរូបភាពផ្សេង។
សកម្មភាពឆបោកទាំងនោះគឺមានដូចជា ការជួយឧបត្ថម្ភថវិកា ឬម្ហូបអាហារ ការផ្ដល់ប្រាក់កម្ចីងាយៗ និងការក្លែងបន្លំជាអាជ្ញាធរ ឬមន្ត្រីមន្ទីរពេទ្យ ហើយទាមទារឱ្យបង់ប្រាក់ ដើម្បីជួយឧបត្ថម្ភ ឬជួយសង្គ្រោះបងប្អូន។
ដូច្នេះដើម្បីការពារពីការបោកបន្លំដោយជនខិលខូចមួយចំនួនតាមរយៈរូបភាពទាំងនេះ នាយកដ្ឋានប្រឆាំងបទល្មើសបច្ចេកវិទ្យា ណែនាំឲ្យអ្នកប្រើប្រាស់បណ្តាញសង្គម សូមធ្វើការបញ្ជាក់ប្រភពព័ត៌មានឲ្យបានច្បាស់ និងអាចដាក់ពាក្យបណ្ដឹងបានតាមរយៈអនឡាញដែលមានតំណភ្ជាប់ https://bit.ly/ACCPKH ដោយភ្ជាប់មកជាមួយនូវរូបភាព Screenshot ទាក់ទងនឹងការបោកបញ្ឆោតទាំងនោះ៕