The Phnom Penh Post Search

Search form




Logo of Phnom Penh Post newspaper Phnom Penh Post - ធនាគារ​កម្ពុជា​សាធារណៈ​ផ្តល់​អំណោយ​ដល់​កុមារ​កំព្រា

ធនាគារ​កម្ពុជា​សាធារណៈ​ផ្តល់​អំណោយ​ដល់​កុមារ​កំព្រា

ធនាគារ​កម្ពុជា​សាធារណៈ​ផ្តល់​អំណោយ​ដល់​កុមារ​កំព្រា

121210_06
ក្រុមកុមារកំព្រានៅតំបន់អតីតគំនរសំរាមស្ទឹងមានជ័យ រីករាយនឹងបានអំណោយពីធនាគារកម្ពុជាសាធារណៈ សហការី

ភ្នំពេញៈ កុមារ​កំព្រា​ចំនួន​ ៧០ ​នាក់ ដែល​កំពុង​រស់​នៅ​ក្នុង​មជ្ឈមណ្ឌល​អង្គការ​លើក​ស្ទួយ​ប្រជា​ពលរដ្ឋ ស្ថិត​នៅ​ក្នុង​តំបន់​អតីត​ភ្នំ​សំរាម​ស្ទឹង​មាន​ជ័យ បាន​ទទួល​អំណោយ​ជា​សម្ភារ​សិក្សា និង​ គ្រឿង​បរិភោគ-ឧបភោគ មួយ​ចំនួន​ពី​សាខា​ធនាគារ​កម្ពុជា​សាធារណៈ ​សាខា​នៅ​ស្ទឹងមានជ័យ និង​ម៉ៅសេទុង កាល​ពី​ថ្ងៃ​ម្សិលមិញ។​

អនុ​ប្រធាន​សាខា​ធនាគារ​កម្ពុជា​សាធារណៈ ស្ទឹង​មាន​ជ័យ កញ្ញា​ ហេង រតនា បាន​ប្រាប់​ភ្នំពេញ ប៉ុស្តិ៍​ថា ក្រៅ​ពី​ប្រតិបត្តិការ​សេវា​កម្ម​ផ្នែក​ផ្ដល់​កម្ចី​ហិរញ្ញវត្ថុ ធនាគារ កម្ពុជា​សាធារណៈ ក៏​មាន​គម្រោង​សហគមន៍​ សម្រាប់​ជួយ​ទ្រទ្រង់​និង​អភិវឌ្ឍ​កាត់​បន្ថយ​ភាព​ក្រីក្រ​របស់​ប្រជាជន​ផង​ ដែរ​ ដែល​វា​ជា​ផ្នែក​មួយ​នៃ​ការ​ចូល​រួម​ទទួល​ខុស​ត្រូវ​ផ្នែក​សង្គម។

អ្នកស្រី ​បាន​ឲ្យ​ដឹង​ទៀត​ថា កុមារ​កំព្រា​ចំនួន​៧០​នាក់ ដែល​កំពុង​រស់​នៅ​ក្នុង​មជ្ឈមណ្ឌល​អង្គការ​លើក​ស្ទួយ​ប្រជា​ពលរដ្ឋ​នឹង​ទទួល​បាន​សម្ភារ​សិក្សា ជាមួយ​នឹង​គ្រឿង​បរិភោគ​ឧបភោគ​មួយ​ចំនួន រួម​ទាំង​អង្ករ​ ៥០០​គីឡូក្រាម ដែល​សរុប​ជា​ទឹក​ប្រាក់​ប្រមាណ​ជា​១ ១០០​ដុល្លារ។

កញ្ញា ហេង រតនា បាន​ថ្លែង​ឲ្យ​ដឹង​ថា៖​ «​យើង​រំពឹង​ថា ជំនួយ​ដ៏​តិច​តួច​នេះ គឺជា​ផ្នែក​មួយ​ក្នុង​ការ​ជួយ​ដោះស្រាយ​ជីវភាព របស់​កុមារ ក្នុង​មជ្ឈ​មណ្ឌល​អង្គការ​លើក​ស្ទួយ​ប្រជា​ពលរដ្ឋ​បាន​មួយ​គ្រា​ផង​ដែរ​ ខណៈ​អង្គការ​នេះ ​កំពុង​ជួប​ប្រទះ​នូវ​កង្វះ​ខាត​ផ្នែក​ហិរញ្ញវត្ថុ»​ផង​ដែរ​នោះ។

កញ្ញា ហេង រតនា បាន​បន្ត​ថា​ ជា​រៀង​រាល់​ឆ្នាំ​គ្រប់​សាខា​របស់​ធនាគារ​កម្ពុជា​សាធារណៈ បាន​ផ្ដល់​មូលនិធិ​មួយ​ចំនួន​ដល់​សហគមន៍​ក្រីក្រ​នានា នៅ​តាម​តំបន់​នៃ​ទីតាំង​សាខា​របស់​ខ្លួន​នីមួយៗ។​

អ្នក​ស្រី​ នួន ​ហេង​លាភ នាយក​គ្រប់គ្រង​កម្មវិធី​សហគមន៍​នៃ​អង្គការ​លើក​ស្ទួយ​ប្រជា​ពលរដ្ឋ បាន​ថ្លែង​ថា កុមារ​ទាំង​៧០​នាក់​នេះ គឺជា​ក្មេង​កំព្រា ​ដែល​ឪពុក​ម្ដាយ​របស់​ពួក​គេ​មួយ​ចំនួន បាន​ស្លាប់​ដោយ​សារ​ជំងឺ​អេដស៍​និង​ខ្លះ​ត្រូវ​ឪពុក​ម្ដាយ​បោះ​បង់​ចោល។

អ្នក ស្រី បាន​ថ្លែង​ថា​៖​ «​បច្ចុប្បន្ន​យើង​មើល​ថែ​ទាំ និង​ផ្ដល់​ការ​រៀន​សូត្រ​ដល់​ពួក​គេ​ដើម្បី​ឲ្យ​ពួក​គេ​មាន​ចំណេះ​ដឹង សម្រាប់​ជា​ទុន ក្នុង​ការ​ចិញ្ចឹម​ជីវិត​នា​ពេល​អនាគត​ផង​»។

អ្នក​ស្រី បាន​ឲ្យ​ដឹង​ផង​ដែរ​ថា ក្រៅ​ពី​កុមារ​ទាំង​នេះ អង្គការ​បាន​ទទួល​ផ្គត់ផ្គង់​និង​បណ្ដុះ​បណ្ដាល​កុមារ​នៃ​គ្រួសារ​ក្រីក្រ​ ចំនួន​ជិត​១​ពាន់​នាក់ ដែល​កំពុង​រស់​នៅ​ក្នុង​តំបន់​អតីត​គំនរ​សំរាម​ស្ទឹង​មានជ័យ បុរីកីឡា និង តំបន់​បុរី​សន្តិភាព​២ ហើយ​ដែល​បច្ចុប្បន្ន​កុមារ​មួយ​ចំនួន បាន​រៀន​ចប់​ថ្នាក់​ទី​១២ និង​មួយ​ចំនួន​ទៀត​កំពុង​ទទួល​ការ​បណ្ដុះ​បណ្ដាល​មុខ​ជំនាញ បច្ចេកទេស ផ្នែក​សម្អាង ដេរ​ប៉ាក់ ជួសជុល​យាន​យន្ត ​គ្រឿង​អេឡិច​ត្រូនិក និង​ផ្នែក​សិល្បៈ​​។

អ្នក​ស្រី​ ហេង​ លាភ ថ្លែង​ថា ៖ «ជំនួយ​នេះ​គឺជា​ផ្នែក​មួយ​ក្នុង​ការ​ចូល​រួម​ធ្វើ​ឲ្យ​អង្គការ​លើក​ ស្ទួយ​ប្រជា​ពលរដ្ឋ សម្រេច​បាន​នូវ​បេសកកម្ម​របស់​ខ្លួន​ក្នុង​ការ​ជួយ​សង្គ្រោះ​កុមារ​កំព្រា​ និង​កុមារ​នៃ​គ្រួសារ​ក្រីក្រ​នៅ​កម្ពុជា​»៕

អត្ថបទគួរចាប់អារម្មណ៍