ភ្នំពេញៈ ធនាគារ PPCBank កាលពីម្សិលមិញបានផ្ដល់ថវិកាចំនួន ៦ ០០០ ដុល្លារ ដល់អង្គការ APOPO ដើម្បីគាំទ្រដល់សម្មភាពបោសសម្អាតយុទ្ធភណ្ឌមិនទាន់ផ្ទុះនៅភាគខាងជើងនៃខេត្ដសៀមរាប ដែលថវិកានេះត្រូវរំពឹងថា អាចបោសសម្អាតយុទ្ធភណ្ឌមិនទាន់ផ្ទុះនៅលើផ្ទៃដីប្រមាណពី ២៣ ០០០ ទៅ ២៥ ០០០ ម៉ែត្រការ៉េ។
លោក Shin Chang Moo នាយកប្រតិបត្តិ ធនាគារ PPCBank បានថ្លែងក្នុងពិធីប្រកាសផ្ដល់ជំនួយនេះកាលពីម្សិលមិញថា PPCBank ពិតជាមានការសោកស្តាយចំពោះប្រជាជនមួយចំនួននៅភាគខាងជើងនៃខេត្តសៀមរាបដែលពួកគេកំពុងរស់នៅក្នុងស្ថានភាពប្រថុយប្រថាន និងគ្មានសុវត្ថិភាពដែលសូម្បីតែការបោះជំហានចេញពីផ្ទះ ទៅប្រកបរបរចិញ្ចឹមជីវិត ឬធ្វើដំណើរទៅសាលារៀនក៏មានការលំបាកដែរ។
លោកថ្លែងថា៖ «ដូច្នេះវាជាកិត្តិយសណាស់ សម្រាប់ពួកយើងក្នុងការផ្តល់ការគាំទ្រដល់ APOPO សម្រាប់បេសកកម្មដ៏អស្ចារ្យ និងគួរឱ្យកោតសរសើរនេះ»។
លោក Michael Heiman ប្រធានគ្រប់គ្រងគម្រោងរបស់ APOPO ប្រចាំប្រទេសកម្ពុជាថ្លែងថា ការបរិច្ចាគរបស់ធនាគារនេះនឹងអាចឱ្យក្រុមការងាររបស់ APOPO អាចធ្វើការស្វែងរកមីន និងយុទ្ធភណ្ឌមិនទាន់ផ្ទុះនៅក្នុងខេត្តសៀមរាបលើផ្ទៃដីប្រមាណពី ២៣ ០០០ ទៅ ២៥ ០០០ ម៉ែត្រការ៉េ។
លោកបានថ្លែងថា៖ «ពួកយើងសង្ឃឹមថា ការបរិច្ចាគថវិកានេះអាចសង្គ្រោះ និងផ្តល់ក្តីសង្ឃឹមសាជាថ្មីម្តងទៀតដល់ប្រជាជនកម្ពុជាក្នុងការរស់នៅប្រកបរបរចិញ្ចឹមជីវិតដ៏ពេញលេញ»។
សេចក្ដីប្រកាសព័ត៌មានស្ដីពីការផ្ដល់ជំនួយនេះលើកឡើងថា ប្រទេសកម្ពុជា គឺជាប្រទេសមួយក្នុងចំណោមប្រទេសដែលមានគ្រាប់មីន និងយុទ្ធភណ្ឌមិនទាន់ផ្ទុះបន្សល់ពីសម័យសង្គ្រាមអស់ជាង ៣ ទសវត្សរ៍កន្លងមក។ ក្នុងនោះខេត្តសៀមរាប គឺជាខេត្ដ ១ ដែលស្ថិតនៅភាគខាងជើងនៃប្រទេសកម្ពុជា កំពុងរងផលប៉ះពាល់បណ្តាលមកពីយុទ្ធភណ្ឌមិនទាន់ផ្ទុះនៅសេសសល់ពីសម័យសង្គ្រាមលើផ្ទៃដីប្រមាណ ១ ០០០ គីឡូម៉ែត្រការ៉េ។ ចំនួនដ៏ច្រើនលើសលប់នេះបានធ្វើឱ្យចំនួនជនពិការ ដែលបណ្តាលមកពីគ្រោះថ្នាក់នៃគ្រាប់មីនមានប្រមាណ ៤០ ០០០ នាក់។
សេចក្ដីប្រកាសនេះឱ្យដឹងថា៖ «តាមរយៈកិច្ចប្រតិបត្តិការជាមួយអង្គការ APOPO ប្រជាជននៅក្នុងភាគខាងជើងខេត្តសៀមរាបនឹងអាចប្រើប្រាស់ដីរបស់ពួកគេឡើងវិញប្រកបដោយទំនុកចិត្ត និងអាចត្រឡប់ទៅរស់នៅក្នុងជីវភាពសមរម្យ និងមិនព្រួយបារម្ភអំពីគ្រោះថ្នាក់ជាយថាហេតុដែលបណ្តាលមកពីគ្រាប់មីនទៀតឡើយ»។
បើតាមលោក Michael Heiman ចាប់តាំងពីឆ្នាំ ២០១៥ APOPO តាមរយៈកិច្ចសហប្រតិបត្ដិការជាមួយមជ្ឈមណ្ឌលសកម្មភាពកំចាត់មីនកម្ពុជា (CMAC ) APOPO បាននាំយកកណ្តុរហិតមីន ពីទ្វីបអាហ្វ្រិកចំនួន ៤៣ ក្បាល មកកាន់ប្រទេសកម្ពុជាជាលើកដំបូងដើម្បីរុករកមីន។
តាមរយៈភាពវៃឆ្លាតពីធម្មជាតិ ក្នុងការហិតក្លិនដើម្បីរុករកមីន កណ្តុរហិតមីន ១ ក្បាលអាចធ្វើប្រតិបត្តិការហិតស្វែងរកមីនលើទំហំដី ៤០០ ម៉ែត្រការ៉េក្នុងរយៈពេលត្រឹមតែ ១ ថ្ងៃប៉ុណ្ណោះ។ ចំនួននេះបើប្រៀបធៀបទៅនឹងក្រុមអ្នកបោសសម្អាតមីនតាមរយៈឧបករណ៍រុករកមីនដោយដៃ គឺត្រូវប្រើរយៈពេលរហូតដល់ ៦ ថ្ងៃឯណោះ។
លោកបានបន្ថែមថា រយៈពេល ៨ ឆ្នាំកន្លងមកនេះរហូតមកដល់បច្ចុប្បន្ន ក្រុមការងារ APOPO បានធ្វើការបោសសម្អាតមីនលើផ្ទៃដីសរុប ជិត ២ លាន ម៉ែត្រការ៉េនៅទូទាំងប្រទេសកម្ពុជា និងបានរកឃើញគ្រាប់មីនចំនួន ៥៧៥៩ និងសំណល់ជាតិផ្ទុះចំនួន ៤០៩៥៤៕