.jpg)
មន្ត្រីសុខាភិបាលពិនិត្យសុខភាពកម្មការិនីដែលត្រូវបានដាក់ឲ្យនៅដាច់ដោយឡែកចំនួន ១៤ ថ្ងៃនៅវិទ្យាល័យហ៊ុនសែនជម្ពូវ័នពីម្សិលមិញ។ ហេង ជីវ័ន
ភ្នំពេញៈ កម្មករនិយោជិតដែលអវត្តមានមិនបានធ្វើការងារក្នុងឱកាសបុណ្យចូលឆ្នាំថ្មីប្រមាណ ៣ ម៉ឺននាក់ ទូទាំងប្រទេសកាលពីម្សិលមិញចាប់ផ្តើមធ្វើចត្តាឡីស័ករយៈពេល ១៤ ថ្ងៃ ដែលក្រសួងការងាររៀបចំមណ្ឌល ចត្តាឡីស័ក ១០ កន្លែង នៅរាជធានីភ្នំពេញក្នុងនោះមានកម្មករ ២ នាក់ ត្រូវបានយកសំណាកទៅត្រួតពិនិត្យ បន្ទាប់ពីពិនិត្យឃើញអាការសង្ស័យ។
ក្នុងសន្និសីទកាសែតក្រោយពីបញ្ចប់ការចុះត្រួតពិនិត្យលើកម្មករនៅតំបន់សេដ្ឋកិច្ចពិសេស លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងពីម្សិលមិញថា កម្មករក្នុងវិស័យរោងចក្រដែលបានឈប់សម្រាកនៅទូទាំងប្រទេសក្នុងឱកាសបុណ្យចូលឆ្នាំមានប្រមាណ ៣ ម៉ឺននាក់។ ក្នុងនោះរាជធានីភ្នំពេញមាន ១ ៥ ០០០ នាក់។
លោកបន្តថា ក្រោយការពិនិត្យមានកម្មករចំនួន ២ នាក់ ដែលសង្ស័យកំពុងយកសំណាកទៅពិនិត្យ ខណៈដែលក្រសួងបាននិងកំពុងបន្តធ្វើការត្រួតពិនិត្យនៅតាមមណ្ឌលបណ្តោះអាសន្នរយៈពេល ៥ ថ្ងៃចាប់ពីថ្ងៃចន្ទតទៅ។
លោកបានបន្តថា៖ «ក្រសួងការងារបានសហការជាមួយសាលារាជធានីភ្នំពេញ និងក្រសួងសុខាភិបាលរៀបចំមណ្ឌលត្រួតពិនិត្យសុខភាពបណ្តោះអាសន្នចំនួន ១០ កន្លែង នៅរាជធានីភ្នំពេញ។ ក្នុងនោះមាន ៣ កន្លែងនៅតំបន់ផ្លូវវ៉េងស្រេង ហើយនៅតំបន់វឌ្ឍនៈ ២ (កន្លែង) នៅតំបន់សេដ្ឋកិច្ចពិសេសនៅវិទ្យាល័យជម្ពូវ័ន្តនៅអនុវិទ្យាល័យខណ្ឌដង្កោ និងនៅវិទ្យាល័យខណ្ឌឫស្សីកែវ ១ កន្លែងទៀតសរុបទៅមាន ១០ កន្លែង ដើម្បីពិនិត្យសុខភាពជូនបងប្អូនយើង»។
លោក ហេង សួរ បានបន្តថា សម្រាប់កម្មករដែលបានឈប់សម្រាកក្នុងឱកាសបុណ្យចូលឆ្នាំថ្មីគឺក្រសួងតម្រូវឲ្យនៅដាច់ដោយឡែករយៈពេល ១៤ ថ្ងៃទាំងអស់គ្នា ដោយគ្រាន់តែធ្វើការបែងចែងជា ២ កម្រិត។ ១ កម្រិតគឺសម្រាប់អ្នកដែលមានរោគសញ្ញាសង្ស័យដែលតម្រូវឲ្យធ្វើការតាមដាន ឬក៏កម្មករដែលមិនមានកន្លែងស្នាក់នៅដាច់ដោយឡែកដោយខ្លួនឯង។ ចំណែកកម្រិតទី ២ គឺកម្មករដែលទទួលបានការត្រួតពិនិត្យរួចហើយថា គ្មានរោគសញ្ញានោះទេ គឺមន្ត្រីជំនាញនឹងចេញលិខិតបញ្ជាក់ដល់ពួកគេដោយតម្រូវឲ្យធ្វើចត្តាឡីស័កនៅកន្លែងស្នាក់នៅរបស់ខ្លួនក្នុងរយៈពេល ១៤ ថ្ងៃដូចគ្នា។
លោកបញ្ជាក់ថា៖ «ការដាក់ឲ្យនៅដាច់ដោយឡែកនេះគឺសំណូមពរពីមតិកម្មករ ៩៨ ភាគរយដែលមកធ្វើការ ដូច្នេះវាមិនមែនជាការដាក់ទណ្ឌកម្មនោះទេ។ តើគាត់ ៩៨ ភាគរយមានអារម្មណ៍បែបម៉េច? គាត់មិនហ៊ានទទួលយកអ្នកអវត្តមានប្រមាណ ២ ភាគរយមកនៅក្បែរខ្លួន។ ដូច្នេះហើយបានរដ្ឋាភិបាលត្រូវរកវិធីធ្វើម៉េចយក ២ ភាគរយនេះឲ្យនៅឆ្ងាយពីកម្មករទាំងអស់»។
អ្នកស្រី សាន ឡាវ កម្មការិនីរោងចក្រ CTW ដែលកំពុងស្ថិតក្នុងបន្ទប់ដាច់ដោយឡែកជាមួយកម្មករដទៃទៀតនៅក្នុងវិទ្យាល័យជម្ពូវ័ន្តប្រាប់ភ្នំពេញប៉ុស្តិ៍ពីម្សិលមិញថា ការពិនិត្យសុខភាពលើខ្លួនអ្នកស្រីគឺមិនមានភាពមិនប្រក្រតីនោះទេ។ ប៉ុន្តែអ្នកស្រីក៏មិនដឹងច្បាស់ថា មន្ត្រីជំនាញនឹងបន្តទុកអ្នកស្រីបន្តទៀតឬយ៉ាងណានោះទេ។
អ្នកស្រី ឡាវ ប្រាប់មូលហេតុថា៖ «ខ្ញុំឈប់សម្រាក ១ ថ្ងៃមិនបានទៅស្រុកកំណើតនោះទេ ដោយសារតែពេលហ្នឹងមានភ្លៀងខ្លាំង ហើយខ្ញុំខ្លាចឆ្លងកូវីដតាមទឹកភ្លៀង ក៏ខ្ញុំសម្រេចមិនទៅធ្វើការ។ ប៉ុន្តែនៅថ្ងៃបន្ទាប់ ខ្ញុំក៏បានទៅធ្វើការធម្មតា តែគេមិនឲ្យចូលធ្វើការទេឲ្យនៅដាច់ដោយឡែកសិន។ ខ្ញុំបារម្ភណាស់ បារម្ភខ្លាចគេមិនទទួលយកខ្ញុំធ្វើការវិញទេ បើអ៊ីចឹងមែន ខ្ញុំយ៉ាប់ហើយ ព្រោះជំពាក់លុយធនាគារ គ្មានអីសងគេទេ»។
បើតាមលោក ហេង សួរ បានឲ្យដឹងថា ក្នុងចំណោមកម្មករទាំង ៣ ម៉ឺននាក់នេះ បើទោះកម្មករបានធ្វើចត្តាឡីស័ករយៈពេល ១៤ ថ្ងៃរួចក៏ដោយ ក៏មិនប្រាកដថា កម្មករទាំងនោះអាចនឹងត្រូវរោងចក្រទទួលត្រឡប់ឲ្យចូលធ្វើការវិញជាធម្មតានោះដែរ។ ព្រោះកម្មករបានប្រព្រឹត្តកំហុសធ្ងន់បាត់ទៅហើយ ដោយឈប់សម្រាកគ្មានការអនុញ្ញាត ហើយការទទួលយកឲ្យចូលធ្វើការវិញ គឺអាស្រ័យលើថៅកែរោងចក្រ។
លោកបន្ថែមថា៖ «អ្នកដែលអវត្តមានមានន័យថា គាត់បានបោះបង់ចោលកន្លែងការងាររួចទៅហើយនៅក្នុងអំឡុងពេលចូលឆ្នាំហ្នឹង ហើយបើបន្ថែមពីនេះទៅទៀត បើគាត់អត់មកបង្ហាញខ្លួននៅពេលនេះទៅប្រាប់រោងចក្រទៀត បានន័យថា គាត់បោះបង់ចោល ការងារ ស្របពេលដែលគាត់បានឈប់ដោយឥតច្បាប់ហ្នឹង។ វាល្មើសទៅនឹងបទបញ្ជាផ្ទៃក្នុងផង និងវិធានការសុខភាព សុវត្ថិភាពកម្មករផង ហើយបូកថែមនឹងគាត់អវត្តមានក្រោយពេលចូលឆ្នាំទៀតគឺគ្រប់គ្រាន់ហើយ»។
បើតាមលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងក្នុងសន្និសីទកាសែតពីម្សិលមិញថា ក្រសួងសុខាភិបាលបានផ្តល់ជូនក្រសួងការងារ បណ្តុះបណ្តាលវិជ្ជាជីវៈប្រមាណ ១ លានដុល្លារ ដើម្បីរ៉ាប់រងការហូបចុករបស់កម្មករក្នុងអំឡុងពេលធ្វើចត្តាឡីស័ករយៈពេល ១៤ ថ្ងៃ ខណៈដែលវិស័យផ្សេងទៀត ក្រសួងអះអាងថាការធ្វើចត្តាឡីស័កគឺអាស្រ័យទៅលើការកំណត់របស់ស្ថាប័នឯកជននីមួយៗ៕
វីដេអូ៖
