.jpg)
នគរបាលកំពុងត្រួតពិនិត្យរថយន្តដែលជួបគ្រោះថ្នាក់ចរាចរណ៍។ រូបថត នគរបាលបាត់ដំបង
បាត់ដំបងៈ នគរបាលខេត្តបាត់ដំបងកាលពីម្សិលមិញនៅកំពុងបន្តកសាងសំណុំរឿង ដើម្បីបញ្ជូនបុរសអ្នករត់តាក់ស៊ីម្នាក់ទៅតុលាការពាក់ព័ន្ធករណីបង្កគ្រោះថ្នាក់ចរាចរណ៍ បណ្តាលឱ្យមានមនុស្សស្លាប់ ៨ នាក់ នៅភូមិពពាលខែ ឃុំអូរតាគី ស្រុកថ្មគោលកាលពីយប់ថ្ងៃទី ២៤ ខែធ្នូ។
លោក ចាន់ សុធី នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបាត់ដំបងបានឱ្យដឹងកាលពីម្សិលមិញថា តៃកុងឡានតាក់ស៊ីដែលបង្កគ្រោះថ្នាក់ចរាចរណ៍នោះបានរងរបួសស្រាលហើយរហូតមកដល់ថ្ងៃម្សិលមិញមានសភាពធូរស្បើយឡើងវិញហើយ បន្ទាប់ពីបានសម្រាកព្យាបាលដោយគ្រូពេទ្យនៅក្នុងស្នងការដ្ឋាននគរបាលខេត្តបាត់ដំបង។
លោក សុធី ថ្លែងថា៖ «សមត្ថកិច្ចនគរបាលកំពុងតែរៀបចំឯកសារបញ្ជូនគាត់ទៅតុលាការ ដើម្បីឱ្យលោកព្រះរាជអាជ្ញា និងចៅក្រមចាត់ការទៅតាមនីតិវិធីច្បាប់» ។ បើតាមលោក ចាន់ សុធី នេះគឺជាលើកទី ១ ហើយដែលករណីគ្រោះថ្នាក់ចរាចរណ៍ក្នុងខេត្តបាត់ដំបង កើតឡើងបណ្តាលឱ្យមានមនុស្សស្លាប់រហូតដល់ ៨ នាក់បែបនេះ។
បើតាមលោក សុធី មុនពេលកើតហេតុមានរថយន្តដឹកទឹកកកធុនធំម៉ាក HYUNDAI ពណ៌សពាក់ស្លាកលេខភ្នំពេញ 3F-0169 ធ្វើដំណើរពីទិសខាងកើត ទៅលិច មកដល់ចំណុចកើតហេតុ ស្រាប់តែរថយន្តតាក់ស៊ីម៉ាក Camary ពណ៌សពាក់ស្លាកលេខកំពង់ស្ពឺ 2A-0377 ធ្វើដំណើរក្នុងទិសដៅផ្ទុយគ្នាបានរេចង្កូតទៅបុករថយន្តដឹកទឹកកកពេញមួយទំហឹងបណ្តាលឱ្យក្រឡាប់ធ្លាក់ផ្លូវ។
លោក សុធី ថ្លែងថា៖ «ក្នុងឡានតាក់ស៊ីមានគ្នា ៩ នាក់ ស្លាប់ ៧ នាក់ នៅរស់តៃកុង និងក្មេងប្រុសម្នាក់ ចំណែកឡានដឹកទឹកកកមានគ្នា ២ នាក់ស្លាប់តៃកុង ចំណែកព្រូឡាននៅរស់ អ៊ីចឹងមានអ្នកស្លាប់ទាំងអស់ ៨ នាក់ ស្រី ៤ ប្រុស ៤» ។ បើតាមលោក សុធី សាច់ញាតិជនរងគ្រោះបានសម្រេចយល់ព្រមធ្វើបុណ្យនៅក្នុងវត្តអូរតាគីទាំងអស់គ្នា។
លោក ហ៊ឹម យ៉ាន អគ្គស្នងការរងនគរបាលជាតិ និងជាប្រធានគណៈកម្មាធិការសុវត្ថិភាពចរាចរណ៍ផ្លូវគោកបានប្រាប់ភ្នំពេញប៉ុស្តិ៍កាលពីម្សិលមិញថា គ្រោះថ្នាក់ចរាចរណ៍ ១១ ខែឆ្នាំ ២០២០ បើប្រៀបធៀប ១១ ខែឆ្នាំ ២០១៩ មានការថយចុះទាំងចំនួនហេតុការណ៍ ទាំងចំនួនអ្នកស្លាប់ និងរបួស។
លោក យ៉ាន ថ្លែងថា៖ «ឆ្នាំនេះ បើប្រៀបធៀបឆ្នាំ ២០១៩ គ្រោះថ្នាក់ចរាចរណ៍មានការថយចុះជាង ៧០០ លើកជាមួយគ្នានោះចំនួនមនុស្សស្លាប់ ក៏មានការថយចុះ ២៦៩ នាក់ផងដែរ ខណៈអ្នករបួសថយចុះ ១ ២២៧ នាក់» ។
លោក ហ៊ឹម យ៉ាន បញ្ជាក់ថា ទោះបីជាចំនួនគ្រោះថ្នាក់ចរាចរណ៍ថយចុះក៏ដោយតែមិនមានន័យថា នៅឆ្នាំ ២០២១ ខាងមុខនគរបាលមានការបន្ធូរដៃក្នុងការអនុវត្តច្បាប់ចរាចរណ៍នោះឡើយ។ បើតាមលោក យ៉ាន កត្តា ដែលធ្វើឱ្យគ្រោះថ្នាក់ចរាចរណ៍ថយចុះដោយសារតែការរឹតបន្តឹងការអនុវត្តច្បាប់ចរាចរណ៍ និងមានការចូលរួមសហការពីប្រជាពលរដ្ឋ៕
