.jpg)
នគរបាលកំពុងតាមស្ទាក់ចាប់ជនសង្ស័យជាជនជាតិចិនដែលឆក់ស្បោងប្រាក់ពីអាជីវករខ្មែរ នៅថ្ងៃទី៥ខែកក្កដា ឆ្នាំ២០២០។ រូបថត នគរបាល
ខេត្តព្រះសីហនុ៖ នគរបាលខេត្តព្រះសីហនុ នៅព្រឹកថ្ងៃទី ៥ ខែ កក្កដា ឆ្នាំ ២០២០ បានចាប់ឃាត់ខ្លួនបុរសជនជាតិចិនម្នាក់និងកំពុងតាមរកចាប់ខ្លួនបក្ខពួកម្នាក់ទៀត ដែលបានឆក់ស្បោងលុយ ពីអាជីវករខ្មែរ ២ នាក់ប្តីប្រពន្ធ នៅភូមិ៥ សង្កាត់៤ ក្រុង-ខេត្តព្រះសីហនុ។
លោក ជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងនៅថ្ងៃទី ៥ ខែកក្កដា ថា ជនសង្ស័យដែលសមត្ថកិច្ចចាប់ខ្លួនឈ្មោះ WANG JiNGHONG ភេទ ប្រុស អាយុ ៤៩ ឆ្នាំ ជាបុគ្គលិកកាស៊ីណូមួយកន្លែងក្នុងក្រុង-ខេត្ត ព្រះសីហនុ។
ចំណែកបុរសជាបក្ខពួកដែលជាជនជាតិចិនម្នាក់ទៀតបានគេចខ្លួន ខណៈសមត្ថកិច្ចកំពុងប្រតិបត្តិការបង្ក្រាបជាក់ស្តែង។ ជនរងគ្រោះមានឈ្មោះ សយ លីណា អាយុ ២៤ ឆ្នាំ (រងរបួសស្រាល) ប្តីឈ្មោះ អីវ មានអាយុ ៣២ ឆ្នាំ ជាអាជីវករប្តូរប្រាក់នៅផ្សារលើ ក្រុងព្រះសីហនុ។
លោកបានរៀបរាប់ប្រាប់ថា នៅព្រឹកថ្ងៃទី ៥ ខែកក្កដា ជនរងគ្រោះ ២ នាក់ប្តីប្រពន្ធ ដែលជាអាជីវករប្តូរប្រាក់បានជិះម៉ូតូ ១ គ្រឿង ឌុបគ្នាធ្វើដំណើរចេញពីផ្ទះ នៅក្នុងបុរី HIllTON ក្រុមទី ១៥ នៅភូមិ ៥ សង្កាត់ ៤ ក្នុងបំណងទៅផ្សារលើ ក្នុងក្រុងព្រះសីហនុ ដើម្បីប្រកបរបរដូរលុយ ដូចសព្វមួយដង។
លុះជនរងគ្រោះកំពុងធ្វើដំណើរតាមដងផ្លូវ ស្រាប់តែមានក្រុមជនសង្ស័យជាជនជាតិចិន ២ នាក់ ជិះម៉ូតូ ១ គ្រឿង ម៉ាក Air Blade ពណ៌ទឹកប្រាក់លាយខ្មៅសំដៅទៅជនរងគ្រោះ។
លោកប្រាប់តាមសម្តីជនរងគ្រោះថា ក្រុមចោរទាំង ២ នាក់ បានជិះម៉ូតូក្បែរម៉ូតូពួកគាត់ ហើយក្រុមជនសង្ស័យបានឈប់ម៉ូតូស្ទាក់ម៉ូតូជនរងគ្រោះ ហើយបានវាយប្រតាយប្រតប់ជាមួយជនរងគ្រោះជាប្រពន្ធដណ្តើមស្បោងប្រាក់ បណ្តាលឲ្យរងរបួស រីឯក្រុមចោរបានឆក់យកស្បោងលុយពីជនរងគ្រោះ។ គ្រានោះជនរងគ្រោះ បានស្រែកឆោឡោហៅប្រជាពលរដ្ឋឲ្យជួយ និងរាយការណ៍ជូនសមត្ថកិច្ចឲ្យមកជួយធ្វើអន្តរាគមន៍ ទាន់ពេលវេលា។
លោកបន្តថា ភ្លាមៗនៃប្រតិបត្តិការបង្ក្រាបក្រុមចោរនេះ សមត្ថកិច្ចរបស់លោកបានតាមចាប់បានម្នាក់។
លោកថ្លែងថា៖ «គ្នាគេមាន ២ នាក់ ហើយក្នុងនោះ សមត្ថកិច្ចឃាត់បានម្នាក់ និងម្នាក់ទៀត សមត្ថកិច្ចយើងកំពុងតាមចាប់ទៀត»។ បើតាមលោកស្នងការ ក្រុមជនសង្ស័យបានយកលុយជនរងគ្រោះអស់ចំនួន ៣០ លានរៀល៕
