.jpg)
សមត្ថកិច្ចចុះមកត្រួតពិនិត្យ ក្រោយជនរងគ្រោះទទួលមរណៈភាព។ រូបថត ហ្វេសប៊ុក
កំពុងធំ៖ បុរសម្នាក់បានស្លាប់ កាលពីថ្ងៃទី ២០ ខែមេសា នៅភូមិស្លាករ ឃុំបន្ទាយស្ទោង ស្រុកស្ទោង ខេត្តកំពង់ធំ ដោយហេតុទទួលការព្យាបាលជំងឺពីមនុស្សក្នុងភូមិដែលគ្មានវិជ្ជាជីវៈពេទ្យ ខណៈនគរបាលបានកំពុងស៊ើបអង្កេតទៅលើករណីនេះ។
លោក ជា ពឿន ប្រធានការិយាល័យទទួលការងារផែនព្រហ្មទណ្ឌនៃស្នងការដ្ឋាននគរបាលខេត្តកំពង់ធំ កាលពីថ្ងៃទី ២១ មេសា បានឱ្យដឹងថា ជនរងគ្រោះឈ្មោះ ឌាន ឌាង អាយុ ៤១ ឆ្នាំ រីឯ បុរសដែលគ្មានជំនាញពេទ្យនោះឈ្មោះ ហ៊ាន ចំរើន អាយុ ២៣ ឆ្នាំ ពួកគេស្នាក់នៅភូមិ-ឃុំ ជាមួយគ្នា។
លោក ពឿន ថ្លែងថា៖ «ក្រោយដឹងថា ជនរងគ្រោះស្លាប់ភ្លាម គ្រូពេទ្យនោះក៏គេចខ្លួនភ្លាមៗដែរ។ ប៉ុន្តែយ៉ាងណាយើងក៏កំពុងស្វែងរកគាត់ ដើម្បីយកមកផ្តន្ទាទោសតាមច្បាប់ឱ្យខានតែបាន»។
លោក វ៉ន សុភ័ណ អធិការរងនៃអធិការដ្ឋានស្រុកស្ទោងប្រាប់នៅថ្ងៃដដែលនេះក៏បានឱ្យដឹងដែរថា កាលពីវេលាថ្ងៃត្រង់ថ្ងៃទី ២០ មេសា ជនរងគ្រោះមានអាការមិនស្រួលខ្លួន ហើយបានប្រើកូនទៅហៅឪពុករបស់ជនសង្ស័យដែលជាគ្រូពេទ្យ ដើម្បីទៅព្យួរសេរ៉ូមឱ្យជនរងគ្រោះ។ ប៉ុន្តែដោយសារឪពុកជនល្មើសមិននៅផ្ទះ ជនសង្ស័យដែលជាកូនបានយកសេរ៉ូមទៅព្យួរឱ្យជនរងគ្រោះព្រោះថា ខ្លួនគេឧស្សាហ៍ដើរចាក់ថ្នាំឱ្យអ្នកភូមិដែរ។
លោកបញ្ជាក់ថា៖ «គាត់មិនមែនជាគ្រូពេទ្យអីទេ តែគាត់ចេះតាមឪពុករបស់គាត់ហើយចេះតែដើរចាក់ថ្នាំ ឬផ្សំថ្នាំឱ្យគេទៅ។ តែរាល់ដងមិនអីទេ ទើបតែលើកនេះជួបបញ្ហាអីចឹង»។
លោកបានថ្លែងដោយយោងតាមការឱ្យដឹងពីអ្នកភូមិថា ជនរងគ្រោះបានស្លាប់តាំងពីថ្ងៃត្រង់ថ្ងៃទី ២០ មេសា ហើយប្រពន្ធរបស់ជនរងគ្រោះទៅលក់ត្រីមិនដឹងថា ប្តីស្លាប់ទេ ព្រោះគ្មានទូរស័ព្ទទំនាក់ទំនង។ លុះពេលប្រពន្ធជនរងគ្រោះជិះកង់ជិតដល់ផ្ទះក៏ឮសូរសំឡេងមេក្រូចេញពីផ្ទះទើបដឹងថា ប្តីស្លាប់ក៏ជូនដំណឹងទៅមេភូមិហើយអាជ្ញាធរភូមិក៏រាយការណ៍បន្ត។
លោកថ្លែងថា៖ «ករណីនេះ ប្រពន្ធជនរងគ្រោះបានដាក់ពាក្យបណ្តឹងមកអធិការដ្ឋាននគរបាលស្រុកស្ទោងហើយ ហើយសមត្ថកិច្ចកំពុងចាត់ការតាមបណ្តឹងនេះ»៕
