.jpg)
ប្រជាពលរដ្ឋប៉ះទង្គិចគ្នាជាមួយសមត្ថកិច្ច កាលពីថ្ងៃទី ០១ សីហា។ រូបថត ហ្វេសប៊ុក
ព្រះសីហនុៈ នគរបាលខេត្ដព្រះសីហនុកាលពីម្សិលមិញនៅកំពុងបន្តសាកសួរពលរដ្ឋចំនួន ៤ នាក់ ពាក់ព័ន្ធនឹងករណីដែលពលរដ្ឋទាំងនេះបានយកគ្រឿងចក្រ ទៅឈូសឆាយដីនៅតំបន់ឧទ្យានជាតិរាម និងបានបង្កហិង្សាលើសមត្ថកិច្ច បណ្តាលឱ្យសមត្ថកិច្ច ៤ នាក់រងរបួសកាលពីថ្ងៃទី ១ ខែ សីហា ឆ្នាំ ២០២០។ នេះបើតាមលោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុប្រាប់ភ្នំពេញប៉ុស្ដិ៍កាលពីម្សិលមិញ។
លោក ឃាង ភារម្យ ថ្លែងថា កាលពីថ្ងៃសៅរ៍ ទី ១ ខែសីហា កម្លាំងចម្រុះជាច្រើននាក់បានទៅណែនាំ និងហាមឃាត់ពលរដ្ឋ ១ ក្រុម មានគ្នាប្រមាណ ២០ នាក់ ដឹកនាំដោយឈ្មោះ ស្មាន ស្មាអែល ភេទប្រុសជាខ្មែរអ៊ិស្លាមកំពុងធ្វើសកម្មភាពយកគ្រឿងចក្រឈូសឆាយដីនៅចំណុចភូមិស្មាច់ដែង ឃុំរាម ស្រុកព្រៃនប់។ ប៉ុន្ដែក្រុមពលរដ្ឋទាំងនេះបានប្រើហិង្សាមកលើសមត្ថកិច្ចឱ្យរងរបួសចំនួន ៤ នាក់។
លោកថ្លែងថា៖ «ចំពោះការប៉ះទង្គិចកាលពីម្សិលមិញ (ទី ១ សីហា) បក្ខពួករបស់ក្រុម ស្មាន ស្មាអែល បានដឹកនាំគ្នាធ្វើការវាយប្រហារ បង្កហិង្សាមកលើសមត្ថកិច្ចរបស់យើងក្នុងនោះសមត្ថកិច្ចក៏បានឃាត់ខ្លួនពលរដ្ឋចំនួន ៤ នាក់ (មានស្រី ៣ នាក់) បញ្ជូនទៅស្នងការដ្ឋាននគរបាលខេត្ដដើម្បីធ្វើការសាកសួរតាមនីតិវិធី។ ដូច្នេះកិច្ចការងារនេះនៅក្នុងនីតិវិធីរបស់សមត្ថកិច្ច យើងរង់ចាំសមត្ថកិច្ចធ្វើការសម្រេចនាពេលក្រោយ»។
លោក ភារម្យ ឱ្យដឹងថា តាំងពីអំឡុងឆ្នាំ ២០១៧ ក្រុមអនាធិបតេយ្យ ១ ក្រុម ដឹកនាំដោយឈ្មោះ សេន សាឡេស ភេទ ប្រុស អាយុ ៥៨ ឆ្នាំជាខ្មែរអ៊ិស្លាម មុខរបរធ្វើចម្ការមានទីលំនៅភូមិស្មាច់ដែង ឃុំរាម ស្រុកព្រៃនប់បានចូលទៅកាប់រានដីព្រៃយកធ្វើជាកម្មសិទ្ធិនៅក្នុងតំបន់ឧទ្យានជាតិព្រះសីហនុ «រាម» នេះ។ ក្រោយមកមន្ទីរបរិស្ថានខេត្តកសាងសំណុំរឿងប្តឹងឈ្មោះ សេន សាឡេស និងបក្ខពួកបញ្ជូនទៅអយ្យការអមសាលាដំបូងខេត្តព្រះសីហនុ ២ លើករួចមកហើយ និងត្រូវបានតុលាការដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ។
លោកបានបញ្ជាក់ថា ចំណែកឈ្មោះ ស្មាន ស្មាអែល ដែលដឹកនាំពលរដ្ឋប្រើហិង្សាលើសមត្ថកិច្ចនេះក៏ជាបក្ខពួករបស់ក្រុមឈ្មោះ សេន សាឡេស ដែរ។ កន្លងមកមន្ទីរបរិស្ថានក៏ធ្លាប់បានកសាងសំណុំរឿងបញ្ជូនទៅតុលាការរួមជាមួយ សេន សាឡេស ដែរ។
បើតាមលោក ភារម្យ បច្ចុប្បន្នបក្ខពួកក្រុមរបស់ឈ្មោះ សេន សាឡេស នេះនៅតែបន្តសកម្មភាពឈូសឆាយដីនៅតំបន់ឧទ្យានជាតិព្រះសីហនុ «រាម» ដដែលទើបសមត្ថកិច្ចបានចុះហាមឃាត់ហើយពួកគេប្រើហិង្សាលើសមត្ថកិច្ចរហូតឈានដល់ការឃាត់ខ្លួនពលរដ្ឋចំនួន ៤ នាក់នោះ។
លោកបញ្ជាក់ថា៖ «ពេលនេះ សមត្ថកិច្ចខេត្ដយើងបានកំណត់អត្ដសញ្ញាណក្រុមនេះរួចរាល់ហើយដែរ។ ចំណែកសំណុំរឿងរបស់ សេន សាឡេស និងបក្ខពួកនេះគឺកំពុងស្ថិតនៅក្នុងនីតិវិធីរបស់តុលាការ និងសមត្ថកិច្ចជាអ្នកសម្រេច»។
លោក ឃាង ភារម្យ ក្នុងនាមរដ្ឋបាលខេត្ដបានស្នើដល់ពលរដ្ឋកុំឱ្យចាញ់បោកការញុះញង់របស់បុគ្គលឈ្មោះ សាន សាឡេស, ស្មាន ស្មាអែល និងក្រុមដែលកំពុងធ្វើសកម្មភាពបំផុសបំផុលឱ្យមានសកម្មភាពកាប់រានឈូសឆាយដីសាធារណៈរបស់រដ្ឋ ដីព្រៃនៅក្នុងដែនអភិរក្សដោយខុសច្បាប់ទៀត។ លោកបានព្រមានថា៖ «សុំដកខ្លួនចេញជាបន្ទាន់ ដើម្បីចៀសផុតពីការប្រឈមមុខចំពោះផ្លូវច្បាប់។ រដ្ឋបាលខេត្ដនឹងចាត់វិធានការច្បាប់ដោយមិនមានការលើកលែងទេ»។
លោកបញ្ជាក់ថា បច្ចុប្បន្នសំណុំរឿងរបស់ សេន សាឡេស និងបក្ខពួក កំពុងស្ថិតនៅក្នុងនីតិវិធីរបស់តុលាការ ហើយតុលាការបានដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ។ ករណីដែលបុគ្គលនេះ និងបក្ខពួកធ្វើទង្វើណាមួយផ្ទុយពីដីការបស់តុលាការនោះជាទង្វើល្មើសច្បាប់។
មិនមានប្រភពទាក់ទងតំណាងពលរដ្ឋ ដើម្បីសុំធ្វើអត្ថាធិប្បាយលើបញ្ហានេះបានឡើយកាលពីម្សិលមិញ។ ប៉ុន្តែលោកស្រី ជៀប សុធារី អ្នកសម្របសម្រួលអង្គការការពារសិទ្ធិមនុស្សអាដហុកប្រចាំខេត្ដព្រះសីហនុ បានឱ្យដឹងថា ក្រុមប្រជាពលរដ្ឋដែលកំពុងតវ៉ារឿងដីធ្លីខាងលើនេះភាគច្រើនគឺជាពលរដ្ឋខ្មែរអ៊ិស្លាមដោយបានចូលមកតាំងទីលំនៅលើដីនៅឧទ្យានជាតិព្រះសីហនុ រាម ក្នុងអំឡុងឆ្នាំ ២០១៦-២០១៧។
លោកស្រីថ្លែងថា៖ «កន្លងមកអាជ្ញាធរខេត្ដធ្លាប់បានចុះទៅសម្របសម្រួលដោះស្រាយជាមួយពលរដ្ឋឱ្យបញ្ឈប់មកតាំងទីលំនៅ ឈូសឆាយដីនៅឧទ្យានជាតិព្រះសីហនុរាមស្ថិតនៅក្នុងភូមិរាមនេះដោយផ្ដល់ទីតាំងដីគោលនយោបាយរបស់រដ្ឋជំនួសវិញ។ ប៉ុន្ដែត្រូវបានប្រជាពលរដ្ឋបដិសេធ ដោយអះអាងថា ដីដែលរដ្ឋបាលខេត្ដព្រះសីហនុគ្រោងនឹងផ្ដល់ឱ្យនោះ គឺមានទំហំតូចពេក»។
ទោះយ៉ាងណាលោកស្រី ជៀបសុធារី ស្នើឱ្យអាជ្ញាធរខេត្តព្រះសីហនុរកដំណោះស្រាយគោលនយោបាយណាមួយសមរម្យ ចំពោះប្រជាពលរដ្ឋដែលទៅចាប់ដីនៅតំបន់ឧទ្យានជាតិព្រះសីហនុរាមនោះដោយផ្តល់ឲ្យពួកគាត់នូវដីដែលអាចសាងសង់លំនៅឋានបាន ព្រោះពលរដ្ឋទាំងនោះសុទ្ធតែពលរដ្ឋក្រីក្រ៕
