ព្រះសីហនុ៖ មន្ត្រីនគរបាលបាននិងកំពុងសាកសួរបុរសខ្មែរម្នាក់ និងចិនម្នាក់ អំពីការបើករថយន្តឆ្លងកាត់បំពានតំបន់បិទខ្ទប់ដែលជាវិធានទប់ស្កាត់ការរីករាលដាលជំងឺកូវីដ ១៩ នៅក្នុងខេត្តព្រះសីហនុ ដែលត្រូវឃាត់ខ្លួនកាលពីថ្ងៃទី ៣ ខែឧសភា។
លោក កុល ផាលី ស្នងការរងទទួលការងារផែនព្រហ្មទណ្ឌនៃស្នងការដ្ឋាននគរបាលខេត្តព្រះសីហនុប្រាប់ ភ្នំពេញ ប៉ុស្តិ៍ នៅថ្ងៃទី ៤ ឧសភាថា បុរសខ្មែរឈ្មោះ លូ គឹមហ្វាត អាយុ ២៧ ឆ្នាំ ជាអ្នកបកប្រែភាសាចិន និងបុរសជនជាតិចិនឈ្មោះ CHEN XUBO អាយុ ២៧ ឆ្នាំ បម្រើការនៅសណ្ឋាគារមួយកន្លែងខេត្តព្រះសីហនុ។
លោកថ្លែងថា៖ «ជនទាំង ២ នាក់ ខាងជំនាញរបស់ខ្ញុំកំពុងសាកសួរ ហើយដំណើរនីតិវិធីក៏កំពុងបន្តដែរ។ រឿងនេះខ្ញុំមិនទាន់ចំណាត់ការយ៉ាងម៉េចទេ តែពួកគេបំពាននឹងបម្រាមបិទខ្ទប់»។
លោក ផាលី បានប្រាប់ដោយយោងរបាយការណ៍ថា កាលពីវេលាម៉ោងប្រមាណជា ៤ រសៀល ថ្ងៃទី ០៣ ខែ ឧសភា ឆ្នាំ ២០២១ មានបុរសជាជនជាតិខ្មែរ និងបុរសជនជាតិចិនចំនួន ២ នាក់ បានបើករថយន្តឆ្លងកាត់តំបន់ហាមឃាត់បិទខ្ទប់នៅចំណុចគោលដៅត្រួតពិនិត្យភ្នំ K៩៦ សង្កាត់លេខ ៤ ក្រុងព្រះសីហនុ ខេត្ដព្រះសីហនុ ទើបមន្ត្រីជំនាញនាំខ្លួនបុរសទាំង ២ នាក់ មកសាកសួរនៅស្នងការដ្ឋាននគរបាលខេត្តព្រះសីហនុ ដោយរកឃើញមានឯកសណ្ឋានមន្ត្រីនគរបាលដូចជា អាវ និងមួក។
លោកបញ្ជាក់ថា នៅក្នុងរថយន្តនោះ មានដូចជាអាវនគរបាលថ្នាក់វរសេនីយ៍ត្រីចំនួន ១, មួកនគរបាលថ្នាក់ឧត្តមសេនីយ៍ ចំនួន ១។
លោក ផាលី ថ្លែងថា៖ «ជនទាំងពីរនាក់នោះ មិនជាប់ពាក់ព័ន្ធបទល្មើស ក្នុងការក្លែងសម្លៀកបំពាក់នគរបាលទេ ព្រោះអ្នកផ្សេងទុកនៅក្នុងរថយន្តគាត់»៕