.jpg)
ភ្នំពេញៈ នគរបាលខណ្ឌដង្កោកាលពីម្សិលមិញនៅកំពុងបន្តសាកសួរមេការសំណង់ម្នាក់តាមបណ្តឹងរបស់ក្រុមគ្រួសារជនរងគ្រោះ ដែលជាមេការសំណង់ម្នាក់ទៀតដែលបានធ្លាក់ពីលើអគារកម្ពស់ ៣ ជាន់ បាក់កស្លាប់កាលពីថ្ងៃទី ២៤ ខែ មករា ឆ្នាំ ២០២០ នៅភូមិទឹកថ្លា សង្កាត់ក្រាំងពង្រ ខណ្ឌដង្កោ។
លោក នៅ ទិត្យ នាយផ្នែកនៃអធិការដ្ឋាននគរបាល ខណ្ឌដង្កោ ទទួលផែនព្រហ្មទណ្ឌបានថ្លែងពីម្សិលមិញថា សមត្ថកិច្ចរបស់លោកកំពុងសាកសួរបុរសម្នាក់ពាក់ព័ន្ធការស្លាប់មេការសំណង់ម្នាក់ ប៉ុន្តែលោកនៅមិនទាន់កំណត់ថា បុរសនោះជាជនដៃដល់ក្នុងអំពើឃាតកម្មនៅឡើយទេ។
លោកប្រាប់ថា៖ «រឿងនេះខ្ញុំហៅតែម្នាក់ទេ ហើយខ្ញុំកំពុងបន្តនីតិវិធីសាកសួរគាត់។ ខ្ញុំមិនទាន់ដឹងច្បាស់លាស់ថា គាត់ប្រព្រឹត្តឬយ៉ាងណាទេ»។
លោក តឹប ប៊ុនថេន នាយនគរបាលប៉ុស្តិ៍សង្កាត់ក្រាំងពង្រថ្លែងពីម្សិលមិញថា ជនរងគ្រោះស្លាប់ឈ្មោះ ស៊ូ រ៉ាវេត អាយុ ៣២ ឆ្នាំ រីឯជនដែលសមត្ថកិច្ចលោកកោះហៅទៅខណ្ឌដង្កោឈ្មោះ អ៊ុ ប៉ូណា អាយុ ៣៥ ឆ្នាំជាមេការសំណង់ដូចគ្នា។ លោកបន្តថាកាលពីថ្ងៃទី ២៤ ខែមករា ប្រជាពលរដ្ឋបានរាយការណ៍ប្រាប់សមត្ថកិច្ចថា មានមនុស្សធ្លាក់ពីលើអគារស្លាប់។
ក្រោយមកលោកបានបញ្ជាកម្លាំងក្រោមឱវាទចុះទៅដល់កន្លែងកើតហេតុ និងបានចងខ្សែដើម្បីហ៊ុមព័ទ្ធកន្លែងកើតហេតុ ទុកឲ្យសមត្ថកិច្ចជំនាញផ្នែកកោសល្យវិច័យចូលត្រួតពិនិត្យ។ លោកបន្តថា បន្ទាប់ពីសមត្ថកិច្ចវិទ្យាសាស្ត្របច្ចេកទេស ធ្វើកោសល្យវិច័យ និងគ្រូពេទ្យរាជធានីភ្នំពេញពិនិត្យហើយក៏បានប្រគល់សាកសពឲ្យក្រុមគ្រួសារធ្វើបុណ្យ។
លោកបញ្ជាក់ថា ក្រោយពីធ្វើបុណ្យ និងរំលាយសាកសពរួចរាល់មកបាន ២ ទៅ ៣ ថ្ងៃក៏ខាងក្រុមគ្រួសារជនរងគ្រោះ មិនសុខចិត្ត ព្រោះសង្ស័យថា ជនរងគ្រោះប្រហែលអាចត្រូវគេច្រានទម្លាក់ពីលើអគារ ហើយបានដាក់ពាក្យប្តឹងនៅប៉ុស្តិ៍នគរបាលសង្កាត់ក្រាំងពង្រ។ «ក្រុមគ្រួសារថា មានអ្នកច្រានហើយគេប្តឹង យើងត្រូវតែធ្វើដែរ ព្រោះគេសង្ស័យឈ្មោះ (ក) យើងបានហៅឈ្មោះនោះសាកសួរ»។
ទោះយ៉ាងណាមន្ត្រីសុំមិនបញ្ចេញឈ្មោះម្នាក់នៃអធិការដ្ឋាននគរបាលខណ្ឌដង្កោបានឲ្យដឹងថា សាកសពត្រូវបានក្រុមគ្រួសារធ្វើបុណ្យនៅថ្ងៃទី ២៥ មករាក៏ស្រាប់តែមានបុរសម្នាក់ ឈ្មោះ អ៊ុ ប៉ូណា អាយុ ៣៥ ឆ្នាំ មុខរបរ មេការសំណង់ដូចគ្នា ទូរស័ព្ទប្រាប់ថា ឈ្មោះ ស៊ូ រ៉ាវេត មិនមែនស្លាប់ដោយធ្លាក់ខ្លួនឯងទេ តែស្លាប់ដោយសារមានមនុស្ស ៣ នាក់វាយនឹងដំបងដែកហើយមិនទាន់ស្លាប់ ក៏រុញទម្លាក់បន្ថែមពីលើអគារកម្ពស់ ៣ ជាន់បណ្តាលឲ្យធ្លាក់បាក់កស្លាប់។ លុះដល់ព្រឹកថ្ងៃទី ២៦ ខែមករា ឆ្នាំ ២០២០ ក្រុមគ្រួសារ ក៏បានដាក់ពាក្យបណ្ដឹងនៅនគរបាលប៉ុស្ដិ៍ក្រាំងពង្រតែម្តង។
យ៉ាងណាក្តីលោក វេជ្ជបណ្ឌិត នង សុវណ្ណរ័ត្ន ដែលជាគ្រូពេទ្យផ្នែកកោសល្យវិច័យ រាជធានីភ្នំពេញបានថ្លែងកាលពីម្សិលមិញថា បញ្ហានេះនគរបាលខណ្ឌដង្កោបានអញ្ជើញលោកទៅធ្វើកោសល្យវិច័យ ហើយលោកបានពិនិត្យឃើញថា ជនរងគ្រោះបានស្លាប់ដោយសារធ្លាក់ពីលើទីខ្ពស់បាក់ក ស្លាប់ ចំណែកត្រង់ថាជាប់ពាក់ព័ន្ធនឹងករណីអ្វីផ្សេងទៀតនោះ គឺលោកមិនដឹងទេ៕
