ស្ទឹងត្រែង៖ ស្នងការដ្ឋាននគរបាលខេត្ដស្ទឹងត្រែងកំពុងសាកសួរ និងកសាងសំណុំរឿងករណីមន្រ្តីយោធាឋានៈឧត្តមសេនីយ៍ទោម្នាក់ ឈ្មោះ ចាន់ សំអាត ទៅតុលាការបន្ទាប់ពីបានឃាត់ខ្លួនកាលពីថ្ងៃទី ២៣ ខែមេសា ពាក់ព័ន្ធនឹងការឈូសឆាយដីព្រៃរបស់រដ្ឋជិត ៧០ ហិកតា នៅភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់។
លោក ម៉ែន គុង អ្នកនាំពាក្យរដ្ឋបាលសាលាខេត្ដស្ទឹងត្រែង ប្រាប់ភ្នំពេញប៉ុស្ដិ៍ថា ក្រោយពេលកម្លាំងនគរបាលខេត្តស្ទឹងត្រែង ឃាត់ខ្លួន ឈ្មោះ ចាន់ សំអាត ពាក់ព័ន្ធនឹងករណីឈូសឆាយដីព្រៃរបស់រដ្ឋជិត ៧០ ហិកតា កាលពីថ្ងៃទី ២៣ ខែមេសា រហូតមកដល់ថ្ងៃម្សិលមិញ សមត្ថកិច្ចនៃស្នងការដ្ឋាននគរបាលខេត្តស្ទឹងត្រែង កំពុងបន្ដសាកសួរ និងកសាងសំណុំរឿងនៅឡើយមិនទាន់បានបញ្ជូនទៅតុលាការនោះទេ។ លោកថា៖ «រហូតមកដល់ពេលនេះ ខ្ញុំមិនទាន់ដឹងថា តើនីតិវិធីបន្តនោះ ដល់ដំណាក់កាលណាហើយទេ ដោយសារតែស្ថិតក្នុងថ្ងៃសៅរ៍-អាទិត្យ»។
លោក គុង បញ្ជាក់ថា ក្រោយសមត្ថកិច្ចចុះពិនិត្យជាក់ស្ដែងកន្លែងឈូសឆាយដីព្រៃនោះ គឺមានទំហំជិត ៧០ ហិកតា និងឃាត់បានគ្រឿងចក្រឈូសឆាយដីព្រៃចំនួន ៣ គ្រឿងផងដែរ។ លោកបន្តថា ការអនុវត្ដវិធានការនេះ គឺធ្វើឡើងតាមបញ្ជារបស់លោកអភិបាលខេត្តស្ទឹងត្រែង ដែលបានបញ្ជាឲ្យកម្លាំងចម្រុះចុះទៅចាប់រឹបអូសយកគ្រឿងចក្រ និងឃាត់ខ្លួនឈ្មោះ ចាន់ សំអាត នៅទីតាំងដែលកំពុងឈូសឆាយដីព្រៃរបស់រដ្ឋនោះ។
លោក អូត ស៊ីវុត្ថា ស្នងការនគរបាលខេត្ដស្ទឹងត្រែង មិនអាចទាក់ទងបានទេពីម្សិលមិញ ដោយទូរស័ព្ទរបស់លោកគ្មានអ្នកទទួល។
លោក ប៊ី វណ្ណី មន្រ្ដីសម្របសម្រួលសមាគមអាដហុក ប្រចាំខេត្ដស្ទឹងត្រែងលើកឡើងថា តាមនីតិវិធីច្បាប់ ករណីឃាត់ខ្លួនជាក់ស្ដែងពេលកំពុងឈូសឆាយដីព្រៃរបស់រដ្ឋបែបនេះ សមត្ថកិច្ចត្រូវតែចាត់ការតាមនីតិវិធីហើយបញ្ជូនទៅតុលាការ។
លោកថា៖ «យើងអបអរសាទរ ចំពោះការអនុវត្ដចាត់វិធានការការពារផលប្រយោជន៍ ឬក៏ទ្រព្យសម្បត្ដិរបស់រដ្ឋបែបនេះ។ យើងក៏ចង់ឃើញការឃាត់ខ្លួន ចំពោះមន្រ្ដីមួយចំនួនទៀតដែលកំពុងរំលោភយកដីរដ្ឋមកធ្វើជាកម្មសិទ្ធិផ្ទាល់ខ្លួនដោយយកអំណាចទៅប្រើប្រាស់»៕