កណ្តាលៈ នគរបាលខេត្តកណ្តាលកាលពីម្សិលមិញនៅកំពុងបន្តសាកសួររកមេខ្លោង ជនសង្ស័យចំនួន ១២ នាក់ បន្ទាប់ពីបានចាប់ឃាត់ខ្លួន ខណៈដែលពួកគេកំពុងលេងល្បែង ជល់មាន់ និងលេងអាប៉ោងនៅចំណុចទំនប់ ៩៤ ក្នុងភូមិអំពៅព្រៃ ឃុំកណ្ដោក ស្រុកកណ្ដាលស្ទឹងកាលពីថ្ងៃទី ២ ខែ មករា ឆ្នាំ ២០២១។
តាមរបាយការណ៍របស់ស្នងការនគរបាលខេត្តកណ្តាលបានឱ្យដឹងពីថ្ងៃ ៣ មករាថា ក្រៅពីឃាត់ខ្លួនជនសង្ស័យចំនួន ១២ នាក់ សមត្ថកិច្ចក៏បានដកហូតវត្ថុតាងដែលបម្រើដល់ការលេងអាប៉ោង និងជល់មាន់មួយចំនួនរួមទាំងយានយន្ត និងវត្ថុតាងផ្សេងៗទៀត។
របាយការណ៍បញ្ជាក់ថា នៅថ្ងៃកើតហេតុ ក្រោយពីទទួលបានព័ត៌មានពីប្រជាពលរដ្ឋកម្លាំងជំនាញខេត្តកណ្តាលបានចុះទៅដល់កន្លែងកើតហេតុ ឃើញក្រុមអ្នកញៀនល្បែងស៊ីសងប្រហែល ៥០ នាក់កំពុងលេង។ នៅពេលនោះកម្លាំងសមត្ថកិច្ចបានធ្វើការឃាត់ខ្លួនអ្នកញៀនល្បែងស៊ីសងជល់មាន់ ១២ នាក់ រួមនឹងវត្ថុតាងបញ្ជូនទៅអធិការដ្ឋាននគរបាលស្រុកកណ្ដាលស្ទឹង។
លោក ឈឿន សុចិត្ត ស្នងការនគរបាលខេត្តកណ្តាល ប្រាប់ ភ្នំពេញ ប៉ុស្តិ៍ ពីម្សិលមិញថា សមត្ថកិច្ចនៅបន្តសាកសួរជនសង្ស័យទាំង ១២ នាក់នេះ ដោយមានម្នាក់គឺមានតួនាទីជាអង្គរក្ស ដើម្បីសាកសួររកមេខ្លោងនៃការបើកកន្លែងជល់មាន់នេះ។
កាលពីថ្ងៃម្សិលមិញសមត្ថកិច្ចបានបញ្ជូនពួកគេទាំង ១២ នាក់មកស្នងការដ្ឋាននគរបាលខេត្តមុននឹងមានចំណាត់ការបន្តទៀត។ លោកបន្ថែមថា៖ «កន្លែងជល់មាន់មួយនេះ គឺគាត់ទើបធ្វើ ហើយនៅក្នុងចម្ការព្រៃត្រែង ដោយមានច្រកចូលតែមួយប្រឡោះទេ។ យើងទទួលបានព័ត៌មាន ក៏ដាក់កម្លាំងចុះទៅ យើងអនុវត្តតាមផ្លូវច្បាប់ចាប់បានពួកគាត់ហើយ យើងយកមកស្នងការដ្ឋាននគរបាលដោយមិនទាន់បានបញ្ចូនទៅតុលាការទេ»។ សមត្ថកិច្ចនៅមិនទាន់រកឃើញមេខ្លោង និងម្ចាស់ទីតាំងបើកល្បែងស៊ីសងនេះឃើញនៅឡើយទេ។
លោក ឈឿន សុចិត្ត អះអាងថា សមត្ថកិច្ចនឹងបន្តចាត់វិធានការបង្ក្រាបរាល់ល្បែងស៊ីសងទាំងអស់នៅក្នុងខេត្ត ដើម្បីធានាការពារសុវត្ថិភាព សណ្តាប់ធ្នាប់សង្គម ខណៈករណីទាំងនេះនៅតែបន្តកើតមានឥតឈប់ឈរ។
លោកបន្តថា៖ «អាជ្ញាធរយើងបើកភ្លើងខៀវ ភ្លើងក្រហមអីជាមួយគាត់គឺមិនមានទេ។ ពីដើមមកយើងខំប្រឹងណាស់អប់រំណែនាំប្រជាពលរដ្ឋយើង ព្រោះ (ល្បែងស៊ីសង) វាបង្កអសន្តិសុខសង្គម ដែលមិនអាចឱ្យភូមិឃុំមានសុវត្ថិភាពបានទេ។ ល្បែងស៊ីសងនេះមានគ្រប់រូបភាព សមត្ថកិច្ចយើងនឹងបង្ក្រាបគ្រប់ទីតាំងអស់ មិនឱ្យមានជាអចិន្រៃ្តយ៍នោះទេ»។
បើតាមរបាយការណ៍របស់នគរបាលខេត្តកណ្តាល ជនសង្ស័យទាំង ១២ នាក់ ដែលសុទ្ធតែភេទប្រុសមានឈ្មោះ ស៊ុម សុវណ្ណ អាយុ ៣៨ ឆ្នាំ ហែម ច័ន្ទណារិទ្ធ អាយុ ៥៦ ឆ្នាំ មឿន រ៉ា អាយុ ៥៥ ឆ្នាំ ហេង ភានុច អាយុ ៣៥ ឆ្នាំ គឹម វិបុល អាយុ ៤២ ឆ្នាំ អ៊ុន វណ្ណណែត អាយុ ៣៣ ឆ្នាំ សុខ យ៉ា អាយុ ៥០ ឆ្នាំ នុន ផល្លា អាយុ ៥០ ឆ្នាំ ចាន់ ថុល អាយុ ៥៤ ឆ្នាំ សំ សំណាង អាយុ ៥៨ ឆ្នាំ ឃឹម សាវីត អាយុ ៣៦ ឆ្នាំ និង ស៊ូ ប៊ុនថុន អាយុ ៣១ ឆ្នាំ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាប្រាប់ ភ្នំពេញ ប៉ុស្តិ៍ ពីម្សិលមិញថា ការបណ្តែតបណ្តោយឱ្យមានល្បែងស៊ីសងដោយខុសច្បាប់កាន់តែយូរទៅនឹងធ្វើឱ្យមនុស្សក្នុងសង្គមមានការយល់ថា ជាទម្លាប់ខណៈពេលមន្ត្រីខ្លះដែលមានតួនាទីបង្ក្រាបបទល្មើសល្បែងស៊ីសង បែរជាមានវត្តមាននៅកន្លែងទាំងនោះតាមរយៈការលេងល្បែង ឬទៅយកផលប្រយោជន៍អ្វីមួយ។
លោកបន្តថា៖ «ទង្វើនេះនាំឱ្យមានការយល់ថា ការលេងល្បែងនោះមិនមានបញ្ហាផ្លូវច្បាប់ទៅវិញ ខណៈដែលល្បែងស៊ីសងជាប្រភពពិតប្រាកដនៃបទល្មើសឆក់ប្លន់។ ដូចនេះខ្ញុំយល់ថា បើចង់ឱ្យមានសហគមន៍សុខសាន្តទាល់តែល្បែងស៊ីសងគ្រប់ប្រភេទត្រូវបានបង្ក្រាបដោយមិនយោគយល់។ និយាយជារួម សម្បូរល្បែងគឺកើតចោរលួច ចោរឆក់ប្លន់ និងឈានទៅរកការកាប់សម្លាប់ក៏អាចមានដែរ»៕