.jpg)
ទិដ្ឋភាពនៅមុខពន្ធនាគារខេត្តកណ្តាលកាលពីពេលកន្លងមក។ ភ្នំពេញ ប៉ុសិ៍្ត
កណ្តាលៈ លោក ចាត ស៊ីនាង ប្រធានពន្ធនាគារខេត្តកណ្តាលបានថ្លែងកាលពីថ្ងៃព្រហស្បតិ៍ថា នគរបាលពន្ធនាគារខេត្តកំពុងស្វែងរកចាប់ខ្លួនឈ្មោះ ម៉ាត ត្រេះ (Mat Tress) ដែលបានគេចខ្លួនពីពន្ធនាគារកាលពីថ្ងៃពុធ បន្ទាប់ពីជាប់ពន្ធនាគារបាន ៨ ថ្ងៃ។
លោក ស៊ីនាង បានថ្លែងថា៖ «យើងបានចាក់សោឲ្យគាត់ចេញទៅហាត់ប្រាណ និងងូតទឹក។ បន្ទាប់មកគាត់បានគេចខ្លួនដោយលោតចេញពីជញ្ជាំងពន្ធនាគារបន្ទាប់ពីឡើងរបងលួស។ គាត់ត្រូវបានចាប់ខ្លួនកាលពីថ្ងៃទី ២០ ខែសីហា ក្នុងស្រុកមុខកំពូលពីបទលួចទូរស័ព្ទ»។
លោកថ្លែងថា លោកបានជម្រាបទៅព្រះរាជអាជ្ញាខេត្តកណ្តាល និងអភិបាលខេត្តអំពីករណីនេះ ដើម្បីសុំកម្លាំងបន្ថែមដើម្បីស្វែងរកចាប់ខ្លួនគាត់។
លោកថ្លែងថា នៅពេលជនសង្ស័យលោតចេញពីពន្ធនាគារ មន្ត្រីពន្ធនាគារម្នាក់បានចុចកណ្តឹង ហើយឆ្មាំពន្ធនាគារបានចេញទៅក្រៅពន្ធនាគារដើម្បីតាមចាប់ខ្លួនគាត់មកវិញ។ ប៉ុន្តែគាត់បានរត់យ៉ាងលឿនចូលទៅក្នុងមណ្ឌល សុខភាពដែលមានព្រៃក្រាស់។
មន្ត្រីរូបនេះបញ្ជាក់ថា៖ «យើងមិនដឹងថាគាត់បានលួចទូរស័ព្ទប្រភេទអ្វីទេ ប៉ុន្តែខ្ញុំគិតថាគាត់ជាប្រភេទចោរលួចដែលអាចគាស់ទ្វារផ្ទះប្រជាជនដើម្បីលួចទ្រព្យសម្បត្តិ។ នោះហើយជាមូលហេតុដែលគាត់មានជំនាញឡើងរបង»។
លោកបានថ្លែងថា វាជាលើកទី ១ ហើយដែលឧប្បត្តិហេតុនេះបានកើតឡើងចាប់តាំងពីលោកចូលកាន់តំណែងប៉ុន្មានឆ្នាំមកហើយ។
លោកបានបន្តថា លោកកំពុងពិនិត្យមើលកាមេរ៉ាសុវត្ថិភាពដើម្បីមើលពីរបៀបដែលគាត់បានគេចខ្លួន។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារថ្លែងពីម្សិលមិញថា អគ្គនាយកដ្ឋានពន្ធនាគារបានបញ្ជាឲ្យនាយកដ្ឋានសន្តិសុខពន្ធនាគារចុះទៅធ្វើការងារលើករណីនេះហើយ។
លោក សវនា បានថ្លែងថា៖ «នាពេលអនាគតដើម្បីការពារមិនឲ្យមានករណីនេះកើតឡើងយើងនឹងចាត់វិធានការការពារបន្ទាប់ពីស៊ើបអង្កេតករណីនេះ រួចដើម្បីការពារកុំឲ្យវាកើតឡើងម្តងទៀត»៕ PS
