រតនគិរី៖ សមត្ថកិច្ចនគរបាលខេត្តរតនគិរី នៅថ្ងៃទី ១៦ ឧសភា កំពុងបន្តស្រាវជ្រាវស្វែងរកចាប់ខ្លួនជនសង្ស័យម្នាក់ពាក់ព័ន្ធអំពើរំលោភសេពសន្ថវៈក្មេងស្រីអាយុ ១៤ ឆ្នាំ ហើយប៉ុនប៉ងអារកសម្លាប់ចោល នៅឃុំញ៉ាង ស្រុកអណ្តូងមាស ខេត្តរតនគិរី កាលពីថ្ងៃទី ៦ ឧសភា។
លោក សោម ចាន់ដារ៉ា អធិការនគរបាលស្រុកអណ្តូងមាសប្រាប់ ភ្នំពេញ ប៉ុស្តិ៍ នាថ្ងៃទី ១៦ ឧសភាថា ក្មេងស្រីរងគ្រោះឈ្មោះផ.ស អាយុ ១៤ ឆ្នាំ។ រីឯជនសង្ស័យសមត្ថកិច្ចមិនទាន់កំណត់អត្តសញ្ញាណបានពិតប្រាកដនៅឡើយទេ ដោយសារតែជនសង្ស័យជាអ្នកចំណាកស្រុក ហើយចូលមកធ្វើការចៀរជ័រកៅស៊ូក្នុងឃុំកើតហេតុទើបតែបាន ២ ទៅ ៣ ថ្ងៃ មុនថ្ងៃកើតហេតុប៉ុណ្ណោះ។ ប៉ុន្តែក្រោយបង្កហេតុមុនគេចខ្លួន ជនសង្ស័យឆ្លៀតមកយកកូនស្រីអាយុ ៩ ឆ្នាំម្នាក់ ដែលជនសង្ស័យបានផ្ញើទុកនឹងអ្នកភូមិទៅជាមួយខ្លួន ប៉ុន្តែយកមិនទាន់ ក៏បានរត់គេចខ្លួនទៅចោលកូន។
លោកថ្លែងថា៖ «ករណីនេះ យើងពិបាកកំណត់អត្តសញ្ញាណ ព្រោះជនសង្ស័យទើបចូលមកក្នុងមូលដ្ឋានរបស់យើង។ តែយ៉ាងណា យើងស្រាវជ្រាវយ៉ាងសកម្មក្នុងការងារនេះហើយ»។
បើតាមលោក ចាន់ដារ៉ា ដែលបានចុះប្រមូលព័ត៌មានតាមសាក្សីនៅកន្លែងកើតហេតុ ជនដៃដល់រស់នៅខេត្តផ្សេង។ ប៉ុន្តែបានស្គាល់គ្នាជាមួយឪពុកក្មេងស្រីរងគ្រោះ ហើយជនល្មើសក៏បានមកធ្វើការជាកម្មករចៀរជ័រកៅស៊ូឲ្យក្រុមហ៊ុនមួយនៅក្នុងឃុំញ៉ាង ក្នុងស្រុកអណ្តូងមាស ប្រមាណ ២ ទៅ ៣ ថ្ងៃមុនកើតហេតុ។ ប៉ុន្តែជនសង្ស័យមិនទាន់បានចូលធ្វើការនៅឡើយទេ ព្រោះខាងក្រុមហ៊ុនចៀរជ័រកៅស៊ូសម្រាកមួយរយៈពេលខ្លី។
លោកបន្តថា លុះនៅថ្ងៃទី ៦ ឧសភា ដែលជាថ្ងៃកើតហេតុនោះ ឪពុកម្តាយក្មេងស្រីរងគ្រោះចេញទៅធ្វើការនៅឆ្ងាយមិនបាននៅផ្ទះទេ ដោយទុកក្មេងស្រីឲ្យនៅជាមួយអ្នកជិតខាង។ ចៃដន្យជនសង្ស័យបានទៅលេងផ្ទះឪពុកក្មេងស្រីរងគ្រោះនៅព្រឹកថ្ងៃដដែលនោះ ប៉ុន្តែជួបតែក្មេងស្រីរងគ្រោះម្នាក់ឯង។
លោកបន្ថែមថា នៅពេលនោះគេបានឃើញជនសង្ស័យ ឌុបក្មេងរងគ្រោះតាមផ្លូវលំក្នុងភូមិ ប៉ុន្តែអ្នកភូមិមិនបានចាប់អារម្មណ៍ថា ជនសង្ស័យឌុបក្មេងរងគ្រោះយកទៅណាទេ ព្រោះសំអាងថា ឪពុកក្មេងរងគ្រោះ និងជនសង្ស័យជាមនុស្សរាប់អានគ្នា។ ប៉ុន្តែចាប់តាំងពីព្រឹកថ្ងៃទី ៦ ឧសភា រហូតដល់រសៀល នៅពេលដែលឪពុកម្តាយក្មេងរងគ្រោះមកផ្ទះវិញរកកូនមិនឃើញ ទើបមានការឆោឡោឡើង ឮដល់អ្នកភូមិ។
លោកបញ្ជាក់ថា ក្រោយរកកូនមិនឃើញឪពុកក្មេងរងគ្រោះបានសួរអ្នកភូមិរស់នៅក្បែរផ្ទះរបស់គាត់ ហើយគេបានប្រាប់ថា គេបានឃើញជនសង្ស័យជិះម៉ូតូឌុបក្មេងរងគ្រោះ។ ពួកគេក៏នាំគ្នាដើររកក្នុងព្រៃក្បែរផ្លូវភូមិតាំងពីថ្ងៃត្រង់ ថ្ងៃទី ៦ ឧសភា រហូតដល់ពេលព្រលប់ទើបរកឃើញក្មេងរងគ្រោះដេកស្តូកស្តឹងក្នុងព្រៃ ដោយមានស្នាមអារក និងមានឈាមប្រឡាក់ខ្លួនជោកផង ហើយក្រុមគ្រួសារ និងសមត្ថកិច្ចបានដឹកក្មេងរងគ្រោះទៅសង្គ្រោះនៅមន្ទីរពេទ្យបង្អែកខេត្តរតនគិរី។
ទោះយ៉ាងណាលោកស្រី កែវ ដាវី ស្នងការរងនគរបាលខេត្តរតនគិរី ទទួលផែនការងារប្រឆាំងការជួញដូរមនុស្សប្រាប់នៅថ្ងៃទី ១៦ ឧសភាថា ក្មេងស្រីរងគ្រោះត្រូវបានក្រុមគ្រូពេទ្យជួយសង្គ្រោះរួចពីសេចក្តីស្លាប់ហើយ។ លោកគ្រូពេទ្យបានដេរបំពង់ខ្យល់ភ្ជាប់គ្នាឡើងវិញ ព្រោះជនសង្ស័យបានអារផ្តាច់បំពង់ខ្យល់ និងរំលោភសេពសន្ថវៈបានសម្រេចទៀតផង។
លោកស្រីថ្លែងថា៖ «ឥឡូវ ក្មេងស្រីរងគ្រោះកំពុងសម្រាកនៅមន្ទីរពេទ្យ ហើយនិយាយបានខ្សាវៗហើយដែរ។ យើងនឹងព្យាយាមយកព័ត៌មានពីគាត់ទៀតពេលគាត់និយាយបានឡើងវិញ»។
បើតាមលោកស្រី ដាវី ករណីនេះ លោកស្រី ប៊ុន រ៉ានី ភរិយាលោកនាយករដ្ឋមន្ត្រី ហ៊ុន សែន បានអំពាវនាវឲ្យសមត្ថកិច្ចពាក់ព័ន្ធទាំងអស់ផ្តន្ទាទោសជនល្មើសឱ្យបានធ្ងន់ធ្ងរបំផុត ដើម្បីឱ្យស័ក្តិសមទៅនឹងការឈឺចាប់របស់ជនរងគ្រោះ។ ទន្ទឹមនឹងនេះដែរ លោកស្រី ប៊ុន រ៉ានី បានឧបត្ថម្ភជូនដល់គ្រួសារកុមារីរងគ្រោះនូវ អង្ករ ៥០ គីឡូក្រាម មី ១ កេស ត្រីខ ១ យួរ ទឹកដោះគោឆៅ ២ យួរ ទឹកពិសា ១ កេស និងថវិកាចំនួន ៥ លានរៀល៕