.jpg)
អាជ្ញាធរឃាត់១០នាក់ និងបិទអាជីវកម្មហ្គេមនៅខណ្ឌឬស្សីកែវ កាលពីថ្ងៃទី ១៨ មេសា ។ រូបថត ប៉ូលីស
ភ្នំពេញៈ កម្លាំងនគរបាលខណ្ឌឫស្សីកែវបានឃាត់ខ្លួនមនុស្សចំនួន ១០ នាក់ ក្នុងនោះមាន ២នា ក់ជាអនីតិជនអាយុក្រោម ១៣ ឆ្នាំ ដែលបានប្រមូលផ្ដុំគ្នាលេងល្បែងហ្គេមបាញ់ត្រីល្មើសច្បាប់ នៅចំណុចផ្លូវរថភ្លើងក្នុងភូមិសាស្ត្រសង្កាត់ទួលសង្កែទី១។ នេះបើតាម លោក ហ៊ាង ថារ៉េត អធិការខណ្ឌឫស្សីកែវ នៅរសៀលថ្ងៃទី ១៩ ខែមេសា។
លោកបានថ្លែងថា៖ «យោងតាមបទបញ្ជា និងសេចក្ដីណែនាំរបស់រាជរដ្ឋាភិបាល ការប្រមូលផ្ដុំគ្នា ផឹកស៊ី និងលេងល្បែងគ្រប់ប្រភេទ ត្រូវបានហាមឃាត់ ព្រោះនៅពេលនេះ យើងកំពុងស្ថិតនៅមាត់រណ្ដៅមរណៈនៃការឆ្លងរីករាលដាលនៃជំងឺកូវីដ១៩»។ ប៉ុន្តែពួកគេបានប្រមូលផ្ដុំគ្នាលេងល្បែងហ្គេមបាញ់ត្រីខុសច្បាប់ ហើយថែមទាំងមិនបានពាក់ម៉ាស់ថែមទៀតផង។
អាជ្ញាធរឃាត់១០នាក់ និងបិទអាជីវកម្មហ្គេមនៅខណ្ឌឬស្សីកែវ កាលពីថ្ងៃទី ១៨ មេសា ។ រូបថត ប៉ូលីស
លោកបានបន្តថា ទោះយ៉ាងណា ពួកគេមិនត្រូវបានសមត្ថកិច្ចកសាងសំណុំរឿងបញ្ជូនទៅតុលាការនោះទេ គឺគ្រាន់តែឃាត់ខ្លួនបញ្ជូនទៅធ្វើការសាកសួរ និង អប់រំណែនាំនៅស្នាក់ការប៉ុស្តិ៍រដ្ឋបាល សង្កាត់ទួលសង្កែទី១ អស់រយៈពេល ១២ ម៉ោង ចាប់ពីម៉ោង ១០ យប់ថ្ងៃទី ១៨ ខែមេសា ដល់ម៉ោង ១០ ព្រឹកថ្ងៃទី ១៩ ខែមេសា ឆ្នាំ ២០២១ និងតម្រូវឲ្យពួកគេធ្វើកិច្ចសន្យាបញ្ឈប់សកម្មភាពប្រមូលផ្ដុំគ្នា និងលេងល្បែងស៊ីសងខុសច្បាប់ទៀត។ ប៉ុន្តែទូហ្គេមបាញ់ត្រីចំនួន ២ គ្រឿង ត្រូវបានរឹបអូសជាវត្ថុតាង និងកំពុងរក្សាទុកនៅប៉ុស្តិ៍នគរបាលសង្កាត់ទួលសង្កែ ១ ជាបណ្ដោះអាសន្ន។
លោកបានបន្ថែមថា៖ «ក្នុងករណីពួកគេមិនរាងចាល សមត្ថកិច្ចយើងនឹងកសាងសំណុំរឿងបញ្ជូនទៅតុលាការ ដើម្បីចាត់វិធានការតាមនីតិវិធីច្បាប់»៕
ទីកន្លែងអាជីវកម្មហ្គេមនៅខណ្ឌឬស្សីកែវដែលបានបិទ កាលពីថ្ងៃទី ១៨ មេសា ។ រូបថត ប៉ូលីស
