សីហនុៈ នគរបាលខេត្ដព្រះសីហនុកំពុងសាកសួរ និងកសាងសំណុំរឿងជនសង្ស័យចំនួន ១៧ នាក់ ដើម្បីបញ្ជូនទៅតុលាការពាក់ព័ន្ធករណីលួចកាត់ខ្សែភ្លើងសម្រាប់តបណ្ដាញបំភ្លឺតាមមហាវិថីនានាស្ថិតក្នុងភូមិគគីរ ឃុំបិតត្រាំង ស្រុកព្រៃនប់។ នេះបើតាមលោក ជួន ណារិន្ទ ស្នងការនគរបាលខេត្ដនេះ។
លោក ជួន ណារិន្ទ ថ្លែងពីម្សិលមិញថា ក្រោយពីទទួលបានបណ្តឹងរាយការណ៍ពីក្រុមហ៊ុន ឌុយរ៉ាល់ អេឡិចត្រិច ករណីមានជនខិលខូចលួចកាត់ខ្សែភ្លើងរបស់ក្រុមហ៊ុន ដែលបានតបណ្ដាញបំភ្លឺតាមមហាវិថីនានានៅតំបន់ពយម៉ាចូវ ស្ថិតក្នុងភូមិគគីរ ឃុំបិតត្រាំង លោក គួច ចំរើន អភិបាលខេត្ដព្រះសីហនុបានចេញបញ្ជាផ្ទាល់ និងមានការសម្របសម្រួលនីតិវិធីពីលោក សៀង សុខ ព្រះរាជអាជ្ញានៃអយ្យការអមសាលាដំបូងខេត្ដ ដើម្បីឲ្យសមត្ថកិច្ចចុះស្រាវជ្រាវ រកជនខិលខូច។ កម្លាំងជំនាញបានស្រាវជ្រាវទៅដល់ទីតាំងប្រមូលទិញអេតចាយចំនួន ៥ កន្លែង។
លោក ណារិន្ទ ថ្លែងថា៖ «ក្នុងកិច្ចប្រតិបត្តិការ សមត្ថកិច្ចបានបង្ក្រាបលើទីតាំងចំនួន ២ កន្លែង ឃាត់ខ្លួនជនសង្ស័យ ១៧ នាក់ និងចាប់យកសម្ភារវត្ថុតាងពាក់ព័ន្ធមកកាន់ស្នងការដ្ឋាននគរបាលខេត្ត ដើម្បីបន្តតាមនីតិវិធី»។
លោកបន្តថា បច្ចុប្បន្នសមត្ថកិច្ចកំពុងសាកសួរជនសង្ស័យទាំង ១៧ នាក់នៅស្នងការដ្ឋាននគរបាលខេត្ដ ព្រោះជនសង្ស័យកំពុងឆ្លើយទម្លាក់កំហុសដាក់គ្នា។ សមត្ថកិច្ចចង់ដឹងថាតើករណីនេះជនសង្ស័យលួចកាត់ខ្សែភ្លើងគ្រាន់តែជាចេតនាចង់បានលុយតិចតួចពីការលក់ខ្សែភ្លើង ឬក៏មានចេតនាផ្សេងទៀត។
«ឥឡូវនេះជនសង្ស័យទាំង ១៧ នាក់កំពុងឆ្លើយដាក់គ្នា។ យើងកំពុងបូកសរុបបន្តទៀតព្រោះពេលនេះមិនទាន់ហួសនីតិវិធីរបស់នគរបាលយុត្ដិធម៌ទេ។ នេះជារឿងមួយដែលយើងមិនអាចទទួលយកបាន វាជាផលប្រយោជន៍តូចតាច អំពីការលក់ស្ពាន់ដែលបានទាញចេញពីខ្សែភ្លើងនោះ។ ប៉ុន្ដែផលប៉ះពាល់ដល់ការអភិវឌ្ឍខ្លាំង ព្រោះខ្សែភ្លើងនេះគឺមិនងាយយកទៅបំពាក់ ឬតឡើងវិញបានដោយងាយទេ»។
តាមរបាយការណ៍របស់ស្នងការដ្ឋានខេត្ដព្រះសីហនុ ជនសង្ស័យទាំង ១៧ នាក់នោះសុទ្ធតែជាជនជាតិខ្មែរក្នុងនោះឃាត់ខ្លួននៅទីតាំងទិញលក់អេតចាយនៅភូមិ៥ សង្កាត់៤ មាន ៥ នាក់។ ១ ញ៉ិល មាន ភេទប្រុសអាយុ ៤៤ ឆ្នាំ (មា្ចស់ទីតាំង)។ ២ ណុន ណេត ភេទស្រី អាយុ ៤១ ឆ្នាំ (ប្រពន្ធម្ចាស់ទីតាំង)។ ៣ ជាន ស្រេង ភេទប្រុស អាយុ ៤២ ឆ្នាំ (កម្មករ)។ ៤ ពៅ ភស្ដី ភេទប្រុស អាយុ ៣៤ ឆ្នាំ (កម្មករ) និង ៥ ឈី ម៉េង ភេទប្រុសអាយុ ៤២ ឆ្នាំ (កម្មករ)។
វត្ថុតាងចាប់យកមានសម្បកខ្សែភ្លើងម៉ាក THIPHA ចំនួន ១ បាវ (ជារបស់ក្រុមហ៊ុនឌុយវ៉ាល់អេឡិចត្រិច)។ ចំណែកទីតាំងទី ២ ស្ថិតក្នុងឃុំបិតត្រាំង ឃាត់ខ្លួនជនសង្ស័យ ១២ នាក់រួមមាន ១ ហេង ភា ភេទប្រុស អាយុ ៣៥ ឆ្នាំ មុខរបរទិញអេតចាយ និងប្រពន្ធឈ្មោះ ដិក គីមមាន អាយុ ៣៩ ឆ្នាំ អ្នកទាំង ២ មានស្រុកកំណើតនៅភូមិបឹងវែង ស្រុកស្វាយអន្ទរ ខេត្តព្រៃវែង។ ឯជន ១០ នាក់ទៀតសុទ្ធតែរស់នៅខេត្តព្រះសីហនុ។ ក្រៅពីនេះមានសម្ភារវត្ថុតាងស្ពាន់ខ្សែភ្លើង ១៥ គីឡូក្រាម ម៉ាក THIPHA ជាកម្មសិទ្ធិរបស់ក្រុមហ៊ុន ឌុយវ៉ាល់អេឡិចត្រិច៕
វីដេអូ៖