ព្រះសីហនុៈ ស្នងការដ្ឋាននគរបាលខេត្តព្រះសីហនុ និងរដ្ឋាភិបាលអូស្ត្រាលី តាមរយៈស្ថានទូតអូស្ត្រាលីប្រចាំកម្ពុជាបានប្ដេជ្ញារួមគ្នា ដើម្បីទប់ស្កាត់ និងពង្រឹងការប្រឆាំងឧក្រិដ្ឋកម្មឆ្លងដែនព្រមទាំងការប្រឆាំងអំពើហិង្សាទៅលើស្ត្រី និងកុមារ។ នេះបើតាមលោក ជួន ណារិន្ទ ស្នងការនគរបាលខេត្តព្រះសីហនុ។
លោក ជួន ណារិន្ទ ប្រាប់ភ្នំពេញប៉ុស្ដិ៍ពីម្សិលមិញថាលោក និងលោក Pablo Kang ឯកអគ្គរាជទូតប្រទេសអូស្ត្រាលីប្រចាំនៅកម្ពុជាបានជួបពិភាក្សាការងារជាមួយគ្នាកាលពីថ្ងៃទី ៤ ខែសីហា។ លោកបានថ្លែងអំណរគុណចំពោះការជួយឧបត្ថម្ភគ្រប់បែបយ៉ាង និងកិច្ចសហប្រតិបត្តិការលើគ្រប់វិស័យដែលរដ្ឋាភិបាលអូស្ត្រាលីបានផ្ដល់ជូនកម្ពុជា។ ជាពិសេសលើវិស័យកសិកម្ម ហេដ្ឋារចនាសម្ព័ន្ធ អភិវឌ្ឍន៍ជនបទ ផ្នែកច្បាប់ ការប្រឆាំងនឹងឧក្រិដ្ឋកម្មឆ្លងដែន និងការប្រឆាំងនឹងអំពើហិង្សាទៅលើស្ត្រី និងកុមារ។ល។
លោកថា៖ «យើងបានជជែកគ្នាការងារជាទូទៅច្រើនគឺយើងបានប្ដេជ្ញាទប់ស្កាត់បទល្មើសឆ្លងដែន ហើយយើងផ្សព្វផ្សាយពីផលប៉ះពាល់នៃការប្រើប្រាស់ហិង្សាលើស្ត្រីតាមរយៈអង្គការមួយចំនួនរបស់អូស្ត្រាលីដែលកំពុងធ្វើការងារនៅកម្ពុជា»។
លោកស្នងការបញ្ជាក់ថា៖ «ហើយបទល្មើសដែលយើងបង្ក្រាបជាមួយសមត្ថកិច្ចជាមួយប៉ូលិសអូស្ត្រាលីគឺយូរៗមានមួយករណីដែរ។ ក្រៅពីនេះ យើងនៅតែពង្រឹងការសហការគ្នាទៀត ដើម្បីរឹតបន្ដឹងចំណងមិត្តភាពប្រទេសយើងទាំង ២»។
ក្នុងកិច្ចសហការកន្លងមកលោក ជួន ណារិន្ទ ឲ្យដឹងថា មន្ត្រីនគរបាលជាតិកម្ពុជាធ្លាប់សហការជាមួយមន្ត្រីប៉ូលិសអូស្ត្រាលីក្នុងការបង្ក្រាបបទល្មើស និងប្រឆាំងនឹងឧក្រិដ្ឋកម្មឆ្លងដែនរួមគ្នាដែរ ប៉ុន្ដែមិនញឹកញាប់ទេ។ ក្រៅពីកិច្ចសហការជាមួយប៉ូលិស អូស្ត្រាលី នគរបាលជាតិកម្ពុជាក៏ដូចជាមន្ត្រីនគរបាលខេត្តព្រះសីហនុតែងតែសហការជាមួយប្រទេសជាមិត្តផ្សេងៗទៀតក្នុងការបង្ក្រាបឧក្រិដ្ឋកម្មឆ្លងដែន។
លោក Pablo Kang ឯកអគ្គរាជទូតប្រទេសអូស្ត្រាលីប្រចាំនៅកម្ពុជាពីម្សិលមិញមិនអាចស្វែងរកប្រភពទាក់ទងសុំការបញ្ជាក់បន្ថែមជុំវិញការលើកឡើងនេះបានទេ។ ចំណែកមន្ត្រីស្ថានទូតអូស្ត្រាលីប្រចាំនៅកម្ពុជាពីម្សិលមិញក៏មិនទាន់បានឆ្លើយតាមរយៈសារអេឡិចត្រូនិកនៅឡើយ។
លោកស្រី ជៀប សុធារី មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តព្រះសីហនុថ្លែងពីម្សិលមិញថា លោកស្រីបានកត់សម្គាល់ពីការយកចិត្តទុកដាក់ចំពោះការបង្ក្រាប និងការប្រឆាំងឧក្រិដ្ឋកម្មឆ្លងដែនរបស់សមត្ថកិច្ចខេត្តព្រះសីហនុ។ កន្លងមកសមត្ថកិច្ចបានយកចិត្តទុកដាក់ សហការជាមួយសមត្ថកិច្ចបរទេស ដើម្បីបង្ក្រាបបទល្មើសឆ្លងដែន។
លោកស្រីបន្តថា ជាក់ស្ដែងករណីឃាត់ជនល្មើសឆ្លងដែនដែលជិះទូកពីបរទេសនាពេលកន្លងទៅសមត្ថកិច្ចកម្ពុជាព្យាយាមទាក់ទងសម្របសម្រួលទៅសមត្ថកិច្ចប្រទេសរបស់ពួកគេ ដែលជាអ្នកប្រព្រឹត្តនោះដើម្បីចាត់វិធានការតាមច្បាប់។ ដោយឡែកករណីអំពើហិង្សាលើស្ដ្រី និងកុមារ លោកស្រីកត់សម្គាល់ឃើញកើតមានច្រើនគួរឲ្យកត់សម្គាល់ដែរ។ ប៉ុន្ដែសមត្ថកិច្ចខេត្តព្រះសីហនុក៏ព្យាយាមដោះស្រាយដែរ។
លោកស្រី ជៀប សុធារី បញ្ជាក់ថា៖ «ក្នុងនាមខ្ញុំជាសង្គមស៊ីវិលដែលធ្វើការលើសិទ្ធិមនុស្សនេះគឺនៅតែជំរុញឲ្យសមត្ថកិច្ចបន្តទប់ស្កាត់ និងចាត់វិធានការលើករណីហិង្សាលើស្ត្រី និងកុមារ។ ខ្ញុំក៏នៅមានការព្រួយបារម្ភពីការប្រើហិង្សាលើកុមារ។ ព្រោះពួកគាត់មិនបានចូលរៀនគឺពួកគាត់នៅផ្ទះ ដូច្នេះក្មេងៗមិនសូវនៅស្ងៀមទេ អ៊ីចឹងអាចនឹងរងការប្រើហិង្សាលើកុមារដែរ។ អ៊ីចឹងមានតែសមត្ថកិច្ចជួយទប់ស្កាត់ និងអប់រំផ្សព្វផ្សាយដល់អាណាព្យាបាលឲ្យយកចិត្តទុកដាក់ពីបញ្ហានេះ»៕