មណ្ឌលគិរី៖ សមត្ថកិច្ចនៃស្នងការដ្នាននគរបាលខេត្តមណ្ឌលគិរី នឹងបញ្ចូនសំនុំរឿងករណីជនជាតិដើមភាគតិចព្នងចំនួន ៥ នាក់ ទៅតុលាការ បន្ទាប់ពីពួកគេបានចូលបំភ្លឺតាមការកោះហៅ ពាក់ព័ន្ធនឹងបណ្តឹងរបស់ពលរដ្ឋម្នាក់ដែលអះអាងជាម្ចាស់ដី ដោយបានចោទពលរដ្ឋទាំងនេះថា បានសាងសង់សំណង់លើដីរបស់ខ្លួន។
នៅព្រឹកនេះ ពលរដ្ឋទាំង ៥ នាក់ មានឈ្មោះ រឿង ហែង ឈ្មោះ ណើល រិទ្ធិ ឈ្មោះ ខ្វាន់ តៃ ឈ្មោះ ខ្វែវ ស្រៀប និងឈ្មោះ មីង វិខ្លើយ មានលំនៅឋានក្នុងភូមិពូលូង សង្កាត់រមនា ក្រុងសែនមនោរម្យ បានចូលបំភ្លឺនៅការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តមណ្ឌលគិរី ដោយមានការចូលរួមពីប្រជាពលរដ្ឋដទៃទៀតជាង ១០ នាក់ផងដែរ។
លោក សូ សុវណ្ណ ស្នងការរងទទួលផែនព្រហ្មទណ្ឌបានប្រាប់ ភ្នំពេញ ប៉ុស្តិ៍ នៅថ្ងៃទី ៣ ឧសភាថា ពលរដ្ឋទាំងនោះបានចូលបំភ្លឺតាមការកោះហៅ ប៉ុន្តែពួកគេមិនមានឯកសារផ្លូវច្បាប់ ដើម្បីការពារខ្លួនក្រៅតែពីអះអាងថា ដីដែលពួកគេបានចូលទៅសាងសង់រោង និងផ្ទះ គឺជាដីព្រៃជំនឿនោះទេ។
លោកបន្តថា បន្ទាប់ពីបានស្តាប់ការស្រាយបំភ្លឺ សមត្ថកិច្ចនឹងធ្វើការកោះហៅភាគីពាក់ព័ន្ធផ្សេងៗមកបំភ្លឺបន្ថែមទៀត ដើម្បីប្រមូលឯកសារ និងភ័ស្តុតាង បញ្ចូនទៅតុលាការដោះស្រាយតាមនីតិវិធីច្បាប់បន្តក្នុងពេលខាងមុខ។
លោកបញ្ជាក់ថា៖ «រឿងនេះ យើងនៅបន្តនីតិវិធីបន្តទៀត ព្រោះយើងមិនអាចចប់ត្រឹមហ្នឹងទេ។ ពលរដ្ឋដែលចូលបំភ្លឺគាត់មិនមានឯកសារសំអាងទេ គ្រាន់តែបញ្ជាក់ថា ដីនេះ គឺជាដីដូនតា ដីធ្លាប់សែនព្រេនរបស់ពួកគាត់។ យើងនឹងបញ្ចូនទៅតុលាការឲ្យលោកជាអ្នកសម្រេចចុះ។ យើងគ្រាន់តែជាអ្នកប្រមែប្រមូលព័ត៌មាន ដើម្បីបញ្ចូនទៅឲ្យគាត់»។
យ៉ាងណា លោក សូ សុវណ្ណ បានអះអាងថា មុននឹងបញ្ចូនករណីនេះ ទៅតុលាករ សមត្ថកិច្ចនឹងបន្តកោះហៅអ្នកពាក់ព័ន្ធផ្សេងទៀតមកសាកសួរបន្ថែម។
សូមជម្រាបថា ការកោះហៅពលរដ្ឋទាំង ៥ នាក់នេះ គឺយោងតាមពាក្យបណ្តឹងរបស់ភាគីម្ខាងទៀត ដែលអះអាងជាម្ចាស់ដីទំហំ ២ ហិកតាកន្លះ ស្ថិតក្នុងភូមិពូលូង ដោយពលរដ្ឋអះអាងថា ដីនេះ គឺជាដីភ្នំរដាងរបស់សហគមន៍ជនជាតិដើមភាគតិចព្នង ដែលត្រូវបានជនខិលខូចបានលួចលក់ និងធ្វើប្លង់។
នៅថ្ងៃនេះ ភ្នំពេញ ប៉ុស្តិ៍ មិនអាចស្វែងរកលេខទំនាក់ទំនងរបស់ដើមបណ្តឹង ដែលបានប្តឹងពលរដ្ឋទាំង ៥ នាក់ ដើម្បីសុំការអត្ថាធិប្បាយជុំវិញករណីនេះបានទេ ខណៈពលរដ្ឋបានអះអាងថា អ្នកដែលប្តឹងពួកគាត់ គឺមានឈ្មោះ សេង យាម។
អ្នកស្រី រឿង ហែង ជាពលរដ្ឋម្នាក់ក្នុងចំណោមពលរដ្ឋ ៥ នាក់ ដែលត្រូវបានសមត្ថកិច្ចកោះហៅឲ្យចូលបំភ្លឺបានប្រាប់ ភ្នំពេញ ប៉ុស្តិ៍ថា ពលរដ្ឋទាំង ៥ នាក់ គឺមិនខ្លាចនឹងការបញ្ចូនសំនុំរឿងនេះ ទៅតុលាការនោះទេ។
អ្នកស្រីបន្តថា ពលរដ្ឋក៏រំពឹងដែរថា តុលាការនឹងផ្តល់យុត្តិធម៌ដល់ពួកគេ ឲ្យប្រគល់ដីភ្នំរដាងនេះ ឲ្យសហគមន៍គ្រប់គ្រង ទុកជាសម្បត្តិរួម និងសម្រាប់បន្តធ្វើពិធីតាមបែបសាសនាបន្តទៀត។
អ្នកស្រីបានបញ្ជាក់ថា៖ «ខ្ញុំសង្ឃឹមថា តុលាការនឹងរកយុត្តិធម៌ឲ្យ"៕