.jpg)
ជនសង្ស័យត្រូវសមត្ថកិច្ចឃាត់ខ្លួន ពាក់ព័ន្ធករណីបាញ់សម្លាប់កម្មករម្នាក់។ រូបថត ហ្វេសប៊ុក
រតនគិរី៖ ស្នងការនគរបាលខេត្តរតនគិរី កំពុងស្រាវជ្រាវបន្ថែមករណីយោធាស័ក្តិ ៤ កន្លះម្នាក់ ឈ្មោះ លី ថេង ភេទប្រុស អាយុ ៤៨ ឆ្នាំ បានបាញ់សម្លាប់បុរសម្នាក់ជាកម្មកររបស់ខ្លួនឈ្មោះ រឹម ចន្ថា ភេទប្រុស អាយុ ៣៧ ឆ្នាំ នៅក្នុងចំការស្ថិតក្នុងភូមិគងយុ ឃុំប៉ាតេ ស្រុកអូរយ៉ាដាវ បន្ទាប់ពីសមត្ថកិច្ចបានចាប់ឃាត់ខ្លួនជននេះនៅថ្ងៃទី ២៤ មេសា។
លោក ងយ ដន អធិការរងស្រុកអូរយ៉ាដាវ ប្រាប់ ភ្នំពេញ ប៉ុស្តិ៍ នៅថ្ងៃទី ២៥ ខែ មេសាឆ្នាំ ២០២១ នេះថា បន្ទាប់ពីករណីបាញ់សម្លាប់នេះ កើតឡើងភ្លាម លោកបានបញ្ជូនមន្ត្រីក្រោមឱវាទ ចុះទៅស្រាវជ្រាវ និងបានឃាត់ខ្លួនជនសង្ស័យ។
ប៉ុន្តែ ភ្លាមៗខាងស្នងការនគរបាលខេត្តក៏បានប្រាប់ឱ្យបញ្ជូនជនសង្ស័យនោះ ទៅកាន់ផ្នែកព្រហ្មទណ្ឌ ដើម្បីអនុវត្តនីតិវិធីបន្ត។
លោក ងយ ដន ពន្យល់ថា ការបញ្ជាឱ្យបញ្ជូនជនសង្ស័យទៅកាន់ស្នងការខេត្តនេះ ព្រោះវាជាករណីមន្ត្រីយោធាដែលមានតួនាទី និងឋានៈខ្ពង់ខ្ពស់ ដែលហួសពីសមត្ថកិច្ចរបស់ខ្លួនក្នុងការអនុវត្តនីតិវិធី។
នគរបាលព្រហ្មទណ្ឌនៃស្នងការដ្ឋាននគរបាលខេត្ត បានចុះស្រាវជ្រាវ និងប្រមូលភ័ស្តុតាងផ្សេងទៀត។ លទ្ធផលយ៉ាងណាលោកមិនទាន់ដឹងទេ។
ទោះជាយ៉ាងណា លោក ងយ ដន បញ្ជាក់ថា លោកមិនទាន់ដឹងពីមូលហេតុនៃការបាញ់សម្លាប់នេះ ឱ្យប្រាកដនោះទេ ។
ទាំងជនសង្ស័យ និងជនរងគ្រោះ គឺបានរាប់អានគ្នាអស់រយៈពេលជាង ១០ ឆ្នាំមកហើយ មិនដែលមានផលរមាស់អ្វីទេ ប៉ុន្តែករណីចុងក្រោយនេះ ពុំទាន់ដឹងថា ជនសង្ស័យមានកំហឹងអ្វីបានឈានដល់បាញ់សម្លាប់ជនរងគ្រោះបែបនេះ។ ជនរងគ្រោះ គឺជាកម្មករបម្រើការងារនៅក្នុងចម្ការបស់ជនសង្ស័យ។
ភ្នំពេញ ប៉ុស្តិ៍ មិនអាចសុំការអធិប្បាយពីលោក យិន ចំណាន ស្នងការនគរបាលខេត្តរតនគិរី ចំពោះករណីនេះបានទេ នៅថ្ងៃទី ២៥ ខែ មេសា ឆ្នាំ ២០២១ នេះ ដោយលោកឆ្លើយថា លោកកំពុងនៅព្រំដែនស្តាប់មិនសូវច្បាស់។
ប៉ុន្តែលោក ផែន ឌីណា ស្នងការរងទទួលបន្ទុកផ្នែកព្រហ្មទណ្ឌនៃស្នងការនគរបាលខេត្តរតនគិរីថ្លែងថា លោកកំពុងតែកសាងសំណុំរឿងបញ្ជូនជនសង្ស័យទៅតុលាការ។
លោកបន្តថា នៅពេលដែលបញ្ចប់នីតិវិធីយ៉ាងយូររយៈពេល ៤៨ ម៉ោង និងបញ្ជូនទៅតុលាការហើយ។ ទោះជាយ៉ាងណាលោកថា មិនទាន់ដឹងមូលហេតុនៃការបាញ់សម្លាប់នេះនៅឡើយទេ ដោយរង់ចាំមើលលទ្ធផលនៃការស្រាវជ្រាវជាមុនសិន។
វត្ថុតាងត្រូវសមត្ថកិច្ចដកហូតមានអាវុធខ្លី ១ ដើមម៉ាក CF98 សម្បកកាទូស ៥ គ្រាប់ និងគ្រាប់មិនទាន់ផ្ទុះចំនួន ៤ គ្រាប់ បង់ចំនួន ១។ រូបថត ហ្វេសប៊ុក
លោក ផែន ឌីណា ថ្លែងថា៖ «យើងស្រាវជ្រាវឱ្យលម្អិតសិនថា រឿងអីបានឈានដល់ការបាញ់សម្លាប់អីចឹង ហើយយើងក៏មិនទាន់ដឹងអត្តសញ្ញាណរបស់ គាត់ (ជនសង្ស័យ) ជាមន្ត្រីយោធា ឬពលរដ្ឋទេ បន្តិចទៀតយើងនឹងដឹងថា គាត់ជាស្អីឱ្យប្រាកដ»។
ជនសង្ស័យឈ្មោះ លី ថេង មានស្រុកកំណើតស្រុកស្រីសន្ធរ ខេត្តកំពង់ចាម ហើយបច្ចុប្បន្នរស់នៅក្នុងភូមិគងយុ ឃុំប៉ាតេ ស្រុកអូរយ៉ាដាវ ខេត្តរតនគិរី។
កាលពីថ្ងៃទី ២៤ ខែ មេសា ឆ្នាំ ២០២១ ជនសង្ស័យបានបាញ់ចំនួន ៥ គ្រាប់ ទៅលើជនរងគ្រោះឈ្មោះ រឹម ចន្ថា ត្រូវចំឆ្អឹងជំនីរខាងស្ដាំ ២ គ្រាប់ និងត្រូវចំភ្លៅខាងស្ដាំ ១ គ្រាប់ បានបណ្តាលឱ្យស្លាប់ មុនពេលបញ្ជូនទៅដល់មន្ទីរពេទ្យបង្អែកស្រុកបរកែវ។
ក្រោយពីកើតហេតុ សមត្ថកិច្ចនគរបាលស្រុកអូរយ៉ាដាវ បានដកហូតអាវុធខ្លី ១ ដើមម៉ាក CF98 សម្បកកាទូស ៥ គ្រាប់ និងគ្រាប់មិនទាន់ផ្ទុះចំនួន ៤ គ្រាប់ បង់ចំនួន ១ រួចបានចាប់ខ្លួនជនសង្ស័យបញ្ជូនទៅកាន់ស្នងការដ្ឋាននគរបាលខេត្ត៕
