សៀមរាបៈ កម្លាំងនគរបាលអន្តោប្រវេសន៍ប្រចាំនៅព្រលានយន្តហោះអន្តរជាតិខេត្តសៀមរាប បានឃាត់ខ្លួនជនជាតិកូរ៉េខាងត្បូង ២ នាក់ ដោយរឹបអូសលុយបានជាង ២ លានដុល្លារសហរដ្ឋអាមេរិក ដែលបាននាំចូលមកកម្ពុជាពីទីក្រុងហុងកុង ឆ្លងកាត់ព្រលានយន្តហោះខេត្តនេះ កាលពីថ្ងៃអាទិត្យ។
យោងតាមគេហទំព័ររបស់អគ្គស្នងការនគរបាលជាតិ បានឲ្យដឹងពីម្សិលមិញថា ជនជាតិកូរ៉េខាងត្បូងដែលរងការចាប់ខ្លួននោះ ទី១ មានឈ្មោះ YOON WONGI អាយុ ៣៣ ឆ្នាំ កាន់ប៉ាស្ព័រលេខ M54310302 និងទី២ ឈ្មោះ SONG HYUNHOO អាយុ ៤៤ ឆ្នាំ កាន់ប៉ាស្ព័រលេខ M4106054 ដោយពួកគេបានធ្វើដំណើរតាមជើងហោះហើរលេខ UO-706 (HKG-REP) មកពីទីក្រុងហុងកុង ប្រទេស ចិន។
របាយការណ៍ដដែល បានបញ្ជាក់ថា៖ «ពេលមកដល់ព្រលានយន្តហោះ កម្លាំងប៉ុស្តិ៍នគរបាលអន្តោប្រវេសន៍ បានសហការជាមួយកម្លាំងការិយាល័យគយ និងរដ្ឋាករប្រចាំអាកាសយានដ្ឋានអន្តរជាតិសៀមរាប ក៏បានឃាត់ជនជាតិកូរ៉េខាងត្បូង ចំនួន ២ នាក់ នោះតែម្តង»។
របាយការណ៍បន្តថា៖ «បុរសបរទេសទាំង ២ នាក់នេះ បាននាំចូលប្រាក់ដុល្លារខុសច្បាប់ ចំនួន ២ ២០០ ០០០$ នាំយកមកពីទីក្រុងហុងកុង ប្រទេស ចិន។ ក្នុងនោះរួមមាន ក្រដាសប្រាក់ ១០០$ ចំនួន ២១ ៩០០ សន្លឹក និងក្រដាសប្រាក់ ៥០ $ ចំនួន ២០០សន្លឹក»។
យោងតាមរបាយការណ៍ក្រោយការឃាត់ខ្លួន ជនជាតិកូរ៉េខាងត្បូងទាំង ២ នាក់ ត្រូវបានប្រគល់ជូន ក្រុមប្រតិបត្តិការទី១ (សៀមរាប) នាយកដ្ឋានស៊ើបអង្កេត និងអនុវត្តនីតិវិធី ចំណែកឯប្រាក់ដុល្លារ ចំនួន ២ ២០០ ០០០$ រក្សាទុកបណ្តោះអាសន្ននៅការិយាល័យគយ និងរដ្ឋាករប្រចាំការក្នុងអាកាសយានដ្ឋានអន្តរជាតិសៀមរាប ដើម្បីបន្តនីតិវិធី។
គេហទំព័រនគរបាលដដែលនេះបានឲ្យដឹងថា៖ «សមត្ថកិច្ចបន្តថា រាល់លុយទាំងឡាយ អ្នកដំណើរអាចយកទៅតាមខ្លួនតែ ១ ម៉ឺនដុល្លារទេ បើលើសសមត្ថកិច្ចឃាត់បណ្តោះអាសន្នស្រាវជ្រាវសិន»។
លោក សេន សាន់ដេ ប្រធានផ្នែកប្រតិបត្តិការអាកាសយានដ្ឋានអន្តរជាតិខេត្តសៀមរាប បានប្រាប់ភ្នំពេញប៉ុស្តិ៍ពីម្សិលមិញថា ពិតជាមានការឃាត់ខ្លួន ជនជាតិកូរ៉េ ដែលបាននាំចូលលុយ ដោយគ្មានប្រភពច្បាស់លាស់ចូលមកកម្ពុជា តាមច្រកអន្តរជាតិខេត្តសៀមរាបមែន ដោយសារតែមានការសហការជាមួយកម្លាំងសមត្ថកិច្ចចម្រុះ ដូច្នេះ ជនសង្ស័យ និងវត្ថុតាង ត្រូវបានដកហូត និងឃាត់ខ្លួនហើយ ដោយចំណាត់ការបន្តយ៉ាងណាទៀត លោក មិនបានដឹងទេ។
លោក សាន់ដេ ថ្លែងថា៖ «តាមព័ត៌មានខ្ញុំទទួលបាន ពិតជាមានករណីនេះមែន ប៉ុន្តែតាមការងារនេះ គឺប៉ូលិសនៅអាកាសយានដ្ឋាន ជាអ្នកទទួលខុសត្រូវ និងដឹងព័ត៌មានច្បាស់ជាងខ្ញុំ ព្រោះខ្ញុំអត់ហ៊ាននិយាយអ្វីពីក្រោយហ្នឹងទេ ខ្លាចប៉ះពាល់ដល់ការងាររបស់ពួកគាត់»។
លោក សេន សាន់ដេ បញ្ជាក់ថា ក្នុងអំឡុងពេលដែលលោកមកគ្រប់គ្រងនៅក្នុងខេត្តសៀមរាប នេះ គឺករណីដំបូងបង្អស់ដែលនាំលុយដ៏ច្រើនតាមរយៈព្រលានយន្តហោះខេត្តសៀមរាបនេះ។
ភ្នំពេញប៉ុស្តិ៍ មិនអាចទាក់ទងលោក កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍របស់ក្រសួងមហាផ្ទៃ ដែលចុះប្រតិបត្តិការផ្ទាល់ក្នុងករណីនេះបានទេកាលពីម្សិលមិញ ព្រោះតែទូរស័ព្ទចូលជាច្រើនសា ប៉ុន្តែបានកាត់ផ្តាច់ទៅវិញ។
ចំណែកលោក កែម សារិន ប្រធាននាយកដ្ឋានរដ្ឋបាលនៃអគ្គនាយកដ្ឋានអន្តោប្រវេសន៍ បានបដិសេធការធ្វើអត្ថាធិប្បាយ ដោយបង្វែរសំណួរទៅលោក កែវ វណ្ណថន ខណៈ លោក អ៊ុក ហៃសីឡា អ្នកនាំពាក្យអគ្គនាយកដ្ឋានអន្តោប្រវេសន៍ បានដិសេធផងដែរ។ ក្នុងឆមាសទី ១ ឆ្នាំនេះ អាជ្ញាធរកម្ពុជា បានឃាត់ខ្លួន និងបង្ក្រាបការនាំចូលសាច់ប្រាក់ផ្ទាល់តាមព្រលានយន្តហោះប្រមាណជាង ៤ លានដុល្លារ។ ក្រៅពីនេះ ទឹកប្រាក់ជិត ១០ លានដុល្លារ ត្រូវបានរកឃើញថា ជាលុយកខ្វក់ តាមរយៈលំហូរចេញចូលនៃបច្ចេកវិទ្យា ឬតាមរយៈធនាគារ។
ជាមួយនឹងការបង្ក្រាបការនាំចូលលុយកខ្វក់នេះដែរ កាលពីម្សិលមិញ ក្រសួងមហាផ្ទៃ បានបើកកិច្ចប្រជុំពិភាក្សាការងារ និងត្រួតពិនិត្យរបាយការណ៍វឌ្ឍនភាពការងារប្រចាំឆមាសទី ១ និងទិសដៅបន្តសម្រាប់ឆមាសទី២ ឆ្នាំ ២០១៩ របស់ខ្លួនផងដែរ។
កិច្ចប្រជុំនេះ បានប្រព្រឹត្តទៅដោយមានការចូលរួមពីសមាសភាពនៃអគ្គនាយកដ្ឋាន អង្គភាព ចំណុះក្រសួងមហាផ្ទៃ ដែលជាសមាជិកនៃក្រុមការងារទាំងអស់ ដើម្បីប្រមូលធាតុចូលសំខាន់ៗ ដឹកនាំដោយលោក ងី ច័ន្ទ្រផល រដ្ឋលេខាធិការ និងជាប្រធានក្រុមការងារត្រួតពិនិត្យឡើងវិញ Review Panel Group-RPG ក្នុងគោលដៅ ពង្រឹង ប្រសិទ្ធភាព នៃការងារស៊ើបអង្កេតផលសំអាងនៃបទល្មើស ការងារបង្ការ ទប់ស្កាត់ បង្ក្រាបបទល្មើសនៃការលាងសម្អាតប្រាក់ និងហិរញ្ញប្បទាន ភេរវកម្មឲ្យកាន់តែមានភាពល្អប្រសើរឡើងថែមទៀត៕